རང་བྱུང་ཁོར་ཡུག་སྲུང་སྐྱོང་ཞེས་པའི་སྟོང་སྐད་དེ་འབྲུག་སྒྲ་བཞིན་མཆེད་ཀྱང་། དོན་ལ་མནོ་བསམ་བཏང་ན་མདོ་དབུས་མཐོ་སྒང་གི་མཁའ་དབུགས་སླད་མེད་།སྤང་ཐང་གཙང་མ། ཆུ་ཀླུང་དྭངས་མོ། རྫ་རི་གངས་རི། སྨན་སྣ་རྩ་ཆེན། གཏེར་ཁ་སྣ་ཚོགས། མཐོ་རིམ་སྲོག་ཆགས། ནགས་ཚལ་འཐུག་པོ་རྣམས་མིང་གི་ལྷག་མར་གྱུར་བཞིན་པ་འདི་རེད། ས་སྒང་འདིའི་སྟེང་ནས་དབུགས་ལྡན་ཡོད་དོ་ཅོག་ཅིས་ཀྱང་འཚོ་དགོས། ང་ཚོས་རང་བྱུང་ཁམས་ཀྱི་སྣོད་བཅུད་ཀྱི་རྟེན་འབྲེལ་ལ་མ་བརྟག་པར་ཕྱིའི་ཁོར་ཡུག་གི་རྫ་རི་དང་། སྤང་ཐང་། ཆུ་ཀླུང་། གཏེར་ཁ། ནགས་ཚལ་སོགས་གཅོད་འབྲེག་དང་། དཀྲུགས་བསྙོགས། གཏོར་བཤིགས། བསྔོགས་འདོན་བྱས་པས་ས་འགུལ། ཆུ་འཕྱུར། མེ་འབར། རླུང་ལྡང་བས་ཕྱིའི་ཁོར་ཡུག་གི་མཛེས་སྡུག་ལ་གནོད་རྐྱོན་ཐེབས་པར་མ་ཟད། ནང་བཅུད་ཀྱི་འགྲོ་བ་མི་སོགས་མང་བོ་མང་བོ་ཞིག་གི་འཚོ་གནས་དང་གཅེས་སྲོག་འབྱུང་བཞིའི་ནང་དུ་འཐིམ་དང་འཐིམ་བཞིན་ཡོད་པ་ལ་བསམ་གཞིག་མི་བྱེད་པར་ཕངས་མེད་དུ་བཞག་སྟེ་འདོད་རྔམ་ཅན་མང་པོས་ས་འོག་གི་གཏེར་སྣ་དང་། ས་སྟེང་གི་སྐྱེ་དངོས་ཡོད་ཚད་བསྔོགས་འདོན་དང་གཅོད་འབྲེག་བྱས་ནས་ཚར་སོང་ན་ས་སྒང་འདིའི་སྟེང་ནས་ཇི་ལྟར་འཚོ། དེའི་ཕྱིར་བླ་མ་དང་། དཔོན་པོ། སྤྲུལ་སྐུ། དགེ་རྒན། སློབ་མ། སྨྱུག་ཐོགས་པ། མདོར་ན་བོད་པ་ཞིག་དང་མི་ཞིག་ཡིན་ཕྱིན་ཁོར་ཡུག་སྲུང་སྐྱོང་ཕྱོགས་ལ་རང་ནུས་ཅི་ཡོད་འབུལ་རན་ཡོད། རན་ནས་མི་ཚད་འཕྱིས་སོང་། ས་སྒང་འདིའི་སྟེང་ནས་ངེས་པར་དུ་ང་ཚོ་འཚོ་དགོས་པས་དྭངས་གཙང་གི་ཁོར་ཡུག་ཞིག་བསྐྲུན་རྒྱུ་དེ་མིའི་རིགས་ཀྱི་འོས་འགན་ ཞིག་ཡིན་པ་ཤེས་དགོས།