འཇིགས་རུང་མུན་པ་ཡི་གཤོག་པ་ནག་པོ།།

རི་དྭགས་མཚན་མ་ཡིས་ཚལ་བརྒྱར་གཏོར་ཏེ།།

ཚེས་ཆེན་བཅོ་ལྔ་ཡི་ཟླ་འོད་འོག་ནས།།

ཡིད་འོང་ཆུང་འདྲིས་ཤིག་བྲིས་བློ་ཤར་བྱུང་།།

འར་འུར་ཟང་ཟིང་གི་འདུར་རྒྱུགས་ཀློང་ནས།།

ལྷིང་འཇགས་ཞིང་ཁམས་ཤིག་བདག་གིར་བཟུང་སྟེ།།

ཟེམ་ཟེམ་གོམས་བགྲོད་ཀྱི་དབྱངས་ཁུག་རེ་རེར།།

སྙིང་གཏམ་གསེར་སྦྲམ་གྱི་ཐིག་ལེ་འཁྱིལ་ཡོད།།

པད་མའི་བཞིན་རས་ཀྱི་ས་འཛིན་དཀར་པོར།།

གེ་སར་ལོ་ཟླ་ཡི་ཉི་ཟེར་བཀྱེད་དེ།།

ཟོལ་མེད་འཛུམ་མདངས་ཀྱི་དྲོད་ཁོལ་གསེབ་ནི།།

སྨྲེང་བའི་མཆི་ཞགས་ཀྱི་བཞུར་རྒྱུན་ཆགས་ས།།

ཐོ་རེངས་ནམ་དགུང་གི་སྐར་ཆེན་པ་སངས།།

རྒྱུ་སྐར་བྱེ་བ་ཡི་རྒྱལ་པོར་བཀོད་ན།།

མཉེན་ལྕུག་སྐྲ་ལན་ནས་དྲི་ངད་ཐུལ་བའི།།

སྨིན་ལེགས་ན་ཆུང་དེ་ཚངས་སྲས་ལོས་ཡིན།།

སྐྱིད་སྡུག་མི་ཚེ་ཡི་རྒྱུད་མངས་ཕང་འགྲོ།།

འཇམ་མཉེན་སོར་མོ་ཡིས་དལ་གྱིས་དཀྲོལ་ཏེ།།

རྒྱུ་འབྲས་གླུ་ཚིག་ཅིག་གདངས་སུ་བཀུགས་མཁན།།

ལུས་ཕྲ་རྐེད་མེད་མ་སྙིང་ལ་རྗེ་བོ།།

སེམས་ཀྱི་ལྷུན་པོ་ལ་སྤྱང་དང་བྱ་ཁྱི།།

ཁྲེལ་མེད་སྡེར་ཤད་ཀྱི་རྨ་ཁས་རུམ་ཡང་།།

སྙན་འཇེབས་གྲེ་འགྱུར་གྱི་ཁུ་བྱུག་སྔོན་མོས།།

ཆུ་ལ་ཆར་པ་ཡི་སྐྱོ་རོགས་གནང་བྱུང་།།

འཚོ་བའི་འབ་ཟངས་ལ་མི་ཆེན་དཔོན་པོས།།

མི་འདོད་འཇུ་ཐག་ལ་རྟོད་ཕུར་སྦྲགས་ཀྱང་།།

གངས་རི་རྩྭ་ཐང་གི་རི་ཀླུང་བརྒལ་བའི།།

སྙིང་སྟོབས་གོ་ཆ་ལ་ངར་ཁ་བརྟས་མཁན།།

ལྷུན་སྡུག་རབ་དཀར་གྱི་ཟླ་འོད་འོག་ན།།

གཡེང་མེད་གྲིབ་གཟུཊ་ཀྱི་ཆུང་འདྲིས་བྱམས་པ།།

ཡིད་ཀྱི་ཟབ་ས་ན་ཁྲ་ལེར་བཞད་པའི།།

གཡུ་ལོ་འདབ་སྟོང་གི་མེ་ཏོག་ལྷ་མཛེས།།