གློག་སྒྲོན་གྱི་གམ་དུ་ཡུན་རིང་ལ་ཉར་བའི།

ཟིན་བྲིས་བཙའ་བའི་ངོས་ལ་མེ་ཏོག་དང་

མགུལ་རྒྱན་མཉམ་དུ།

རེས་གསལ་རེས་མོག་གི་རི་མོ་ཞིག་བྲིས།

རང་ཉིད་ངོས་ཟིན་གྱིན་མེད་སྐབས་སུ་ཡང་།

གློ་བུར་དུ་འཕྲད་ཚུལ་དང་མགྲིན་པ་འགག་ཚུལ།

སྐོམ་པས་གདུང་ཚུལ་སོགས་བྲིས།

ཁང་མིག་ཧ་ཅང་དོག་པོ་ཞིག་གི་ནང་དུ་མི་

བརྒྱ་མི་ཤོང་བ་དང་འདྲ་པོ་འདུག།

འོད་ཁུང་ཧ་ཅང་ཆུང་ངུ་ཞིག་གི་ནང་དུ།

ཉི་འོད་འཆར་ཙམ་ལས་དཀར་འོད་ཁྱབ་

མེད་པ་དང་འདྲ་པོ་འདུག།

ཟྭ་མཆིས་ཤིང་ལྡེ་མིག་མེད་པ་དང་འདྲ་པོ་འདུག།

ངག་འདར་བའི་ཁ་སང་དེ་རིང་། གཙང་པོ་མི་མཐོང་

བའི་ཉིན་མཚན་སོགས་ལ།

བར་ཐག་རིང་བའི་ལྡུམ་རའི་ཕྱོགས་སུ་ལག་པ་

བསྲིངས་ཏེ།

ཁྱོད་ཀྱི་དུས་ཆེན་ལ་རྒྱ་སེ་རྐང་གཅིག་

བཏུ་པར་འདོད།

ཁྱོད་རང་སེམས་པའི་ཕྱི་ནང་ལ་ཆབ་

ཁྲུས་གནང་མཁན་ཡིན་ནམ།

བརྩེ་བ་རུམ་པའི་གྲོང་གསེབ་ཀྱི་བྱིའུ་ཆུང་ཡིན།

མིག་ཟུང་ནག་པོ་ལས་མངོན་འོང་བའི་

རྒྱང་རིང་ཡིན།

སྒེའུ་ཁུང་བརྒྱུད་ནས་སྤྲིངས་བའི་འཕྲིན་པ་རྐང་གཅིག།

ཁེར་རྐྱང་གི་གནས་མལ་ནས་འཚོལ་

འོང་བའི་ན་བུན་རབ་རིབ།

མཚམས་མཚམས་སུ།

གཉིད་ལྕོག་རྒྱག་གིན་པའི་བརྩམས་སྒྲུང་ཐུང་ངུ་།

སྒྲེན་པོར་ལུས་པའི་ལོ་མ་སེར་པོ།