ད་ལོའི་སྤྱི་ཟླ་བཅུ་པའི་ཚེས་གཅིག་ཉིན་ནི་ཀྲུང་ཧྭ་མི་རིགས་སྤྱི་མཐུན་རྒྱལ་ཁབ་བཙུགས་ནས་ལོ༧༣འཁོར་བའི་དུས་སྟོན་ཡིན་ཞིང་། དུས་སྟོན་འདི་ལ་ཀྲུང་ཧྭའི་བུ་རྒྱུད་ཚོས་སོ་སོའི་ལས་གནས་སུ་འབད་འབུངས་ཧུར་སྐྱོད་བྱས་ཏེ་ལེགས་སྐྱེས་ཆེ་ཕྲ་གང་རུང་གྲ་སྒྲིག་བྱས་ཡོད་པ་སྨོས་མི་དགོས། ཁོ་བོའི་བསམ་ཚུལ་ལྟར་ན་རྒྱལ་སྟོན་དུས་ཆེན་འདི་ལ་འབུལ་སྙིང་བྲོ་བའི་ལེགས་སྐྱེས་ཆེས་ཡག་ཤོས་ནི་མི་རིགས་མཐུན་སྒྲིལ་ཆེན་པོའི་བཀྲ་ཤིས་ཁ་བཏགས་དཀར་པོ་དེ་ཡིན། གང་རེད་ཟེར་ན། མི་རིགས་མཐུན་སྒྲིལ་ཆེན་མོ་ཡོང་ན་ཀྲུང་ཧྭ་མི་རིགས་བསྐྱར་དར་རླབས་པོ་ཆེའི་ཀྲུང་གོའི་ཕུགས་འདུན་འགྲུབ་ཐུབ་ངེས་ཡིན་ལ། དེ་ལས་ལྡོག་ན་མི་སྲིད་པའི་ཕྱིར་རོ།།

མི་རིགས་ཁག་སེ་འབྲུའི་རྡོག་པོ་བཞིན་མཐུན་སྒྲིལ་ཆེན་པོ་ཡོང་དགོས་ན་ཀྲུང་ཧྭ་མི་རིགས་ཀྱི་གཅིག་མཐུན་འདུས་གྲུབ་ཀྱི་འདུ་ཤེས་བརྟན་པོར་བཅང་ཐུབ་མིན་ལ་རག་ལས་ཤིང་། ཀྲུང་ཧྭ་མི་རིགས་ཀྱི་གཅིག་མཐུན་འདུས་གྲུབ་ཀྱི་འདུ་ཤེས་ནི་ཀྲུང་གོའི་སྤྱི་ལེ་ངོས་གྲུ་ཁྲི༩༦༠ལྷག་ཙམ་གྱི་སྐམ་སའི་རྒྱལ་ས་དང་། མི་འབོར་དུང་ཕྱུར༡༤ལྷག་ཙམ་དང་། མི་རིགས༥༦བཅས་ཡོད་པའི་རྒྱལ་ཁབ་ཀྱི་གཞི་རྩའི་གནས་ཚུལ་ལ་གཞི་ཚུགས་ཡོད། དེས་སྣ་མང་གཞི་གཅིག་གི་ཀྲུང་ཧྭ་མི་རིགས་ཁྱིམ་ཚང་ཆེན་མོའི་འཆམ་མཐུན་མཉམ་གནས་ཡིན་པའི་ཁྱིམ་ཚང་སྒྲིག་སྲོལ་དང་། ཕྱར་བ་གྲུ་འདེགས་ཀྱི་སྙིང་སྟོབས་མངོན་པའི་ཁྱིམ་ཚང་སློབ་གསོ། ཞི་མཐུན་འཕེལ་རྒྱས་ཅན་གྱི་ཁྱིམ་ཚང་དར་སྲོལ་བཅས་གཏན་ལ་འབེབས་ཡོད་ཅིང་ཀྲུང་གོའི་མི་རིགས་ཁག་གི་མཐུན་སྒྲིལ་ཆེན་པོའི་བསམ་ཕྱོགས་གསར་པ་མཚོན་ཡོད། མི་རིགས་ཁག་ལས་ཀྲུང་ཧྭ་མི་རིགས་ཀྱི་གཅིག་མཐུན་འདུས་གྲུབ་ཅིག་གྲུབ་ཡོད་པ་དང་། མི་རིགས་ཁག་ནི་ཁྱིམ་གཞིས་ཆེན་པོའི་ཁོངས་མི་ཡིན་ཞིང་། ཀུན་གྱི་ཁེ་ཕན་དང་འབྲེལ་བ་ཡོད་ལ། གཅིག་ཉམས་ན་ཀུན་ཉམས་པ་དང་གཅིག་དར་ན་ཀུན་དར་བ་ཡིན་སྟབས། མི་རིགས་མཐུན་སྒྲིལ་ནི་མི་རིགས་ཁག་གི་མི་དམངས་ཀྱི་སྲོག་རྩ་ལྟ་བུ་རེད། མི་རིགས་ལས་དོན་ཡག་པོ་སྒྲུབ་པའི་འགག་རྩ་ནི་མི་རིགས་མཐུན་སྒྲིལ་ཡག་པོ་ཡོང་བ་བྱ་རྒྱུ་དེ་ཡིན་པ་དང་ཆེས་གོ་ཆོད་པའི་བྱེད་ཐབས་ནི་མི་སེམས་བརྩོན་ལེན་བྱ་རྒྱུ་དེ་རེད། ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན་བློ་མཐུན་ཞི་ཅིན་ཕིང་གིས་མི་རིགས་མཐུན་སྒྲིལ་ཡར་ཐོན་བྱ་གཞག་ཐད་རྒྱས་བཤད་གཏིང་ཟབ་གནང་ནས་རང་རྒྱལ་གྱི་མི་རིགས་མཐུན་སྒྲིལ་ཡར་ཐོན་བྱ་གཞག་དེ་རིགས་པའི་གཞུང་ལུགས་ཐད་སྔར་བྱུང་མྱོང་མེད་པའི་མཐོ་ཚད་གསར་པ་ཞིག་ཏུ་སླེབས་ཡོད། ང་ཚོས་ནམ་རྒྱུན་འདི་ལྟར་འཆད་བཞིན་ཡོད་དེ། ཀྲུང་གོས་མི་རིགས་ཀྱི་གནད་དོན་ཐག་གཅོད་བྱེད་པར་ལྡེ་མིག་གཉིས་ཡོད་པ་སྟེ། གཅིག་ནི་བསམ་པའི་ཐད་ཀྱི་ཁྱད་པར་ལ་བརྩི་འཇོག་བྱ་རྒྱུ་དང་། ཅིག་ཤོས་ནི་དངོས་པོའི་ཐད་ཀྱི་ཧེ་བག་ཆུང་དུ་གཏང་རྒྱུ་དེ་རེད། བསམ་པའི་ཐད་ཀྱི་ཁྱད་པར་ལ་བརྩི་འཇོག་བྱ་རྒྱུ་དེས་རིག་གནས་སྣ་མང་རང་བཞིན་ལ་བརྩི་འཇོག་བྱས་ཏེ་ཀྲུང་ཧྭ་མི་རིགས་ཐུན་མོང་ལ་དབང་བའི་བསམ་པའི་ཁྱིམ་གཞིས་བསྐྲུན་མགོ་ཚུགས་ཡོད་ལ། དངོས་པོའི་ཐད་ཀྱི་ཧེ་བག་ཆུང་དུ་གཏོང་བ་དེས་དཔལ་འབྱོར་འཚོ་བ་མཉམ་དུ་ལོངས་སུ་སྤྱད་དེ་ཀྲུང་ཧྭ་མི་རིགས་ཀྱིས་ཐུན་མོང་ངང་ལོངས་སྤྱོད་བྱེད་པའི་དངོས་པོའི་ཞིང་ས་བསྐྲུན་མགོ་བཙུགས་ཡོད་པ་རེད། ལྡེ་མིག་དེ་གཉིས་ནི་ཀྲུང་ཧྭ་མི་རིགས་ཀྱི་གཅིག་མཐུན་འདུས་གྲུབ་ཀྱི་འདུ་ཤེས་བརྟན་པོར་བཅངས་པ་དང་མི་རིགས་ཁག་སེ་འབྲུའི་རྡོག་པོ་ལྟར་དམ་པོར་འབྲེལ་རྒྱུར་སྐུལ་འདེད་གཏོང་བའི་འདེགས་སྐྱོར་གལ་ཆེན་དང་འགག་རྩའི་ནང་དོན་ཞིག་རེད།

མི་རིགས་ཁག་སེ་འབྲུའི་རྡོག་པོ་བཞིན་མཐུན་སྒྲིལ་ཆེན་པོ་ཡོང་དགོས་ན་མི་རིགས་ཁག་ཐུན་མོང་ཐོག་དར་རྒྱས་ཡོང་བ་བྱ་དགོས། ཀྲུང་གོའི་ཁྱད་ཆོས་ཀྱི་མི་རིགས་མཐུན་སྒྲིལ་ཡར་ཐོན་བྱ་གཞག་ལས། ཤར་རྒྱུད་དང་ནུབ་རྒྱུད་དང་། མི་རིགས་ཁག་གི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་ཧེ་བག་ཆུང་དུ་གཏོང་བའི་ཐད་ནུབ་རྒྱུད་ཐོན་འབྱེད་ཆེན་པོས་མཚོན་བྱེད་དུ་གྱུར་པའི་ས་ཁོངས་མཐུན་སྦྱོར་ངང་འཕེལ་རྒྱས་གཏོང་བའི་འཐབ་ཇུས་གྲུབ་ཅིང་། ཁ་གཏད་རོགས་སྐྱོར་གྱི་ལམ་སྲོལ་ཆགས་པར་བརྟེན། མི་རིགས་ཁག་གིས་ཐུན་མོང་ཐོག་མཐུན་སྒྲིལ་འབད་འཐབ་དང་ཐུན་མོང་ཐོག་དར་རྒྱས་གོང་འཕེལ་གཏོང་བའི་འདུ་ཤེས་གཅིག་བསྡུས་ཐོག་མཚོན་ཡོད། ཚུལ་དེ་ནི་ནུབ་ཕྱོགས་ཀྱི་དར་རྒྱས་ཆེ་བའི་རྒྱལ་ཁབ་ཁ་ཤས་ཀྱི་ས་ཁོངས་ཀྱི་དཔལ་འབྱོར་འཕེལ་རྒྱས་འགྲོ་ཚུལ་དོ་མི་སྙོམས་པའི་དབང་གིས་ས་ཁུལ་ཕྱུག་པོས་འགན་འཁྲི་དང་འོས་འགན་འཁུར་འདོད་མེད་པར་རང་ཚུགས་ངང་རྒྱལ་ཁབ་འཛུགས་སྐྲུན་བྱ་རྒྱུར་བརྩོན་པའི་ཟང་ཟིང་གི་སྣང་ཚུལ་དང་བསྡུར་ན་ཁྱད་པར་མངོན་གསལ་དོད་པོར་གྱུར་ཡོད། མཐར་གཏུགས་ནས་བཤད་ན་རྒྱལ་ཁབ་དེ་དག་གིས་མི་རིགས་མཐུན་སྒྲིལ་ཡར་ཐོན་གྱི་བྱ་གཞག་ཡག་པོ་བསྒྲུབས་མེད་པ་དང་མི་རིགས་ཀྱི་གཅིག་མཐུན་འདུས་གྲུབ་ཀྱི་འདུ་ཤེས་བརྟན་པོ་བཅངས་ཐུབ་མེད།

མི་རིགས་ཁག་སེ་འབྲུའི་རྡོག་པོ་བཞིན་མཐུན་སྒྲིལ་ཆེན་པོ་ཡོང་དགོས་ན་ཁྱད་པར་ལ་བརྩི་འཇོག་བྱེད་པའི་རྨང་གཞིའི་ཐོག་གི་རིག་གནས་ཀྱི་ངོས་འཛིན་གཅིག་མཐུན་ཡོང་བ་བྱ་དགོས། མི་རིགས་ཁག་ཐུན་མོང་ཐོག་མཐུན་སྒྲིལ་འབད་འཐབ་དང་། ཐུན་མོང་ཐོག་དར་རྒྱས་གོང་འཕེལ་ཡོང་བའི་སྔོན་འགྲོའི་ཆ་རྐྱེན་ནི་ཏང་གི་མི་རིགས་སྲིད་ཇུས་ཁྱོན་ཡོངས་ནས་ལག་ལེན་མཐར་ཕྱིན་བསྟར་བ་དང་། སྤྱི་ཚོགས་ཡོངས་ལ་ཕྱོགས་པའི་མི་རིགས་མཐུན་སྒྲིལ་ཡར་ཐོན་གྱི་སློབ་གསོ་རྒྱ་ཁྱབ་དང་གཏིང་ཟབ་ཏུ་སྤེལ་བ་དེ་ཡིན་ཞིང་། ཐབས་ལམ་ནི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་གྲུབ་འབྲས་མཉམ་སྤྱོད་དང་། རིག་གནས་ཀྱི་སྣ་མང་རང་བཞིན་ལ་བརྩི་འཇོག་དང་སྲུང་སྐྱོང་། མི་རིགས་ཁག་འཆམ་མཐུན་མཉམ་གནས་ཀྱི་འགྲོ་འོང་དང་། ཕྱར་བ་གྲུ་འདེགས་ཀྱིས་སྤེལ་རེས། ཞི་མཐུན་འཕེལ་རྒྱས་ངང་མཉམ་འདྲེས་བཅས་ཡོང་བ་བྱ་རྒྱུ་དེ་ཡིན། དམིགས་ཡུལ་ནི་ཀྲུང་ཧྭ་མི་རིགས་ཀྱི་གཅིག་མཐུན་འདུས་གྲུབ་ཀྱི་འདུ་ཤེས་བརྟན་པོར་བཅངས་ནས་མི་རིགས་ཁག་སེ་འབྲུའི་རྡོག་པོ་ལྟར་དམ་པོར་འབྲེལ་བ་དེ་རེད། འདིར་ནན་བཤད་བྱས་པའི་གཅིག་མཐུན་འདུས་གྲུབ་ཀྱི་འདུ་ཤེས་ལས་མངོན་པའི་གཅིག་མཐུན་ཞེས་པ་ནི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་གྲུབ་འབྲས་མཉམ་སྤྱོད་ཡིན་པར་མ་ཟད། དེ་བས་གལ་འགངས་ཆེ་བ་ནི་མེས་རྒྱལ་རླབས་པོ་ཆེ་དང་། ཀྲུང་ཧྭ་མི་རིགས། ཀྲུང་ཧྭ་རིག་གནས། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས། ཀྲུང་གོ་གུང་ཁྲན་ཏང་བཅས་ལ་བཅངས་པའི་ངོས་འཛིན་གཅིག་མཐུན་དེ་ཡང་ཡིན་པ་རེད། སྣ་མང་གཞི་གཅིག་ཡིན་པའི་ཀྲུང་ཧྭ་མི་རིགས་ཁྱིམ་ཚང་ཆེན་པོའི་ངོས་ནས་བརྗོད་ན། ཀྲུང་ཧྭའི་རིག་གནས་ནི་མི་རིགས་ཁག་གི་རིག་གནས་ཀྱི་སྙིང་བཅུད་ཡིན། ཀྲུང་ཧྭའི་རིག་གནས་གྲུབ་པའི་མི་རིགས་ཁག་གི་རིག་གནས་ནི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་རིག་གནས་འཛུགས་སྐྱོང་བྱེད་པའི་གྲུབ་རྐྱེན་གཙོ་བོ་ཡིན་ལ། ཀྲུང་ཧྭ་མི་རིགས་ཀྱི་གཅིག་མཐུན་འདུས་གྲུབ་ཀྱི་འདུ་ཤེས་བརྟན་པོར་བཅང་བའི་སྒུལ་ཤུགས་ཀྱང་ཡིན། མི་རིགས་ཁག་འགྲོ་འོང་དང་། སྤེལ་རེས། མཉམ་འདྲེས་བཅས་ཡོང་བ་ལ་སྐུལ་འདེད་གཏོང་བར་ཁྱད་པར་གྱི་རང་བཞིན་དང་ཐུན་མོང་གི་རང་བཞིན་བར་གྱི་འབྲེལ་བ་ཐག་གཅོད་ཡང་དག་པ་བྱ་དགོས་ཤིང་། ཁྱད་པར་ལ་བརྩི་འཇོག་དང་སྣ་མང་ལ་ཁོག་ཡངས་བྱས་ནས་མི་རིགས་ཁག་ཐུན་མོང་ཐོག་མཉམ་སྡོད་དང་། མཉམ་སྦྱོང་། མཉམ་ལས། མཉམ་སྤྲོ་བཅས་ཀྱི་སྤྱི་ཚོགས་ཀྱི་ཆ་རྐྱེན་བསྐྲུན་དགོས། འདི་ནི་མི་རིགས་མཐུན་སྒྲིལ་ཡར་ཐོན་བྱ་གཞག་གི་བསམ་ཕྱོགས་གསར་པ་ཞིག་རེད།

དཀར་མཛེས་བོད་རིགས་རང་སྐྱོང་ཁུལ་གྱི་བུ་རྒྱུད་ཚོས་ཏང་གི་ཡང་དག་པའི་འགོ་ཁྲིད་འོག་ཏང་གི་བཀའ་ལ་ཉན་ཞིང་ཏང་གི་རྗེས་སུ་འབྲངས་ནས་འཕེལ་རྒྱས་དང་དམངས་འཚོ། སྐྱེ་ཁམས། བརྟན་བརླིང་བཅས་ཀྱི་དོན་ཆེན་ཁག་ལ་འབད་འཐབ་ཆེན་པོ་བྱས་དང་བྱེད་བཞིན་པ་ལ་བརྟེན་ནས། དཔལ་འབྱོར་དང་སྤྱི་ཚོགས་གོང་འཕེལ་སྔར་ན་མེད་པ་བྱུང་ཞིང་། ལྷག་པར་མི་རིགས་མཐུན་སྒྲིལ་གྱི་བྱ་གཞག་དབྱར་མཚོ་རྒྱས་པ་ལྟར་འཕེལ་ནས་ཚང་མས་མཐུན་སྒྲིལ་རྡོག་རྩ་གཅིག་སྒྲིལ་གྱིས་མཐུན་སྒྲིལ་དང་ཕྱུག་འབྱོར། འཆམ་མཐུན། མཛེས་སྡུག་བཅས་ཀྱི་སྤྱི་ཚོགས་རིང་ལུགས་དེང་རབས་ཅན་གྱི་དཀར་མཛེས་ཁུལ་གསར་པ་སྐྲུན་ཆེད་རང་ནུས་གང་ཡོད་བཏོན་དང་འདོན་བཞིན་ཡོད་ལ། ཚང་མའི་ལག་ཏུ་མི་རིགས་མཐུན་སྒྲིལ་ཆེན་པོའི་བཀྲ་ཤིས་ཁ་བཏགས་དཀར་པོ་རེ་བཏེགས་ནས་རྒྱལ་སྟོན་དུས་ཆེན་དང་ཚོགས་ཆེན་ཉི་ཤུ་པ་འཚོག་པར་བསུ་བ་ཞུ་བཞིན་མཆིས་སོ།།