ལུག་ཁྱུ་རྩྭ་ལ་ཆགས་ཆགས།།

སེམས་པ་ཁྱོད་ལ་ཆགས་ཡོད།།

རྩྭ་ཕྲན་ཚར་ན་མ་གཏོགས།།

ཞེ་སེམས་འགྱུར་ས་མ་རེད།།

ཚིག་དང་ཚིག་གི་བར་དང་།།

སེམས་དང་སེམས་པའི་བར་ནས།།

སྙིང་ལ་བཅངས་པའི་སྙིང་གཏམ།།

ཁྱོད་ལ་ཞུ་ན་འདོད་བྱུང་།།

ཁྱོད་རང་ཕར་ནས་ཡོང་ཡོང་།

ང་རང་གན་ནས་ཡོང་ཡོང་།།

སྐྱེས་ས་སྐྱེས་ཡུལ་མི་གཅིག །

འཛོམས་ས་བྲག་དཀར་ཐང་རེད།།

སྣང་བ་གསེར་སྐུད་ཕྲ་མོ།།

ཁྱོད་ཀྱི་ཕྱོགས་ལ་འཐེན་ཡོད།།

འོ་མ་བཞིན་དུ་འདྲེས་ནས།།

འཚོ་བ་ལོངས་སུ་སྤྱད་འདོད།།

འཚོ་བའི་གྲི་ཁ་རེ་ནས།།

ཚིག་གི་མགོ་རྐང་བསྒྲིགས་ནས།།

སྙིང་གི་དར་སྐུད་འཐེན་ས།།

ཡིད་འོང་བུ་མོ་གནམ་མཚོ།།

འདང་ནི་ལྕགས་ཐག་བརྒྱུས་འདྲ།།

ལྕགས་ལོང་གཅིག་འབྲེལ་གཉིས་མཐུད།།

བརྩེ་བའི་བྲོ་གར་རང་འཁྲབ།།

དུང་བའི་གླིང་བུ་རང་འབུད།།

མེ་ཏོག་མང་པོའི་དཀྱིལ་ནས།།

སེར་ཆེན་འདྲ་བ་མི་འདུག །

བུ་མོ་བརྒྱ་ཡི་དཀྱིལ་ནས།།

ཁྱོད་རང་འདྲ་བ་མི་འདུག །

མེ་ཏོག་སྟོང་ལྡན་ཁུག་ནས།།

དམ་བཅའ་རུས་པའི་སྲུང་བཞིན།།

མེ་ཏོག་མཉམ་བཏུས་མཉམ་འབལ།།

ལ་གླུ་མཉམ་ལེན་མཉམ་འགུགས།།

ཁྲི་གདུགས་ཉི་མ་ལམ་ལམ།།

དཀར་གསལ་ཟླ་བ་དྭངས་དྭངས།།

ཁྱོད་ཀྱི་སེམས་པ་འདྲ་བར།།

ང་ལ་འོད་སྣང་བསྩལ་བྱུང་།།

མཛེས་པའི་མིག་ཟུང་ཀེམ་ཀེམ།།

ཞལ་འཛུམ་དགོད་སྒྲ་ལྷུག་ལྷུག །

སྐྲ་ལོ་ལྕུག་ལྕུག་ལྡེམ་ལྡེམ།།

ཁོ་བོའི་སེམས་ལ་འཇགས་སེ།།

སྙིང་གཏམ་ག་ལེ་ག་ལེ།།

དགོད་སྒྲ་ལྷངས་སེ་ལྷངས་སེ།།

བརྩེ་བ་དྭངས་སེ་དྭངས་སེ།།

ཡིད་ན་གསལ་ལེ་གསལ་ལེ།།

སྐབས་རེར་ཞེ་མཐུན་ཁྱོད་རང་།།

སྨིན་མ་ཀེམ་ཀེམ་འགུལ་བཞིན།།

རྨི་ལམ་ནང་ནས་མཇལ་དུས།།

ང་ཡི་དྲན་པ་རུམ་སོང་།།

ལན་རེར་ང་ཡི་འཚོ་བ།།

ཁྱོད་རང་ཡིན་ཡིན་འདྲ་བོ།།

རྣམ་ཤེས་འཁོར་ས་རེད་འགྲོ།།

ཡིག་ཆུང་འབྲི་ས་རེད་འགྲོ།།

ཚིག་གི་ཁབ་སྐུད་རྒྱུ་ས།།

ཡིད་ཀྱི་ཟབ་ས་ཞིག་ལ།།

གཏན་དུ་གནས་ནས་ཡོད་པ།།

ཁྱོད་རང་མིན་ན་སུ་ཡིན།།

ཁྱོད་ཀྱི་སྙིང་གཏམ་ལྷུག་ལྷུག །

དཀར་པོ་འོ་མར་འདྲེས་ཡོད།།

དཀར་པོ་འོ་མའི་བཅུད་མཆོག །

འབྱུང་བཞིའི་སྟེང་ལ་འཐིམ་སོང་།།

སེམས་པ་ཕར་ཤོར་ཚུར་ཤོར།།

སྤང་ལ་མེ་ཤོར་འདྲ་ལེ།།

བརྩེ་བ་ཤ་ཞག་རུས་ཞག །

དུང་བ་ཉིན་ཡོད་མཚན་ཡོད།