སྙན་ཚིག་གྲུ་ཆར་འཇོ་བའི་མ་གཅིག་དབྱངས་ཅན་ཀྱེ།།

འཇིགས་དང་སྡུག་བསྔལ་སེལ་བའི་རྒྱལ་ཡུམ་མྱུར་མ་དཔལ།།

སྔགས་ལམ་ཟུང་འཇུག་སྩོལ་བའི་ཚེ་རིང་མཆེད་ལྔ་ཀུན།།

དུས་གསུམ་འཁོར་དུ་མཁའ་འགྲོས་ལེགས་ཚོགས་བསྩལ་ཏུ་གསོལ།།

སྲིད་བརྟན་ལོངས་སྤྱོད་རྒྱས་པའི་འབྲོ་བཟའ་ཁྲི་མ་ལོད།།

བོད་ཆོས་རིག་པས་རྡོལ་བའི་མ་ཅིག་ལབ་སྒྲོན་དང་།།

རྗེ་བཙུན་མི་ལའི་སྐྱེད་ཡུམ་མྱང་ཚ་དཀར་རྒྱན་སོགས།།

མུན་འཇོམས་ཤེས་རབ་སྒེག་མོའི་དུང་གི་འཛུམ་ཞལ་དངོས།།

ཡུལ་ལྷ་དཔལ་ལྡན་ལྷ་མོའི་ནུས་མཐུ་དག་བསམ་ཞིང་།།

སྐྱ་ལོའི་སེང་ལྕམ་འབྲུག་མོའི་མཛངས་སྤྱོད་དེ་དྲན་ཚེ།།

ལྷོ་བྲག་བདག་མེད་མ་ཡི་མཁྱེན་ཡངས་ཤིག་བཤད་ན།།

དགེ་བཤེས་བུད་མེད་དེ་ཚོ་ཡང་ཡང་དུ་བསྔགས་འོས།།

སྣང་བའི་རི་ལ་འཁོར་བའི་འབྲོག་ཐང་དེ་དེད་ན།།

གསེར་མདོག་འབྲས་བུས་དུད་པའི་ཞིང་ཚིགས་དེ་གླེང་ན།།

ཚོར་བའི་ཕྱི་ནང་བཀླགས་པའི་སྙན་ངག་དེ་བྲིས་ན།།

བརྩེ་བའི་བདག་མོ་ཁྱེད་ཉིད་སྲོག་ཤིང་དེ་དངོས་ཡིན།།

མདོར་ན་སྲིད་པ་ཆགས་པའི་རླབས་ཆེན་སྐྱེས་མའི་ཚོགས།།

གནམ་གྱི་ཕྱེད་ཀ་འདེགས་པའི་གྱད་མི་དེ་ཁོ་ན།།

འགྲོ་བའི་མ་མ་སྙིང་གི་ཐིག་ལེ་དེ་ཡིན་པས།།

ཇི་སྲིད་འཚོ་བའི་མཐའ་རུ་གུས་ཤིང་གཅེས་པར་བྱའོ།།