མགར་ཐང་དཀར། 2021-10-08
དྲ་བའི་ཤུགས་ཀྱིས་ཁོ་བོའི་དཔུང་པ་མནན།།
ཁོ་མོའི་དྲན་པ་མགྱོགས་འགྲོ་རླུང་གིས་ཁྱེར།།
སྣང་བའི་སྒོ་ཆོན་མེད་པའི་གུར་ཆེན་དུ།།
གཅན་གཟན་དུག་གི་ཁ་རླངས་འཕྱུར་ལ་ལྟོས།།
དུས་ཀྱི་ཉི་འོད་ལམ་ལམ་མཁའ་རུ་འཚེར།།
ཁུ་སིམ་ས་འཛིན་ལྟེམས་མེར་འཁྱིལ་ཡོད་སྐད།།
རྐང་གཉིས་ལྟོ་ལ་བྲེལ་བའི་བར་གསེང་ནས།།
རང་མགོ་རྡོ་ལ་རྒྱག་པའི་ཚུལ་འདི་མཚར།།
སྲེད་པ་ཆེ་བའི་མཐོ་རིམ་སྲོག་ཆགས་ཏེ།།
འགྲོ་བ་མི་ཡི་མཚན་ཙམ་འཛིན་པ་འདིའི།།
འདུན་གྱི་རྡོག་ལམ་རྐང་བའི་མ་ནོན་པར།།
དྲྭ་ལམ་འུར་གྱིས་བཀང་འདི་ངོ་རེ་ཚ།།
ངག་ལ་རོལ་མོའི་རམ་དཀྲོལ་ཚང་བ་དང་།།
གདོང་ལ་སྐྱི་མོའི་མདངས་ཙམ་འཛོམས་པ་ལས།།
གནའ་དེང་སྒོར་མོའི་ལུགས་ལ་བརྗེ་བ་ནི།།
རང་སྣང་ཀླད་ཀོར་ཕྱི་ལ་མངོན་པ་ལགས།།
འཇིག་རྟེན་དྲ་བར་མངོན་པའི་དུས་བཟང་འདིར།།
མུ་ཏིག་སྤྱན་ཆུང་ཕུར་ཕུར་བྱེད་ཀྱིན་དུ།།
རིག་པའི་གནས་དང་ལྗོངས་རྒྱུའི་ཁམས་དག་ཏུ།།
ལན་གཅིག་གཟིགས་ཤིག་སྨོན་ལམ་
དཔག་མེད་འབྱུང་།།
ཉ་གང་ཟླ་བའི་འཆར་ནུབ་མ་ཤེས་ཤིང་།།
རྟ་བདུན་དབང་བོའི་དྲོད་ཁོལ་མ་མྱང་བར།།
ཉིན་མཚན་དྲ་བའི་ཞིང་དུ་འགྲིམས་ཙ་ན།།
བདག་སོགས་ཤིའམ་གསོན་ཡོད་འཕྱང་མོ་ཉུག།
མི་རྟག་འཇིག་རྟེན་སྒྱུ་མའི་ཞིང་ཁམས་ཏེ།།
མི་ཚེ་ལན་གཅིག་ལོན་པ་གཅེས་སྤྲས་མཛོད།།
རང་ཉིད་སྒོར་མོའི་བྲན་དུ་གྱུར་བྱས་ན།།
ཁྱོད་ཀྱིས་དྲ་བ་སྤྱོད་དམ་འཕྱང་མོ་ཉུག།
མི་ལ་དགོས་པའི་གཏན་ཚིག་རིང་དུ་རྐྱོངས།།
ཕྱི་མར་ཕན་པའི་ཆོས་ཚུལ་གནད་དུ་ཟུངས།།
དེ་ནི་དེང་རབས་ཅན་ལ་ཆས་སྟངས་ཏེ།།
འབྱོར་བ་མི་རྟག་སྒྲུབ་པའི་ཐར་མདོ་ཡིན།།
ཀྱེ་ཀྱེ་གསོན་དང་བདག་གི་སྙིང་གྲོགས་ལགས།།
ང་ཚོ་ས་ནས་རྩྭ་ལྟར་སྐྱེས་པ་མིན།།
ཡང་ན་མཁའ་ནས་ཆར་ལྟར་བབས་པ་མིན།།
སྐྱེ་བ་སྔ་ཕྱིའི་ཆགས་ལུགས་མི་རྟོགས་ཀྱང་།།
ཟླ་དགུ་ཞག་བཅུའི་ངལ་བ་ཤེས་རན་འདུག།
དྲ་བས་སུ་ཞིག་འཁྲིད་ན་ཁྲིད་དུ་ཆུགས།།
ཁྱོད་རང་དྲ་བའི་བྲན་གཡོག་མ་བྱེད་ཅིག།
འུ་ཚོའི་རིན་ཆེན་མི་ལུས་གཡར་བ་མིན།།
མ་མཐའི་དྲིན་ལན་དེ་ནི་སོད་པར་གྱིས།།
དེ་ནས་སྨོན་ལམ་ཚིག་གིས་བསྡུ་བར་བྱ།།
དྲ་བ་མི་ཡི་བྲན་དུ་འགྱུར་བར་སྨོན།།
གླིང་ལྔའི་བདེ་ལེགས་དཔལ་དུ་བགྲོད་གྱུར་ཅིག།
དྲ་བ་དག་གཙང་ཅན་དུ་འགྱུར་བར་སྨོན།།
མིའི་རིགས་དག་གཙང་ལམ་ནས་རྒྱས་གྱུར་ཅིག།
རྩོམ་གསར། 10