སེ་ལེན། ཁྱོད་སར་ཉི་མ་ནུབ་རི་བརྒལ་ནས་ཡོད་ཚད་མག་མོག་ཏུ་གྱུར་སོང་ངམ། བྲེལ་ཟིང་ཆེ་བའི་མི་ཚོགས་དག་རང་ཁྱིམ་དུ་ལོག་ནས་ཡོད་ཚད་ལྷིང་འཇགས་སུ་གནས་ཨེ་བྱུང་། ངས་མིག་ཟུང་སྒེའུ་ཁུང་ལ་གཏད་ན། ཟླ་འོད་དང་འདྲ་བའི་སྒེའུ་ཁུང་ཐད་ཀྱི་གློག་འོད་དེ་ཙམ་ལས། གཞན་གང་ཡང་མཐོང་ལམ་དུ་མི་འདུག། སྒེའུ་ཁུང་འགྲམ་གྱི་གློག་འོད་དེ་ཤིན་ཏུ་གསལ། དེས་ངའི་ནང་སེམས་ཀྱི་སྐྱོ་བའི་སྨུག་སྤྲིན་དག་གཡོ་འགུལ་ཏོག་ཙམ་བཏང་བྱུང་།

སེ་ལེན། ད་སྐབས་ང་རང་ཧ་ཅང་ཁེར་རྐྱང་ཡིན་པ་ཚོར་བྱུང་། ཁེར་རྐྱང་གི་ཚོར་ཤེས་ཡན་པོ་དེ་ནི། གཤོག་པ་ཐོགས་པའི་བྱིའུ་ཞིག་དང་མཚུངས།མཐོངས་ཡངས་ཀྱི་ནམ་མཁའ་རུ་འཕུར་གྱིན། སྐྱོ་སྣང་གི་སྨུག་སྤྲིན་རབ་རིབ། ངའི་ནང་སེམས་ཀྱི་ཞིང་སར་དྲུད་བྱུང་།

སེ་ལེན། ང་ལ་ལྷིང་འཇགས་ཀྱི་གཙང་པོ་ཞིག་ཡོད་ན་སྙམ་བྱུང་། གཙང་པོ་དེའི་ཁར་རང་དབང་གི་ཤ་བ་གཉིས་ཀྱིས་དྭངས་གཙང་གི་རྨི་ལམ་ཞིག་མཉམ་དུ་རྨི་བཞིན། བདེ་སྐྱིད་ཀྱི་འདུ་འཛོམས་ལ་ལན་ཆགས་ཀྱི་ཉེ་ཞོ་མེད་པར། བརྩེ་འདང་གི་རྨི་ལམ་རིང་མོ་དུས་གཏན་དུ་རྨི་ན་བསམ་བྱུང་།

སེ་ལེན། ཁྱོད་ཀྱིས་ང་ལ་ཅི་ཞིག་གནང་ཐུབ། དམིགས་པ་མེད་པར་ཅི་ཞིག་གི་ཆེད་དུ་འདུར་རྒྱུག་བྱེད་ཀྱིན་པའི་སེམས་པ་འདི། ལན་ཅིག་སྡོད་ཐུབ་ནུས་སམ། སྙིང་ཉེ་གང་དེ་ལ་འགྲོགས་པའི་འཚོ་བ་ལས་གཞན་རྣམས། སྐྱིད་སྣང་གི་ཚོར་ཤེས་དབེན་པའི་གྱོན་པ་འདི་ལན་ཅིག་ཕུད་ཐུབ་ནུས་ཨང་།

སེ་ལེན། ང་སྨྲ་བ་མེད་པར་ལྷིང་འཇགས་ཀྱི་འཚོ་སྙིང་བྲོ་སོང་། ཁྱོད་ཀྱིས་ནུས་མཐུ་གང་ཞིག་གིས། ང་ལ་ལྷིང་འཇགས་ཀྱི་འཚོ་བ་ཞིག་གནང་རོགས།གལ་ཏེ་དེ་ལྟར་ནུས་པ་ཡིན་ན། ངས་ཁྱོད་ལ་བརྩེ་དུང་སྟེར་ཆོག། འབྱོར་ཕྱུག་སྟེར་ཆོག། སྙན་གྲགས་སྟེར་ཆོག། ཐ་ན་གདོས་བཅས་ཀྱི་ལུས་ཕུང་འདི་ཡང་ཁྱོད་ལ་སྟེར་ཆོག། ང་ལ་སེམས་པ་ཞིག་གནང་རོགས། ལྷིང་འཇགས་ཀྱི་སེམས་པ་ཞིག་གནང་རོགས། ཅི་ལ་ཡང་རེ་དོགས་མི་དགོས་པའི་སེམས་པ་ཞིག་གནང་བས་འཐུས་སོ།།

སེ་ལེན། ངས་ཁྱེད་རང་ངོ་མི་ཤེས་པ་བདེན་ནམ། ཁྱེད་རང་མ་འོངས་པར་ང་དང་ཐུག་འཕྲད་མཆིས་པའི་སེ་ལེན་དེ་ཡིན་ནམ། ངས་ནང་སེམས་ཀྱི་ཞུ་མཆིད་ཁྲི་ཕྲག། ཁྱོད་ལ་བཤད་དོན་ག་རེ་ཡིན་ཨང་། དོན་དམ་དུ་ངས་སྙིང་ཐུབ་ཀྱི་བྱམས་པ་དྲན་དྲགས་པས་ཡིན་ནམ།

སེ་ལེན། ཁྱེད་ཀྱི་ནམ་མཁའ་དང་འདྲ་བའི་མིག་ཟུང་དེ་ཡིས་ང་ལ་གཟིགས་རོགས། ངའི་ནང་སེམས་ལ་ལན་ཅིག་གཟིགས་རོགས། ཚོད་ཚོད་ལ་སྐྱོ་སྣང་གིས་འཚེ་བའི་ནང་སེམས་འདི་ལ་ལན་ཅིག་གཟིགས་རོགས། དེ་ཉིད་སེལ་ཐབས་ཀྱི་ནུས་མཐུ་ཞིག་ཀྱང་གནང་རོགས།

སེ་ལེན། མཚན་མོ་འདི་ཧ་ཅང་ལྷིང་འཇགས་ཡིན་དོན། རེ་དོགས་དང་། ངང་སྒུག་བྲལ་བས་ཡིན་ནམ། སྒེའུ་ཁུང་འགྲམ་གྱི་གློག་འོད་དེ་གཡོ་འགུལ་མེད་པར་ལམ་ལམ་དུ་འཚེར་དོན། འབྱུང་འགྱུར་གྱི་འཚོ་བར་ལྟ་གོན་མི་དགོས་པས་ཡིན་ཨང་། ནམ་ཞིག་གི་ཚེ་ན། ངས་སྙིང་སྡུག་དེ་ཡང་། སྒེའུ་ཁུང་འགྲམ་གྱི་གློག་འོད་འདི་དང་མཚུངས་པར། ཉི་མ་རེ་རེ་ཡི་དུས་ཚོད་འདིར། རྟག་བརྟན་གྱིས་ངའི་རང་ཁྱིམ་ལ་ཤར་ཏེ། ང་ལ་རྨི་ལམ་དང་འདྲ་བའི་ཉམས་སྣང་གི་འཚོ་བ་ཞིག་སྦྱིན་པར་བྱེད་ཨང་།