སྲིད་པའི་རི་སྒང་འདི་ཡི།།

ཚ་ཟེར་ཆུ་ལ་སྦྱར་བའི།།

ཡིད་ཀྱི་ཟླ་བ་དཀར་པོ།།

མི་ཟད་དད་པའི་ཕྱག་འཚལ།།

དད་པའི་རྡོ་རིང་ངོས་ཀྱི།།

མཚན་བྱང་གསེར་གྱི་ཨ་ལུང་།།

ཞི་བའི་འཇག་མ་བཏུས་ཏེ།།

ཕྱག་ཏུ་རིས་སུ་ལོས་ཕབ།།

འདམ་གྱི་འོབས་ཀླུང་ནང་ནས།།

བདེ་བའི་ས་ལམ་འཚོལ་བའི།།

མི་ཡི་འཕགས་པ་ཆེན་པོ།།

སྲས་གཙང་སྙིང་གི་མེ་ཏོག།

གྲགས་མཛེས་བཞིན་ལ་མ་འཁྲེང་།།

རྒྱང་བཞུད་འཕྲེང་ཐག་གཅོད་ཞོར།།

དཀའ་ཐུབ་ལས་སུ་སྦྱོར་ཏེ།།

དུས་བཞི་དར་ལྕོག་ཐེད་སོང་།།

ཕྱི་དགྲ་ཞེ་ལ་མ་གནོད།།

ནང་དུག་དྲུང་ནས་ཕྱུང་པའི།།

ཐབས་མཁས་ཐུགས་རྗེ་ཆེན་པོ།།

འགྲོ་བའི་སྨན་པ་ཐོག་མ།།

བདུད་དཔུང་མདའ་ཡི་འཁོར་ལོ།།

འཇམ་མཉེན་རྩི་ཏོག་བསྒྱུར་བའི།།

གདོད་མའི་གཉུག་རྩ་རྙེད་པའི།།

བདེ་གཤེགས་ཁྱེད་ལ་འདུད་དོ།།

རྒྱུ་འབྲས་སྤྱན་གྱིས་མཁྱེན་བཞིན།།

ཁམས་གསུམ་མ་རུ་སྨྲས་པའི།།

སྲོག་ལྡན་ཡོངས་ཀྱི་ཉི་མ།།

ཐར་བའི་རུ་འདྲེན་ཐུབ་པ།།

བདག་མེད་གཤིས་སུ་བཞེས་ཤིང་།།

རྟེན་འབྱུང་རི་མོ་འབྲི་བའི།།

མཐའ་གཉིས་ཐུགས་ཀྱིས་མ་རེག།

སྐུ་གཞི་སྟོན་གྱི་སྤྲིན་པ།།

གཞན་ལ་བརྩེ་བ་ཆེ་ཞིང་།།

རང་ལ་ཡི་ག་ཆད་པའི།།

སྐལ་བའི་མར་མེ་སེར་པོ།།

ཡིད་ཀྱི་དཀྱུལ་ནས་གཡོ་ཁི།།

རང་མགོན་རང་ཉིད་ཡིན་ཚུལ།།

གསུང་གི་རྒྱུད་མངས་དཀྲོལ་བའི།།

ཤེས་བྱའི་གཏེར་མཛོད་ཆེན་མོ།།

མུ་ཏིག་མདངས་སུ་འཕོས་འགྲོ།།

ང་ཡི་ལམ་བུ་འདི་ཉིད།།

བདེན་པའི་ཆོས་ཉིད་དེ་རུ།།

གཞི་རུ་གནས་མལ་གཉེར་བའི།།

ཡིན་ཚུལ་གསུང་མཁན་ཁྱེད་ལགས།།