རྟོག་པ་སྨྱུག་རྩེར་སྒྲོན་པའི་སྒྱུ་རྩལ་བ།

སད་སྐལ།        2022-11-14

སྣང་བའི་གཞིས་ཀ་ཚང་ལ་ཕུལ།

བྱ་གླག་ཅིག་གི་འདུན་པའི་ནམ་མཁའ།ནམ་ཞིག་གཤོག་ཡངས་བརྐྱངས་ཏེ་འཕུར་བའི་གོ་རིམ་ཉིད།ཡང་ན། རི་མོ་བ་ཞིག་གིས་བཞེངས་པའི་ལྷ་རིས།ཐོག་མའི་ཐིག་ཚད་ནས་འཛིན་པའི་རྣམ་འགྱུར།རྟིང་མའི་གྲུབ་དོན་ལ།ཡིད་ཀྱི་ཆུ་མོ་སྐྱོམ་པ་ལ་ངས་སྨོན་ལམ་ཡང་ཡང་འདེབས།དུས་ཚོད་ཀྱི་གཙང་པོ་བཞུར་ནས་འགྲོ།ངལ་དུབ་ཀྱི་རྒྱ་བགྲོལ་བྱེད་ནི་ཏག་ཏག་གཞིས་ཀ་འདི་ཉིད་ཁོ་ན་ཡིན།ང་རང་ནོར་འཁྲུལ་ལ་སོང་མེད་ཚེ།ནང་སེམས་ཀྱི་ནམ་མཁར་རྒྱུ་བའི་སྤྲིན་པ་དམ་དུམ།དབྱངས་གསལ་གྱི་ཚོན་རྩིས་སྒེག་སྟེ།དེ་ཡི་འཇའ་ཚོན་མཐོངས་སུ་ཤར་བའི་མཛེས་པས།ང་དང་ང་ཡི་ཡིད་ངོར།མེ་ལོང་ལས་གསལ་བའི་རེ་སྨོན་གྱི་ཡིད་འོང་མེ་ཏོག་སྣ་ཚོགས།རྟིང་མའི་དྲི་བསུང་འཐོར་བྱུང་།མ་རེད། རྟིང་མའི་དྲི་བསུང་ལ་སྨོན་པའི་སེམས་པ་གཙང་མ།སྤྱི་ལོ་ཉིས་སྟོང་ཉེར་གཉིས་པའི་ནང་དུ།གསར་དུ་དབུ་བརྙེས་པའི་ཡི་གེའི་དག་ཞིང་མཆོག་མ།དེ་ནི། ཡིད་འོང་ལས་བལྟམས་པའི་སྲིད་ཅན་གྱི་བློ་བརྐུ་བའི་ཆོམ་པོ་སྒེག་གིས་ཕྱུག་པ་ཞིག།དེ་ཡི་ནང་སེམས་ལ་འགོས་པའི་མཛངས་པའི་དཔལ་ཕུན་སུམ་ཚོགས་པོ་ཞིག་སྟེ།ནམ་ཞིག་ལ། རང་ཅག་རྣམས་ཀྱི་མཐོངས་སུ་བཤམ་དུས།ང་ནི། ད་ལྟའི་རེ་སྨོན་པ་ཉིད་དོ།།སྒྱུ་རྩལ་དང་བརྡ་རིས་ལ་ལྷག་ཏུ་དགའ་ཞིང་།དུས་མཐུན་དང་རིག་དུང(རིག་གཞུང་ལ་དུངས་པ།)གིས།རྟོག་པ་མྱུ་གུའི་གར་ལ་རྩེན་པའི་ཉམས་མཚར་ནི།ཁྱོད་དང་ཁྱོད་ཀྱི་དགའ་ཕྱོགས་དང་ང་དང་ང་ཚོའི་ངལ་དུབ་སེལ་བའི་སྐོམ་ཆུ་གཙང་མ་ཞིག་ཡིན།འཕན་ཟེལ་དང་ལོག་པར་འཆེལ་བ་ལྟ་བུའི་རྨོངས་མུན་བསྒྲོལ་བའི་གཟིངས་ལ་འཁྲེན་པའི་མི་ནི།སོམ་ཉི་མི་དགོས་པར་ངའི་རེ་སྨོན་ནང་གི་སྣང་བའི་གཞིས་ཀ་ཚང་འདི་ཡིན་ཏེ།ཁོང་ཚོ་ནི། མི་ཡི་ཁྱུ་མཆོག་དང་།མཚལ་རས་དང་ཞི་སྤྱོད་ཀྱིས་ཀུན་ནས་རབ་ཏུ་ཕྱུག་པས་ནའོ།དོན་ངོ་མའི་གཞིས་ཀ་འདིའི་ནང་ཉིང་ནི།དུས་རབས་ཤིག་གི་ངོ་གདོང་དང་།ཕྱི་ཚུལ་རིང་ལུགས་པ་ཞིག་གི་ངོ་སྲུང་བྱེད་ཀྱི་སེང་རས་མ་ཡིན་ཏེ།ཞམ་ཆུ་བཞིན་དྭངས་ཤིང་གཙང་བ།མཆོག་དམན་ཀུན་མཐུན་གྱི་སྟིང་ཚིག་སྟོར་བའི་མི་ཕོ་འགས།ཕྱལ་དཔྱད་ཀྱི་ལྟ་བས་བཞེངས་པའི་སྒྱུ་འཕྲུལ་གྱི་ཕོ་བྲང་མཐོན་པོ་ཞིག་ཡིན་ནོ།།



  • ལེ་ཚན་སྔོན་མ།:ལོ་ཟླས་མི་མཚོན་པའི་དྲན་པའི་འགྱུར་ཁུག
  • ལེ་ཚན་རྗེས་མ།:གནས་སྐབས་མེད།