སྣེ་གདོང་རྒྱལ་པོས་ཉི་ཆོས་བཟང་པོ་ལམ་ཐག་ལེ་དབར་བརྒྱའི་སར་དོན་དག་གལ་ཆེན་ཞིག་བྱེད་པར་བཏང་ནས་ཉིན་དེ་རང་ལ་ཕྱིར་ལོག་ཐུབ་པ་བྱེད་དགོས་ཞེས་བཤད།
      ཉི་ཆོས་བཟང་པོས་དེ་ནི་ཆེད་མངགས་མི་ལ་དཀའ་ལས་ཁག་པོ་བཟོས་པ་ཞིག་རེད་སྙམ་ནས“རྒྱལ་པོ་རིན་པོ་ཆེ།  ཁྱེད་ཀྱིས་མཁྱེན་གསལ་ལྟར་ང་ཡི་རྐང་པ་ནད་པ་ཡིན་པས་རྐང་པ་ཐང་ཐང་གིས་ཀྱང་ལམ་ཐག་རིང་པོ་དེ་འདྲ་ནས་ཉིན་ལོག་བྱེད་ཐུབ་པ་ཁག་པོ་རེད”ཅེས་ཞུས་པར།
     རྒྱལ་པོ་ཤིན་ཏུ་ཁྲོས་ནས“དེ་ཐག་ཇི་ལྟར་རིང་ཡང་གང་ལྟར་ཉིན་ལོག་ཐུབ་པ་བྱེད་དགོས”ཞེས་བཙན་བཀའ་ཕབ།
       དེས་ན་ཉི་ཆོས་བཟང་པོས“ལགས་སོ།  ལགས་སོ”ཞེས་ཞུས་ནས་སེམས་ནང་སྟ་རེ་རྡོ་ལ་བཞུས་ན་སྐུ་གྱོ ང་ལྕགས་ལ་ཕོག་ཟེར་བའི་དཔེ་ལྟར་རེད་བསམས་ནས་ད་རེས་ཡང་བསྐྱར་སེམས་ནག་ཅིག་བྱ་རྒྱུའི་ཐབས་ཤེས་ཤིག་བསམ་བློ་བཏང་།  དེ་ནས་ཉི་ཆོས་བཟང་པོས་རྒྱལ་པོར“གལ་ཏེ་ཡིན་གཅིག་མིན་གཉིས་ང་འགྲོ་དགོས་ན་རྒྱལ་པོའི་ཆིབས་དྲེལ་དེ་ང་ལ་གཡར་རོགས་གནང་།  དེ་འདྲ་བྱས་ན་རྒྱལ་པོའི་སྐུ་དོན་ལ་སྐྱོན་ཡོང་གི་མ་རེད”ཅེས་ཞུས།
    རྒྱལ་པོས་རྣམ་ཀུན་བཞོན་དྲེལ་དེ་སྲོག་ལས་གཅེས་པ་བྱེད་ཀྱི་ཡོད་ཀྱང་ད་ལམ་དོན་དག་གལ་ཆེ་བས་བཞོན་དྲེལ་དེ་ཉི་ཆོས་བཟང་པོར་མི་གཡར་ཀ་མེད་བྱུང་སྟེ་ཉི་ཆོས་བཟང་པོར“བཞོན་དྲེལ་ཁྱོད་ལ་གཡར་ཆོག    འོན་ཀྱང་རྐུ་ལ་ཤོར་བའམ་བོར་བརླག་སོང་ན་མི་འགྲིག”ཅེས་བཤད།
     ཉི་ཆོས་བཟང་པོས“རྒྱལ་པོ་རིན་པོ་ཆེ།  གལ་ཏེ་རྐུ་ལ་ཤོར་བའམ་བོར་བརླག་ཏུ་སོང་ན་ཇི་ལྟར་བྱེད་དགོས་སམ”ཞེས་དྲིས་པར།
    རྒྱལ་པོས“རྐུ་ལ་ཤོར་བའམ་བོར་བརླག་ཏུ་སོང་ན་ངེས་པར་དུ་སྐྱིན་ཚབ་སྤྲོད་དགོས་པ་མ་ཟད།  དེ་བས་རྩ་འགངས་ཆེ་བའི་དངོས་པོ་སྐྱིན་ཚབ་ཏུ་སྤྲོད་དགོས”ཞེས་བཤད།
    ཉི་ཆོས་བཟང་པོས“ལགས་སོ”ཞེས་ཞུས་ནས་དྲེལ་བཞོན་ཏེ་དོན་དག་བསྒྲུབ་པར་ཐོན།  ཕྱིར་ལོག་ཡོང་བའི་ལམ་བར་ཆུ་བོ་ཞིག་བརྒལ་རྗེས་བཞོན་དྲེལ་དེ་མི་གཞན་ལ་བཙོངས་ནས་རིན་འབབ་རྣམས་རང་ཉིད་ཀྱིས་ལྐོག་ཉར་བྱས།
      ཁྱིམ་དུ་སླེབས་སྐབས་ས་རུབ་ཟིན་ཞིང་།  ཉི་ཆོས་བཟང་པོས་རང་ཉིད་ཀྱི་གྱོ ན་པ་རྣམས་ཆུ་ལ་སྦངས་ནས་གྱོ ན་ཏེ་ཆུ་རལ་འཛར་འཛར་ལ་རྒྱལ་པོའི་དྲུང་དུ་བཅར།
      རྒྱལ་པོས་ཉི་ཆོས་བཟང་པོ་སླེབས་པ་མཐོང་འཕྲལ“བཞོན་དྲེལ་གང་དུ་ཡོད”ཅེས་དྲིས་པར།
     ཉི་ཆོས་བཟང་པོས་གོས་ཀྱི་ཆུ་འཚིར་བཞིན་པར“ལམ་བར་ཆུ་བོ་བརྒལ་དགོས་པས་ཚུར་ལམ་ཆུ་བརྒལ་སྐབས་ཆུའི་དཀྱིལ་དུ་བཞོན་དྲེལ་ཚིགས་བུད་ནས་ང་ཆུ་ནང་དུ་ལྷུང་བ་དང་བཞོན་དྲེལ་ཆུས་ཁྱེར་ནས་འཇུ་ཐབས་མ་བྱུང་།  སྟབས་ལེགས་པ་ཞིག་ལ་ང་རང་ཆུས་མ་ཁྱེར་ཙམ་བྱུང”ཞེས་ཞུས།
      རྒྱལ་པོ་ཁོང་ཁྲོ་ལངས་ནས་སྐད་ཤུགས་ཆེན་པོས“ཁ་ཚུམས་ཤིག ཁྱོད་ཀྱིས་མ་རུང་བ་ཞིག་བྱས་པ་ཐག་གིས་ཆོད”ཅེས་བཤད་པར།
    ཉི་ཆོས་བཟང་པོས“ཨ་ཙི།  རྒྱལ་པོ་རིན་པོ་ཆེ།  བཞོན་དྲེལ་ཆུ་རགས་རྒྱག་སྐབས་ཚིགས་བུད་དེ་ཆུས་ཁྱེར་བ་ལས་ང་ལ་ལན་ཁག་གང་ཡང་མེད”ཅེས་བཤད།
     དེས་ན་རྒྱལ་པོའི་བསམ་པར་དེ་རང་རེད།  ཉི་ཆོས་བཟང་པོར་ལན་ཁག་མི་འདུག    འོན་ཀྱང་རྩིས་མ་བརྒྱབ་པར་རང་དགར་བཞག་ན་མི་འགྲིག་བསམས་ནས་ཉི་ཆོས་བཟང་པོར“གང་ལྟར་གང་འདྲ་བཤད་ཀྱང་རུང་ཁྱོད་ཀྱིས་དྲེལ་གྱི་སྐྱོན་ཚབ་སྤྲོད་དགོས་པ་དེ་སྔ་ས་ནས་ཁ་དན་ཡོད”ཅེས་བཤད།
     ཉི་ཆོས་བཟང་པོས“ལགས་སོ།  རྒྱལ་པོ་རིན་པོ་ཆེ”ཞེས་ཞུས་ནས་རང་ཁྱིམ་དུ་ལོག་རྗེས་གནས་ཚུལ་རྣམས་རང་གི་ཕ་ལ་བཤད་ནས་ཐབས་གྲོས་བྱས།
     དེའི་ཕྱི་ཉིན་རྒྱལ་པོ་འཆམ་འཆམ་བྱེད་པར་ཕྱི་ལ་འགྲོ་སྐབས་མགོ་བོ་དུང་ལྟར་དཀར་བའི་རྒད་པོ་ཞིག་གིས་ལུས་སྟོབས་རྒྱས་པའི་གཞོན་པ་ཞིག་སྒལ་པར་ཁུར་ནས་ཡོང་བ་མཐོང་།  ཞིབ་པར་ལྟ་སྐབས་དེ་ནི་ཉི་ཆོས་བཟང་པོའི་ཕས་ཉི་ཆོས་བཟང་པོ་སྒལ་པར་ཁུར་ཡོང་བ་ཤེས།  རྒྱལ་པོ་ཁོང་ཁྲོ་ལངས་ནས“གུས་ཞབས་མེད་པའི་ལས་ཀ་དེ་འདྲ་ཅི་རེད”ཅེས་གཤེ་གཤེ་བཏང་།
     ཉི་ཆོས་བཟང་པོས་དལ་པོའི་ངང“ང་རྐང་པ་ན་བས་ཕས་སྒལ་པར་ཁྱེར་ནས་སྨན་པ་ཞིག་འཚོལ་བར་འགྲོ་རྩིས་ཡོད”ཅེས་བཤད།
    རྒྱལ་པོས་མིག་འབུར་ཚུགས་སུ་བལྟས་ནས“གང་བྱུང་མང་བྱུང་མ་ཤོད། འཛམ་གླིང་ཐོག་དངོས་པོ་ཁྲི་སྟོང་མང་པོ་ཡོད་ཀྱང་རྩ་བ་ཆེ་ཤོས་ནི་པ་ཕ་ཡིན།རྐང་པ་ན་རུང་དེ་འདྲ་བྱས་ན་ག་ལ་འགྲིག”ཅེས་བཤད།
     ཉི་ཆོས་བཟང་པོས་“རྒྱལ་པོ་རིན་པོ་ཆེ།  ཐུགས་བདེན་ཐུགས་བདེན”ཞེས་བཤད་ནས་པ་ཕའི་སྒལ་པ་ནས་མར་བབས་ཏེ་མཉམ་དུ་སོང་།
    དེའི་ཕྱི་ཉིན་ཉི་ཆོས་བཟང་པོས་བོང་བུ་ཞིག་ཁྲིད་ནས་རྒྱལ་པོའི་སར་ཡོང་སྐབས་རྒྱལ་པོས“ཁྱོད་ཀྱིས་བོང་ཁྲིད་ཡོང་ནས་གང་བྱ་རྒྱུ་ཡིན”ཞེས་དྲིས་པར།
   ཉི་ཆོས་བཟང་པོས“རྒྱལ་པོའི་བཞོན་དྲེལ་གྱི་ཚབ་འབུལ་བར་ཡོང་བ་ཡིན”ཞེས་ཞུས།
    རྒྱལ་པོ་སླར་ཡང་ཁོང་ཁྲོ་ལངས་ནས“ཁྱོད་ཀྱིས་ཅི་ཤོད་ཀྱི་ཡོད་དམ”ཞེས་དྲིས།
    ཉི་ཆོས་བཟང་པོས“རྒྱལ་པོས་ང་ལ་བཞོན་དྲེལ་ལས་ཀྱང་རྩ་འགངས་ཆེ་བའི་དངོས་པོ་ཞིག་སྐྱོན་ཚབ་སྤྱོད་དགོས་གསུངས་བྱུང་།  ང་ཡིས་བསམ་བློ་ཡང་ཡང་བཏང་མཐར་དྲེལ་ལས་རྩ་བ་ཆེ་བ་ནི་བོང་བུ་རེད་འདུག    གང་ལགས་ཟེར་ན།  བོང་བུ་ནི་དྲེལ་གྱི་པ་ཕ་རེད།  རྒྱལ་པོས་གསུངས་པ་ལྟར་འཇིག་རྟེན་ཐོག་དངོས་པོ་ཁྲི་སྟོང་མང་པོ་ཡོད་ཀྱང་རྩ་བ་ཆེ་ཤོས་ནི་པ་ཕ་རེད།  ངས་བོང་བུ་འདི་དྲེལ་གྱི་སྐྱིན་ཚབ་ཏུ་ཕུལ་ན་ཡག་ཤོས་རེད་བསམ་གྱི་འདུག    རྒྱལ་པོ་རིན་པོ་ཆེ།  ཞལ་དན་ཚིག་ལ་གནས་པ་གནང་རོགས་གནང”ཞེས་ཞུས་པར།
   རྒྱལ་པོ་གང་ཤོད་འདི་ཤོད་མེད་པར་གྱུར་ཏེ་བོང་བུ་དེ་མ་ལེན་ཐབས་མེད་བྱུང་།