འཆི་མེད་ཚེ་རིང་། 2022-11-30
འཁྲེང་སེམས་རྡུལ་གྱི་མཆུ་སྒྲོས་བསྲིངས་བ་ལ།།
སྐྱ་ཤིག་ཤིག་གི་ཡིད་ཐང་ཆད་ཀྱང་ཆོག།
རྩྭ་ལྗང་ཁོ་ན་འབལ་བའི་གྲིབ་གཟུགས་ལ།།
བར་སྣང་སྒོ་བཞིན་ཕྱེས་པའི་མཆུ་འདབ་གཡོ།།
དུས་བཞིའི་འོད་དང་མུན་པའི་འཐབ་མཚམས་སུ།།
སེར་ལམ་ལམ་གྱི་རྔོག་ཆུང་རླུང་བུས་ཁུར།།
བདག་ནི་ཐོག་ཁང་འདི་ཡི་ཞོལ་ཤད་ན།།
མཆོད་མེའི་ཚབ་ཏུ་བསྒྲོན་པ་ཡིད་ལ་གདུང་།།
ཉི་མའི་སྒོ་དར་འཐེན་པའི་མཚན་ཐུན་རེར།
སྔོ་ལྡེམ་ལྡེམ་གྱི་རྨི་ལམ་གཤོག་ཐོགས་བཞིན།།
རི་དང་སྤྲིན་པ་བསྡོངས་བའི་ཐག་སྒྲ་ཡིས།།
ཐོབ་ཤོར་རླབས་ཀྱི་རྫིང་བུ་ཡར་ཡར་འཐེན།།
མིག་གི་རྩིག་ངོར་ལྡོག་འཕྲོའི་ཟོལ་གྱིས་ནི།།
ནག་ཐིང་ཐིང་གི་ཆུ་ཕྲན་འཕྱོ་བ་ན།།
ཡིད་འོང་རྒྱ་རྙིའི་གསེབ་ན་སྐར་ཚོམ་ལྟར།།
འཚོ་བའི་རིགས་རུས་དག་གིས་རྐང་བྲོ་རྡུང་།།
ཕལ་བའི་པང་དུ་འུར་ཟིང་དར་ཤོམ་གྱིས།།
སྐྱོ་ལྷང་ལྷང་གི་མེ་ལོང་གཙུབ་བརྡར་བྱས།།
ཆུ་ཕྲན་བང་རིམ་སྒྲིག་པའི་ལུས་ཟུངས་ལ།།
སོམ་ཉི་སྒྱུ་མའི་ཕྲེང་རྡོག་རེ་ཟུང་འཐོར།།
དོ་སྣང་ཆེ་བའི་རྩོམ།
རྩོམ་གསར། 10