དུས་ཚོད་ཟེར་བ་འདི་དངོས་གནས་ཇི་འདྲའི་མགྱོ གས་པ་ལ་ཨང་། ཤེས་མེད་ཚོར་མེད་ཀྱི་ངང་ནས་ད་ནི་ལོ་མཇུག་གི་དུས་ལ་སླེབས་པ་དང་། གནམ་ལོ་གསར་ཚེས་ཀྱི་བར་ལ་ཏག་ཏག་ཟླ་ངོ་གཅིག་ལྷག་ལས་མི་འདུག
    ང་རང་ཉིད་ལ་མཚོན་ན། ད་ལོ་བཀྲ་ཤིས་པའི་ལོ་ཞིག་ཡིན་པ་དང་། མི་ཚེའི་གོ་རིམ་ཁྲོད་ཀྱི་ཆེས་དོན་སྙིང་ལྡན་པའི་དོན་དག་འགའ་ལ་རྟེན་འབྲེལ་གྱི་འབྲས་བུ་སྨིན་སོང་། ད་ལྟ་རང་ལ་དབང་བའི་བདེ་སྐྱིད་འདི་དག་ནི་རང་གི་ཕ་མ་དང་ཁྱིམ་མི། སྤུན་ཟླ་དང་ཤ་ཉེ་རྣམས་ཀྱིས་དུས་རྒྱུན་རོགས་སྐྱོར་དང་སེམས་ཁུར་བྱས་པ་ལས་ཐོབ་པ་ཡིན་ལ། དྲིན་ལན་འདི་དག་ནམ་ཡང་རང་གི་སེམས་སུ་ཉར་ཡོད།
    ལོ་རེ་རེར་ཕར་བསྐྱོད་ན། རང་གི་སེམས་ལའང་བསམ་ཚུལ་མི་འདྲ་བ་རེ་རེ་སྐྱེས་ཡོང་བ་རེད། ལྷག་པར་ཏུ་མི་ལོ་སོ་གཉིས་ལ་སླེབས་པའི་ད་ལོར་རྒྱལ་ཐང་ཡུལ་ནས་རང་ལ་ཆུང་མ་བླངས་ཏེ་གཉེན་སྒྲིག་གཟབ་རྒྱས་ཤིག་བྱས་ཤིང་། ད་ནི་བུ་ཡང་སྐྱེས་ནས་ཟླ་ངོ་དྲུག་ལ་སླེབས་རན་ཡོད། མི་ནི་ལོ་རེར་བསྡད་ནའང་བསམ་ཇེ་ཤེས་ལ་འགྲོ་བ་ལྟར། ཐོག་དང་པོར་གནས་འདིར་ཡོང་དུས་རང་གི་སེམས་ལ་དམིགས་ཡུལ་ངེས་ཅན་ཞིག་མེད་པར་དུས་ཚོད་མང་ཤོས་ཤིག་རྩེད་འཇོ་ལ་གཡེང་ནས་འགོར་བ་དང་། སེམས་ལ་གནོན་ཤུགས་ཀྱང་མ་སྐྱེས་པར་ད་དུང་ཡིད་ཚིམ་ཚིམ་གྱིས་འཚོ་བ་རོལ་བ་ཡིན། གཉེན་སྒྲིག་བྱས་རྗེས་ད་གཟོད་རང་ལ་འདུག་སའི་ཁང་པ་ཞིག་དང་མ་འོངས་པ་ན་བུ་འཚར་ལོངས་བྱུང་དུས་ཁོར་ཡུག་སྐྱིད་པོ་ཞིག་དང་། བུ་ལ་སློབ་གསོ་བཟང་པོ་ཞིག་བཏང་ནས་ཡ་རབས་ཚུལ་ལྡན་གྱི་མི་ཞིག་བྱེད་དགོས་ཚུལ་སོགས་ལ་མཚམས་རེར་མདང་རྒྱག་པ་ཡིན།
    འཚོ་བའི་གོ་རིམ་ཁྲོད་ཆེས་གོམས་མི་རུང་བ་ནི་ལེ་ལོ་དང་སྒྱིད་ལུག་ཡིན་ལ། འདི་ལ་གོམས་ན་ཕམ་ཁ་མྱོང་བར་ཐེ་ཚོམ་ཅི་ཡང་མེད། རྒྱལ་ཁ་ནི་བརྩོན་འགྲུས་ཅན་དང་གྲ་སྒྲིག་ཅན་ལ་དབང་བས། དེའི་ཕྱིར་རང་གིས་ཀྱང་འཚོ་བའི་ཁྲོད་ནས་གང་ནུས་ཀྱིས་ལྷག་བསམ་བཟང་པོ་བཅངས་ཏེ་ཕྱོགས་གང་ཅིར་འབད་བརྩོན་བྱས་ན་འདོད། ལོ་མཇུག་ལ་སླེབས་པས་བདག་གིས་སེམས་ཅན་ཀུན་བདེ་ཞིང་སྐྱིད་པ་དང་། ནད་མེད་ཚེ་རིང་ཡོང་བའི་བཀྲ་ཤིས་སྨོན་འདུན་ཞུས་པ་ཡིན།