དུས་ཚོད་ནི་ཚེ་སྲོག་ཡིན་ཞེས་པའི་ཚིག་འདི་སེམས་ལ་རྒྱུན་དུ་དྲན་བཞིན་འདུགཡིན་ཡང་ཤེས་མེད་ཚོར་མེད་ཀྱི་ངང་ནས་དུས་ཚོད་ནི་ཅི་ལྟར་འདས་པའང་མ་ཤེས་ལ་མཚམས་རེར་རང་ཉིད་ལོ་ཚོད་ཕོ་ལོ་སུམ་ཅུར་ཐོན་ཡོད་པ་རང་ཉིད་ལའང་ཡིད་ཆེས་པ་མ་བྱུང་།ཚེ་སྲོག་གི་རིན་ཐང་ཚོར་བའི་མི་ཞིག་ཡིན་ཕྱིར་མི་ཚེ་ཐུང་ཐུང་ཡིན་རུང་མི་ཚེའི་གོ་རིམ་ཁྲོད་དུ་དོན་སྙིང་ལྡན་པའི་ལས་དོན་མང་པོ་ཞིག་སྒྲུབ་སྲིད།མི་ལ་ལས་དུས་ཚོད་དང་ཚེ་སྲོག་གི་གོ་དོན་ལ་ངེས་ཤེས་ཅུང་ཟད་རྙེད་ཡོད་དུས་མི་ཚེའི་ཕྱེད་ཀ་ཕར་བསྐྱལ་འདུགདུས་ཚོད་དང་ཚེ་སྲོག་ནི་ཐེངས་གཅིག་མ་གཏོགས་ཐེངས་གཉིས་ལ་ཡོད་མི་སྲིད་པས་མི་ལ་ལས་ཐེངས་གཅིག་གི་མི་ཚེའི་འགྲུལ་བཞུད་ལ་ཡང་དམ་འཛིན་བྱེད་ཀྱི་མི་འདུགམི་གཞི་ནས་ཚེ་སྲོག་གི་བརྒྱུད་རིམ་ནི་ཐེངས་གཅིག་ལས་ཡོད་མི་སྲིད་པས་སུ་ལ་མཚོན་ནའང་དེ་ནི་རིན་ཆེན་གྱི་ནོར་བུ་ལྟ་བུ་ཞིག་ཅི་ལ་མིན།དེའི་རྐྱེན་གྱིས་དུས་ཚོད་དང་མི་ཚེའི་བརྒྱུད་རིམ་ལ་བསམ་བློ་ཞིབ་མོ་ཞིག་གཏོང་རྒྱུ་ནི་ཤིན་ཏུ་དགོས་གལ་ཆེ་བ་ཞིག་རེད།
     མི་སུ་ཞིག་ཡིན་ཡང་རྗེས་ཕྱོགས་འཇོན་ཐང་ལྡན་མིན་དེ་ཆུང་དུས་ཀྱི་སློབ་གསོ་དང་ཁོར་ཡུག་ལ་རག་ལས་པ་རེད།རང་ཉིད་ལ་མཚོན་ན་ཆུང་དུས་ཀྱི་ལང་ཚོ་དེ་མཛེས་སྡུག་ལྡན་པའི་ཞིང་གྲོང་ཞིག་ནས་བསྐྱལ་བ་དང་དཀའ་སྡུག་གི་འཚོ་བའི་འོག་ནས་འདབ་ལག་རྒྱས་པ་ཡིན།ལོ་ན་གཞོན་པའི་དུས་སུ་ཕ་མའི་ཁ་ཏ་སློབ་གསོར་ཉན་པ་དང་སློབ་སྦྱོང་ལ་འབད་བརྩོན་བྱེད་པ་ལས་མ་འོངས་པའི་ཕུགས་བསམ་ལ་མནོ་བསམ་གཏོང་མ་ཤེས།དྲིན་ཆེན་ཕ་མའི་དཀའ་སྡུག་གི་རྔུལ་ཆུ་ཕུལ་བའི་བཀའ་དྲིན་འོག་ཡིག་རྨོངས་པའི་ལས་ལས་ཐར་ཏེ་སློབ་གྲྭ་ཆེན་མོའི་ཤེས་རིག་གི་སྐྱེད་ཚལ་ནས་ཤེས་བྱའི་བཅུད་ལ་རོལ་བའི་བསྐལ་བ་བྱུང་།སློབ་ཆེན་མཐར་ཕྱིན་རྗེས་གཏན་འཇགས་ཀྱི་ལས་ཀ་ཞིག་ལ་ལོ་ངོ་དུ་མའི་རྒྱུགས་སྤྲད་ཀྱང་འགྲན་རྩོད་ཀྱི་ཁྲོད་དུ་རང་ཉིད་ཀྱི་ནུས་པ་ལ་ཚད་ཡོད་པ་གཞི་ནས་རྟོགས།ཕམ་སེམས་དང་སྐྱོ་སྡུགཐ་ན་ངས་རང་ཉིད་ལ་ལེ་བདའ་ཡང་གང་མང་བྱས་མྱོང་།དྲི་མེད་ཀྱི་ཞིང་སའི་སེམས་པ་དེ་ལ་བརྩེ་དུང་གི་མྱུ་གུ་འབུས་ནས་བདེ་སྐྱིད་ཀྱི་འཚོ་བ་ལ་ལོ་ལེགས་ཀྱི་འབྲས་བུ་སྨིན་པའི་རེ་སྨོན་བཅོལ་ཡོད་དུས་ཁྲེལ་མེད་ཀྱི་ན་བུན་དང་སེར་བས་བརྩེ་དུང་གི་ལམ་ཕྲན་ལ་ཡང་བར་ཆད་ཀྱི་ཆུ་ལོག་རྒྱུག་པར་བྱས།དེ་དུས་བདག་གིས་མི་ཚེའི་གོ་རིམ་དུ་འཚོ་བ་རོལ་བའི་མི་ཞིག་ཡིན་ན་ཀྱ་ཀྱོག་གི་དོན་དག་མང་པོ་བརྒྱུད་དགོས་ལ།དེ་ནི་མི་ཚེའི་ཆོས་ཉིད་ཅིག་དང་།ཡང་ན་རང་ཉིད་ཀྱི་བསམ་བློ་ཡར་བསྐྱེད་པའི་བརྒྱུད་རིམ་ངེས་ཅན་ཞིག་ཡིན་པ་རྟོགས་སོང་།
     ད་ནི་ཕོ་ལོ་སུམ་ཅུར་སླེབས་སོང་།མི་མང་ཤོས་ཀྱིས་བཤད་ན་ཕོ་ལོ་སུམ་ཅུ་ནི་མི་ཚེའི་གོ་རིམ་ནང་སྐྱེས་ཕོ་རབ་ཞིག་གི་ཆེས་བཟང་བའི་དུས་སྐབས་ཡིན་ཟེར།དོན་དག་གང་ཞིག་ལ་འཕྲད་ཀྱང་རང་ཉིད་ལ་ཡིད་ཆེས་བྱེད་པའི་སེམས་འདུན་དེ་འདོར་མི་རུང་བ་ནི་ང་རང་གིས་བསམ་ན་དོན་བྱ་གལ་ཆེ་བ་ཞིག་རེད།ལོ་ངོ་དུ་མའི་རིང་གི་དཀའ་སྤྱད་སྡུག་རུས་དང་ཡ་རབས་གུས་ལུགས་ཀྱི་རང་གཤིས་འགྱུར་བ་མེད་པ་དེ་རྒྱུན་འཁྱོངས་པའི་མཐར་ད་ནི་རང་ལ་ཡང་རང་གི་བདེ་སྐྱིད་དེ་ཐོབ་ཡོད་པར་འདོད་ཡོད།ཡིན་ན་ཡང་མི་ཚེའི་གོ་རིམ་ཁྲོད་ཆོག་ཤེས་འདོད་པ་དང་རང་ཉིད་ཁོ་ན་ལ་རློམ་ཆོག་པ་ཞིག་ག་ལ་ཡིན།ཁ་བཤད་ཆུ་ཡི་ཝུ་བ།ལག་ལེན་གསེར་གྱི་ཐིགས་པ་ཞེས་པ་ལྟར་མེས་པོ་ཚོས་ང་ཚོ་ལ་གོ་བསྐོན་བློ་འགུག་གི་བསླབ་བྱ་མང་པོ་ཞིག་གནང་ཡོད་པ་རེད་ཨང་།ང་ཚོས་རང་གི་མེས་པོ་རྣམས་ལ་ཐུགས་རྗེའི་ཕྱག་ཟུང་དངོས་གནས་སྦྱར་ཆོག་ཆོག་རེད།བསམ་བློ་གཏོང་ཤེས་པའི་མི་ཞིག་ཡིན་ན་ཁོང་ཚོས་ང་ཚོ་ལ་གསེར་ལས་ལྷག་པའི་ཤེས་རིག་གི་བང་མཛོད་ཅིག་བསྐྲུན་འདུགཡིན་ནའང་བྲེལ་ཟིང་གི་འདུ་ལོང་ཆེ་བའི་ད་ལྟའི་འཚོ་བའི་ནང་ང་ཚོ་ནི་ཅི་འདྲའི་འགྱུར་སླ་བ་ཞིག་དང་ཅི་འདྲའི་བློ་སྤོབས་མེད་པའི་མི་ཚོགས་ཤིག་རེད་ཨང་།ཐ་ན་ང་ཚོས་རང་གི་མེས་པོའི་གསེར་ལས་དཀོན་པའི་ཤེས་བྱའི་བང་མཛོད་དེ་ནི་བདེན་རྫུན་དང་།བཟང་ངན་གང་ཞིག་ཡིན་པའི་ཁྱད་པར་ཡང་འབྱེད་ནུས་ཀྱི་མི་འདུགཕོ་ལོ་སུམ་ཅུར་སླེབས་པའི་དེ་རིང་གཏམ་འདི་དག་ནི་རང་ཉིད་ལ་སྨྲས་པ་ཙམ་ལས་གཞན་ལ་སློབ་གསོ་གཏོང་པའི་ནུས་པ་དེ་ང་ལྟ་བུ་ལ་མི་འདུག་ལ།འདུག་ཀྱང་གཞན་གྱིས་ཉན་པའི་ངེས་པ་ཅི་ལ་ཡོད།གང་ལྟར་བདག་གིས་རང་གི་ལྷད་མེད་ཀྱི་སྒོ་གསུམ་དེ་རང་གི་གཅེས་སུ་འོས་པའི་ཕ་མ་དང་བཟའ་ཚང་།ཡིད་སེམས་མཐུན་པའི་གྲོགས་པོ།འབད་པར་འོས་པའི་ལས་ཀམ་འོངས་པའི་འཚོ་བའི་རེ་སྨོན་བཅས་ལ་འབུལ་འདོད་པ་དང་།རང་ཉིད་ཀྱི་མི་ཚེའི་གོ་རིམ་ལ་བབས་ཆགས་ཤིང་བདེ་སྐྱིད་ལྡན་པའི་མཛེས་སྡུག་ཅིག་བསྐྲུན་ན་འདོད།