ཀླད་ཁྱིམ་ན་སྐམ་བཞིན་པའི་ཐ་སྙད་ཅིག་ཡང་བསྐྱར་གླེང་དགོས་བྱུང་། དྲན་ངོགས་སུ་ཡལ་བཞིན་པའི་བརྡ་ཆད་ཅིག་སླར་ཡང་གྱེར་དགོས་བྱུང་། དེ་ནི་སྐད་ཡིག་ལ་དུང་ཞེན་ཡོད་པའི་དབང་གིས་ཡིན། དེ་ནི་ལས་དབང་ལ་སེམས་ཁྲལ་ཡོད་པའི་སྟབས་ཀྱིས་ཡིན།

    ངས་རང་ཉིད་སྙན་ངག་པ་ཞིག་མིན་པ་ཧ་གོ་ཡང་། ངས་བོད་ཀྱི་སྙན་ངག་པའི་མཚན་མོ་ལ་དགའ་པོ་བྱེད་ཀྱིན་ཡོད། ངས་རང་ཉིད་སྙན་ངག་པ་ཞིག་ཏུ་འགྱུར་མི་སྲིད་པ་ཡང་རྟོགས་མོད། ངས་བོད་ཀྱི་སྙན་ངག་པའི་མཚན་མོ་ལ་བརྩི་སྲུང་བྱེད་ཀྱིན་ཡོད། རྒྱུ་མཚན་ནི། སྙན་ངག་གི་ཚེ་བླ་སྲོག་གསུམ་ཕ་སྐད་མ་ཡིག་གི་ལང་ཚོ་ལ་བརྒྱུས་ཡོད། སྙན་ངག་གི་འདས་མ་ད་གསུམ་ཕ་སྐད་མ་ཡིག་གི་འཕྲིན་ལས་དང་འབྲེལ་ཡོད།

    གཅིག་བྱས་ན། སྙན་ངག་ནི་སྡུག་བསྔལ་གྱི་རྒྱ་མཚོ་ལས་སྒྲོལ་བའི་ཐར་བའི་གྲུ་གཟིངས་ཤིག་ཡིན་ན་ཐང་། ཡང་གཅིག་བྱས་ན། སྙན་ངག་ནི་དམྱལ་ཁམས་ཀྱི་གཏིང་རུམ་དུ་འཕེན་པའི་སྡིག་པའི་གཡབ་མོ་ཞིག་ཡིན་ན་ཐང་། གང་ལྟར་ཡང་། འུ་གཉིས་ཀྱི་ལས་དབང་མི་གཅིག་པ་ནི། འུ་གཉིས་ཀྱི་ཚོགས་བསགས་དང་བསོད་ནམས་མ་གཅིག་པས་རེད། འུ་གཉིས་ཀྱི་མདུན་ལམ་མི་གཅིག་པ་ནི། འུ་གཉིས་ཀྱི་ཕུགས་བསམ་དང་དད་འདུན་མ་གཅིག་པས་རེད།

    དེ་ལྟར་ན་ཡང་སྐྱོན་མེད་དེ། ངས་ནི་ནམ་ཡང་ཁྱེད་ཀྱི་ལམ་དབུས་སུ་ཕ་བོང་བསྒྲིལ་མ་མྱོང་ལ། ཁྱེད་ཀྱིས་ནམ་ཡང་ང་ཡི་བགྲོད་ལམ་ནས་བཀག་འགོག་བྱེད་མ་མྱོང་། དེ་ནི་ད་གཟོད་འུ་གཉིས་ལ་དབང་བའི་ཐུན་མོང་གི་སྙན་ངག་རེད། དེ་ནི་ད་གཟོད་འུ་གཉིས་ལ་ཐོབ་པའི་རིས་མེད་ཀྱི་བགོ་སྐལ་རེད།

    དེའི་རྐྱེན་གྱིས། འུ་གཉིས་ཀྱི་བགྲོད་ལམ་མ་གཅིག་ན་ཡང་། ངས་ཁྱེད་ཀྱི་ཚེ་བླ་སྲོག་གསུམ་ལ་བྱིལ་བྱིལ་བྱེད་ངེས་ཡིན། འུ་གཉིས་ཀྱི་དམིགས་འདུན་མ་གཅིག་ན་ཡང་། ངས་ཁྱེད་ཀྱི་འདས་མ་ད་གསུམ་ལ་ཁ་ཡ་བྱེད་ངེས་ཡིན།

སྙན་ངག་པའི་མཚན་མོ། བོད་ཀྱི་སྙན་ངག་པའི་མཚན་མོ། བདག་གིས་ཁྱེད་རང་འདི་ལྟར་གླེང་ན། ཁྱེད་ཀྱིས་བདག་ལ་འཛུམ་མདངས་སྟོན་སྲིད་དམ། བདག་གིས་ཁྱེད་རང་འདི་ལྟར་བསུས་ན། ཁྱེད་ཀྱིས་བདག་ལ་ལག་འཇུ་བྱེད་སྲིད་དམ།

    གང་ལྟར་ཡང་། ཟོལ་མེད་ཀྱི་རིགས་ཞེན་ཞིག་དང་ལྷད་མེད་ཀྱི་བརྩེ་དུང་ཞིག་གིས། སྙན་ངག་བསུ། སྙན་ངག་པ་བསུ། སྙན་ངག་པའི་མཚན་མོ་བསུ། བོད་ཀྱི་སྙན་ངག་པའི་མཚན་མོ་བསུ།