རྐང་པ་ཞ་འཁུམས་སུ་གྱུར་རྗེས། ངའི་ཁོང་ཁྲོ་སྔར་ལས་རྩུབ་པོར་གྱུར་འདུག་སྟེ། བྱང་ནས་ལོག་པའི་ངང་པའི་ཁྱུ་མཐོང་དུས། ངས་གློ་བུར་དུ་མདུན་གྱི་ཤེལ་ཕོར་གཅོག་ངེས་ཤིང་། སྙན་ཞིང་འཇེབས་པའི་ལེ་ཀུའུ་ཡི་གཞས་ལ་ཉན་གྱིན། ཤེད་གང་ཡོད་ཀྱིས་ལག་པ་རྩེབས་སའི་དངོས་པོ་དག་གྱང་ངོར་གཡུག་ངེས། ཨ་མ་ཁ་རོག་གེར་ཕྱི་རོལ་གྱི་ངས་མི་མཐོང་བའི་གནས་ཤིག་ཏུ་བསྐུངས་ནས་ང་ལ་ཅེར་འདུག། ནམ་ཞིག་ང་རང་ཞི་འཇམ་ངང་བསྡད་ཡོད་པ་མཐོང་འཕྲལ། དེ་མ་ཐག་ནང་དུ་ཡོང་ནས། མིག་ཟུང་དམར་ཆིལ་ལེ་བའི་ངང་ང་ལ་ལྟ་བར་བྱེད།

“གོ་ཐོས་སུ་པེ་ཧེའི་མེ་ཏོག་བཞད་འདུག་ཟེར། འུ་གཉིས་ཕྱི་ལ་འཆམ་འཆམ་དུ་འགྲོ།” མོས་རྣམ་ཀུན་ཏུ་འདི་ལྟར་བཤད་དེ། ཨ་མ་མེ་ཏོག་ལ་དགའ་མོད། ཡིན་ནའང་ངའི་རྐང་པ་ཞ་འཁུམས་སུ་གྱུར་པ་ནས་བཟུང་། མོས་གསོས་པའི་མེ་ཏོག་མཐའ་དག་རྙིད་སོང་།

“མིན། ང་མི་འགྲོ། ” ངས་ཤུགས་གང་ཡོད་བཏོན་ཏེ་རྐང་པ་གཉིས་ཀར་རྡེག་གྱིན། “ང་གསོན་སྙིང་མི་འདུག”ཅེས་བཤད་པ་ན། ཨ་མ་བརྒྱུགས་ཡོང་ནས་ངའི་ལག་པར་འཇུས་ཏེ། སྐྱོ་བའི་ཉམས་ཀྱིས། འུ་མ་བུ་གཉིས་ཀ་སྐྱིད་པོ་བདེ་མོས་འཚོ་དགོས་ཞེས་ཟེར།

རེད་དེ། ངས་ཨ་མའི་ནད་གཞི་ཚད་དེ་འདྲར་སླེབས་ཟིན་པ་ཡེ་ནས་མ་ཤེས་ཏེ། ཕྱིས་སུ་ནུ་མོས་བཤད་རྒྱུར། ཨ་མའི་མཆིན་པ་ན་ནས་གཉིད་མ་ཁུགས་པར་རྟག་ཏུ་འགྲེ་ལྡོག་རྒྱག་བཞིན་འདུག་ཟེར།

ཉིན་དེར་ང་གཅིག་པུ་ཁང་པའི་ནང་དུ་བསྡད་དེ་སྒེའུ་ཁུང་ལས་སྡོང་ལོ་ས་རུ་ཟགས་ཚུལ་ལ་ལྟ་བར་བྲེལ་དུས། ཨ་མ་ནང་དུ་ཡོང་སྟེ་ངའི་མདུན་ཐད་དུ་ལངས་ཤིང་། “པེ་ཧེའི་ལུག་མིག་མེ་ཏོག་བཞད་འདུག། འུ་གཉིས་ལྷན་དུ་བལྟ་རུ་འགྲོ་ཞེས་ཟེར། མོའི་སྐམ་རིད་ཀྱི་བྱད་བཞིན་ལས་ཞུ་བ་བྱེད་པའི་བཟོ་ལྟ་ཞིག་མངོན་བྱུང་།

“ནམ་འགྲོ་རྒྱུ། ”

“ཁྱོད་རང་འཐད་པ་ཡིན་ན་སང་ཉིན་འགྲོ།” ངས་སྐད་ཆ་དེས་མོ་རང་དགའ་བདེས་ཁྱབ་སོང་། དེར་བརྟེན། ངས“ཆོག་གི། སང་ཉིན་འགྲོ”ཞེས་བཤད་པ་ན། མོ་རང་དགའ་ཐག་ཆོད་དེ་མཚམས་རེར་ཙོག་པུར་འདུག་ཅིང་མཚམས་རེར་ཀེ་རེ་ལངས།

“དེས་ན་རིངས་པར་གྲ་སྒྲིག་བྱ།”

“ཨ་ཡོ། གོམ་པའི་འགའི་ལམ་ཐག་ལ་གྲ་སྒྲིག་བྱ་རྒྱུ་ཅི་ཡོད། ”

མོ་ཡང་དགོད་ཞོར་ངའི་གམ་དུ་ཙོག་པུར་བསྡད་དེ། “ལུག་མིག་མེ་ཏོག་ལ་བལྟས་ཚར་རྗེས། འུ་གཉིས་ཟ་མ་གཡོ་སྐོལ་བྱེད་དུ་འགྲོ། ཁྱོད་ཆུང་དུས་སྲན་ཆུང་ཟ་བར་དགའ། ངས་ཁྱོད་རང་པེ་ཧེ་ལ་ཁྲིད་པ་དེ་དྲན་ནམ། ཁྱོད་ཀྱིས་མཐའ་གཅིག་ཏུ་ལྕང་སྡོང་གི་སྣབས་དེ་འབུ་ཐོང་བར་འཁྲུལ་ནས་སྔོན་དུ་བརྒྱུགས་ཤིང་། རྐང་པས་གཅིག་རེ་གཅིག་རེ་གཅིར……” མོས་གློ་བུར་དུ་བཤད་མཚམས་བཞག་སོང་། མོ་རང“རྒྱུག”དང“གཅིར”ལྟ་བུའི་ཡིག་འབྲུར་ང་ལས་ཀྱང་ཚོར་སྣང་སྐྱེན་པོ་རང་རེད། ཨ་མ་ཡང་ཁ་རོག་གེར་སྒོར་བུད་སོང་། དེ་ནས་གཏན་དུ་ལོག་མ་བྱུང་།

ཁྱིམ་མཚེས་དག་གིས་མོ་རང་རླངས་འཁོར་དུ་འཇོག་དུས། མོས་ད་དུང་ཁྲག་སྐྱུག་གྱིན་མཆིས། མོའི་ནད་གཞི་དེ་འདྲའི་ཚད་ལ་ཐོན་པ་ངས་ཡེ་ནས་མ་ཤེས། རྐང་གསུམ་རྒྱང་དུ་ཕྱིན་པ་དང་བསྟུན། ཨ་མ་ང་དང་གཏན་དུ་གྱེས་པའང་གཞི་ནས་མ་ཚོར།

ཁྱིམ་མཚེས་ཚང་གི་ན་གཞོན་དེས་ང་རང་ཁུར་ཏེ་ཨ་མ་ལ་བལྟ་རུ་འགྲོ་དུས། མོས་དབུགས་ཧལ་ཧལ་བྱེད་ཀྱིན་འདུག་པ་དེ་ནི་མོའི་དཀའ་སྡུག་གི་མི་ཚེ་དང་ཡོངས་སུ་མཚུངས། གཞན་གྱིས་བཤད་པ་ལྟར་ན། མོ་རང་མ་བརྒྱལ་གོང་གི་ཆེས་མཇུག་མཐའི་སྐད་ཆ་ནི། “ངའི་བྱིས་པ་ནད་པ་དེ་དང་། ད་དུང་གཉེན་མ་སྒྲིག་པའི་ངའི་བུ་མོ……”ཞེས་པ་དེ་རེད།

ཡང་སྟོན་ཁ་སླེབས་སོང་། ང་དང་ནུ་མོ་པེ་ཧེར་ལུག་མིག་མེ་ཏོག་ལ་བལྟ་རུ་ཕྱིན། མེ་ཏོག་སེར་པོ་དྭངས་ཤིང་གསལ་ལ། མེ་ཏོག་དཀར་པོ་གཙང་ཞིང་མཛེས། མེ་ཏོག་དམར་སྨུག་ག་ལ་བ་རྣམས་མཛེས་ཤིང་གཏིང་ཟབ་པས་མཚོན། གྲུང་ཤ་དོད་པོའི་སྒོ་ནས་སྟོན་རླུང་གི་ཁྲོད་དུ་འོད་ཆེམ་ཆེམ། མདངས་མཛེས་མཛེས།

ངས་ཨ་མས་བཤད་མ་ཚར་བའི་སྐད་ཆའི་དོན་རྟོགས་སོང་ལ། ནུ་མོས་ཀྱང་རྟོགས་སོང་། ངེད་གཉིས་ལེགས་པོར་གསོན་དགོས། ……