སེམས་པ་གཉོམ་པོ་འདི་དང་ཁྲེལ་གཞུང་རིང་མོ་འདི། ཕྱི་ཐག་གིས་བར་མེད་བསླུས་པའི་དྲན་པ་འདི་དང་མཚན་མོ་འདི། ཡང་ན་ལེ་བར་ཁྲི་ཡིས་ཆོད་ཀྱང་ནང་སེམས་གཅིག་ཏུ་གླན་པའི་སྐར་ཕྲན་རྡོག་པོ་འདི། ཡོད་ཚད་གནམ་སའི་འདྲེས་མཚམས་སུ་གཙང་པོས་ཁུར་ཞིང་། གཙང་པོའི་གྲང་ངར་གྱིས་མནར་བའི་མི་ཚོགས་ཀྱི་མིག་ཆུ་ཡང་འཁྱག་རོམ་དུ་གྱུར།

མཚན་མོ་འདིར། རྨི་ལམ་གྱི་གཤོག་སྣེ་ཙག་གིས་མ་ཕྱིད་ཀྱང་བརྩེ་སེམས་ཀྱི་མེ་སྟག་ཕྲ་མོ་འདི་ལའང་ཡིད་རྟོན་ཅི། རླུང་བུ་ལྡང་ཐེངས་ཤིག་གིས་སྟོན་ལོའི་འདབ་མའང་ཕྱོགས་བཞིའི་ཕ་མཐའ་རུ་འཁྱམ་ཟིན། སྡོང་སྐམ་དག་གིས་གནོང་འགྱོད་ཀྱི་ཤུགས་རིང་བར་མེད་འཐེན་པ་བཞིན་སློབ་གླིང་འདིའི་གྲུ་ཟུར་ཀུན་དུ་ཁེར་རྐྱང་གིས་འགྲེངས། གློག་འོད་མི་གསལ་བ་ཞིག་གིས་བུད་མེད་རྒྱུས་མེད་ཅིག་གི་དྲན་གདུང་གི་རྣམ་ཤེས་དང་ཞེན་ཆགས་ཀྱི་བང་སོ་བསྲུངས་ནས་ཡུན་རིང་ལུས། ད་ཚོད་ལག་པ་འཁོབ་པའི་མི་ཚོགས་དང་རྣ་འབྱོག་ཕྱིད་པའི་རྒྱབ་གཟུགས། ད་དུང་སྐྱོ་གར་གྱིས་ཡིད་མུག་བྱུང་བའི་ཁེར་རྐྱང་དེ་ཚོས་རེ་རེ་བཞིན་ཕ་མཐའ་མི་གསལ་བའི་ལམ་དེ་བདམས་ནས་ལམ་དུ་ཆས།

མཚན་མོའི་འདིའི་ཟླ་བ་གྲང་ངར་གྱིས་དེད་དེ་སློབ་ཁང་གི་རབ་གསལ་ཁ་རུ་འདར་སུག་བྱེད། ངས་ཉ་གང་ལ་ཉེ་བའི་ཟླ་བ་ཞེས་པའི་དཔེ་དེབ་དེ་ཚར་གཅིག་བཀླགས་རྗེས། དོ་ནུབ། ཟླ་བར་གྲང་ངར་གྱིས་ཅི་ཙམ་མནར་ཡང་སྔར་བཞིན་སྐར་ཚོགས་ཀྱི་སྐྱོ་རོགས་མེད་པ་ཚོར། ཟླ་བས་སུ་ཞིག་ལ་ངང་སྒུག་བྱེད་པ་ཡིན་ནམ། ཏག་ཏག་སྐབས་འདིར་མང་པོས་ཀུ་མུད་ཅེས་པའི་མེ་ཏོག་ཅིག་དྲན་སྲིད་པ་ཤེས་མོད། ངས་ཇི་སྲིད་ཟླ་བ་དང་དུངས་སེམས་གླན་པའི་མི་ཡུལ་གྱི་གཙང་པོ་ཞིག་དྲན་ཡོང་། དྲན་ཐེངས་འདིས་ང་རང་གཞི་ནས་བརྩེ་དུངས་ཀྱི་ཀློང་དུ་བྱིངས་ཤིང་། ངས་ཀྱང་འདི་ལྟའི་ངང་སྒུག་ཅིག་ལ་ཡིད་སྨོན་བྱས་པ་ཡིན།

ཡམས་ཀྱིས་མཐའ་དག་ལྷིང་འཇགས་སུ་བྱས་སམ། ངའི་ཚོར་བའི་བང་རིམ་དུ་གྲང་རླུང་གིས་ཡོངས་སུ་གཙེས་པའི་མཚན་མོའི་འདིའི་མཁའ་དབུགས་ནང་དུ་སུ་ཞིག་གི་མིག་ཟུང་སྐུང་ཡོད་པ་འདྲ། གློག་སྒྲོན་གྱིས་གྲོང་ཁྱེར་གྱི་ཁོར་ཡུག་མོག་པོར་བསྒྱུར་པའི་མཐའ་དང་དབུས། ཟུར་ཀུན་ཏུ་ཡང་སུ་ཞིག་གི་མིག་ཟུང་སྐུང་ཡོད་པ་འདྲ། དྲན་པ་ཉར་ཡོད་པ་འདྲ། སྨོན་འདུན་ཡང་ལྷག་ཡོད་པ་འདྲ།