ཆུང་ཆུང་བྱིས་པའི་སྐབས་ལ།

དཀར་ཁུང་ནས་ཟླ་བར་ཅེར་ཞིང་།

སྣུམ་གྱི་ཞུན་མར་འོག་ནས།

ཨ་མའི་རུམ་དུ་གཉིད་ནས་སྒྲུང་ཉན་རྒྱུར་དགའ།

ད་ཆ། དུས་ཚོད་ཀྱིས་གཟུགས་མེད་ལག་པ་

རིང་མོར་བསྲིངས་ནས།

ངའི་ཨ་མའི་དྲན་ཤིང་བརྐུས་ཤིང་།

བརྗེད་ངས་ཆེ་བའི་རྒན་མོ་ཞིག་ཏུ་བཅོམ་ནའང་།

མཚམས་ལན་རེར། ཨ་མས་རྒན་རབས་

མང་པོའི་མིང་ནས་ཟློ་ཞིང་།

སྣང་བ་ཟ་ཟི་ཞིག་ནས་ཐོལ་གྱིས་རྡོལ་འོང་བའི།

ངས་མཐོང་མ་མྱོང་བའི་ཨ་མེས་ཡང་མེས་ཀྱི་གཏམ་རྒྱུད།

སྐྱ་རིས་ཀྱི་ཡོལ་བ་ཞིག་ནས་ཇི་མ་ཇི་བཞིན་དུ་བཤམས་བྱུང་།

མིག་ཟུང་ཟུམ་ཟུམ་གྱིས།

དུས་ཚོད་ཀྱི་གཏུབས་གྲིའི་ཁ་ན་ལྷུང་བའི།

རི་ཚོགས་ལ་ཅེར་དུས། ངའི་ཨ་མེས་ཡང་མེས།

གྱ་གྱུས་འཐེན་པའི་རྐང་ལམ་ཉག་ཕྲ་བ་ཞིག་ན།

ང་དང་རྒྱང་དུ་གྱེས་ཤིང་།

མུ་ལ་མུ་ཁྱུད་ཀྱི་རི་ཚོགས་ཀྱི་ཁོང་གསེང་དུ།

ཁོ་ཚོ་རླུང་བུས་སྤུར་བའི་ཐལ་བར་གྱུར་སོང་།

དེ་ནས་བཟུང་། ཉི་མའི་ཟེར་རིས་ཉི་ཚེ་བ་ལས།

ངས་ཁོ་ཚོ་མཐོང་ཐབས་བྲལ།

ད་ལྟ། ངས་ཙན་དན་གྱི་ཕྲེང་བ་ཞིག་དང་།

དངུལ་གྱི་སྒྲོམ་བུ་ཞིག། ད་དུང་།

གཟི་མིག་ལེབ་མོ་མིག་གསུམ་ཞིག་ལ།

ཐོད་པ་གཏུགས་ནས་ཁོ་ཚོ་དང་ཉེ་བར་

བཅར་འདོད།