བདག་གི་དྲིན་ཆེན་ཨ་ཕ་ལགས།
འབའ་བ་བློ་བཟང་མགོན་པོ། 2014-06-17
ཁོ་བོ་ལ་མཚོན་ན་ཨ་ཕ་ནི་སྙིང་གཏམ་བརྗོད་སའི་གཏན་གྲོགས། མི་ཚེ་དང་འཚོ་བ་སྐོར་གྱི་བློ་འདྲི་ས། སྤྱོད་བཟང་གི་མིག་དཔེ། བདག་གི་ཨ་ཕའི་མིང་ལ་ཨ་བཟང་ཟེར། ཁོང་ནི་ཞིང་པ་དཀྱུས་མ་ཞིག་ཡིན། འོན་ཀྱང་། ཁོང་ལ་ཞིང་པ་གཞན་དང་མི་འདྲ་བའི་སྙིང་སྟོབས་དང་བསམ་བློ་ཞིག་ཡོད། ངའི་ཨ་ཕ་ཆུང་དུས་སློབ་ཆུང་དང་པོ་མ་གཏོགས་འགྲོ་མ་མྱོང་།ཁོང་རང་ཆུང་དུས་ཨ་མ་ཤི་ནས་ཁྱིམ་གཅིག་གི་ཀ་བ་ལྟར་བུ་འགྱུར་སོང་། ཁོང་གི་ཨ་ཕ་ནི་ཆང་རག་ལ་དགའ་ཞེན་ཆེ་བས་ཉིན་མཚན་མེད་པ་ཆང་འཐུང་། བདག་གི་ཨ་ཕ་ཆུང་དུས་དཀའ་ངལ་ལ་མི་འཛེམ་ནས་ང་ཚོ་ལུང་པ་ནང་གི་མི་ཆེན་པོ་ཚོ་དང་ལྷན་དུ་ས་ཆ་གཞན་ལ་ཟུར་ལས་བྱེད་ས་འགྲོ། ལྷག་པར་ཏུ་སྨར་ཁམས་རྫོང་ལ་ཤིང་ལེབ་བཤག་སར་ཐེངས་མང་པོ་འགྲོ་མྱོང་རེད།
རྗེས་མ་ཨ་ཕས་ང་ཚོ་མིང་སྲིང་གསུམ་པོ་ཕ་ཡུལ་གྱི་སློབ་གྲྭར་མངགས། ＂ཡི་གེ་མ་ཤེས་ན་ལྐུགས་པ་དང་མཚུངས། ལྷག་པར་ཏུ་དུས་རབས་ཉི་ཤུ་རྩ་གཅིག་ལ་ཡི་གེ་མི་ཤེས་ན་དེ་ལས་དཀའ།＂ཁོང་གི་ནམ་རྒྱུན་ང་ཚོ་མིང་སྲིང་གསུམ་ལ་འདི་འདྲ་གསུངས། ངའི་ཕུ་བོ་སློབ་ཆུང་ལོ་རིམ་བཞི་པ་སློབ་ཕྱིན་ནས་ཤང་ནང་གི་ལྟེ་བའི་སློབ་གྲྭར་སྦྱོང་ས་འགྲོ་དགོས། འོན་ཀྱང་། ང་ཚོ་སྤོ་བོ་ལགས་ཀྱིས་ཨ་ཕ་ལ་ཉིན་མཚན་མེད་པར་བཀའ་བཀྱོན་གནང་། ཁོང་གི་ཨ་ཕ་ལ་འདི་འདྲ་གསུངས། "བུ་ཆེ་བ་ནི་ཁྱིམ་ནང་འདུག་མཁན་རེད། ཁོ་རང་ཡི་གེ་སྦྱོང་དང་མ་སྦྱོང་གཅིག་རེད། ཁྱིམ་ནང་ལས་ཀ་འདི་འདྲ་མང་པོ་ཡོད་རེད། ཁོ་ཤང་གི་ལྟེ་བའི་སློབ་གྲྭར་མངགས་ན་རྫི་བོ་ཡང་ཡོད་མ་རེད།" ཨ་ཕས་མགོ་སྒུག་སྒུག་བྱེད་ནས་ལན་གཏན་ནས་འདེབས་མི་ཕོད། ཨ་ཕས་སྤོ་བོ་ལགས་ཀྱི་བཀའ་བརྩི་ནས་ངའི་ཕུ་བོ་སློབ་གྲྭར་མངགས་མ་སོང་།
ཉིན་ཞིག་ཨ་ཕས་ང་དང་སྲིང་མོ་གཉིས་ལ་འདི་འདྲ་གསུངས། "ཕུ་བོ་སློབ་གྲྭ་ནས་ཕྱིར་འཐེན་ཚར་སོང་། ད་ཁྱེད་གཉིས་སློབ་སྦྱོང་ལ་ཧུར་བརྩོན་གནང་དང་ཁྱིམ་ལ་སེམས་ཁྲེལ་གཏན་ནས་དགོས་མ་རེད།" ཁོ་རང་གི་རེ་བ་ཚང་མ་ང་དང་ངའི་སྲིང་མོ་གཉིས་ལ་བཅོལ་ཡོད་པ་གསལ་པོ་རྟོགས་ཐུབ།
ངའི་སྲིང་མོ་ལོ་རིམ་དྲུག་པ་སློབ་མཐར་ཕྱིན་རྗེས་སློབ་འབྲིང་ལ་རྒྱུགས་འཕྲོད་མ་སོང་། མོ་ཡང་ཁྱིམ་ལ་ལོག་ནས་ཞིང་ལས་བྱེད། ང་ཚོ་མིང་སྲིང་གསུམ་པོ་ནང་སློབ་གྲྭར་འགྲོ་མཁན་ང་རང་གཅིག་བུ་མ་གཏོགས་ལྷག་མེད། ང་རང་སློབ་འབྲིང་ལ་འགྲོ་དུས་སློབ་ཡོན་དང་ཟས་རིན་སོགས་སྒོར་མོ་མི་ཉུང་བ་ཞིག་སྤྲད་དགོས། སློབ་ཡོན་ཚང་མ་ཨ་ཕས་དཀའ་ངལ་རྒྱག་ན་ཁྲག་དང་རྣག་ལས་བསགས་པ་རེད། ང་རང་ཡང་སློབ་སྦྱོང་ལ་འབད་བརྩོན་དཔག་མེད་བྱེད་པ་ཡིན།
སློབ་འབྲིང་ལོ་རིམ་གསུམ་པ་ལ་ཐོན་དུས་རྒྱལ་ཁབ་ཀྱི་སྲིད་འཇུ་འགྱུར་ལྡོག་ཆེན་པོ་ཞིག་བྱུང་བ་རེད། སྔོན་མ་སློབ་འབྲིང་མཐར་ཕྱིན་རྗེས་རྒྱུགས་འཕྲོད་ན་རྒྱལ་ཁབ་ཀྱི་བྱ་བ་བཀོད་སྒྲིག་བྱེད། འོན་ཀྱང་། ང་ཚོ་རྒྱུགས་འཕྲོད་ཀྱང་རྒྱལ་ཁབ་ཀྱིས་བྱ་བ་བཀོད་སྒྲིག་གཏན་ནས་མི་བྱེད། ང་ཚོ་ལོ་རིམ་གཅིག་པ་ནང་ལ་འཛིན་གྲྭ་དྲུག་ལྷག་ཙམ་ཡོད། སྲིད་འཇུ་དེས་སློབ་མ་མང་པོ་ཕྱིར་འཐེན་སོང་།
སློབ་འབྲིང་རྒྱུགས་འབྲས་ལེགས་པོ་ཞིག་ཐོབ་འདུག འོན་ཀྱང་། དར་མདོ་དགེ་འོས་སློབ་གྲྭའི་སློབ་ཡོན་ཧ་ཅང་མཐོ། གུང་གསེང་ནང་དུ་ཁྱིམ་མི་ཚང་མ་བེ་ཤ་འཐུ་ནས་ངའི་སློབ་ཡོན་སྒྲུབ། དེ་དུས་ཉི་ཧོང་གིས་བེ་ཤ་ཉོ་བའི་རྐྱེན་གྱིས་རིན་གོང་ཡང་ཧ་ཅང་ཡག་པོ་འདུག། བེ་ཤ་འཐུ་དུས་ཨ་ཕ་ཆར་པ་དང་སེར་བ་ལ་མི་སྐྲག་ནས་ཧུར་བརྩོན་བྱེད་པ་རེད། སྐབས་སྐབས་སུ་ཁོ་རང་སྦྲ་ནག་ནང་དུ་འཛུལ་ཡོངས་ལུས་པོ་ཡོངས་རྫོགས་རླན་པ་རེད་འདུག ཨ་ཕ་ངའི་སློབ་ཡོན་ལ་སེམས་ཁྲེལ་བྱེད་ནས་ཤ་སྐམ་པོ་འགྱུར་སོང་། ཁོ་རང་ནམ་ཡང་ང་ཚོར་སྐྱོ་གདུང་གི་སྡུག་ཡུས་བརྗོད་མ་མྱོང་ལ་སྨེ་ངག་གི་འཁང་ར་དེ་བས་ཀྱང་བྱས་མ་མྱོང་། ཁྱིམ་མི་ཚང་མའི་ལོ་གཅིག་གི་ཡོངས་སྒོ་ཚང་མ་ངས་འཁྱེར་ནས་སློབ་གྲྭར་སློབ་ཡོན་སྤྲད།
ང་རང་ཡང་དར་མདོ་དགེ་འོས་སློབ་གྲྭར་འབད་བརྩོན་བྱེད་ཆེད་མཚོ་སྔོན་དགེ་འོས་སློབ་གྲྭ་ཆེན་མོ་ལ་སློབ་སྦྱོང་བྱེད་རྒྱུའི་གོ་སྐབས་བཟང་པོ་ཞིག་ཐོབ་སོང་། སློབ་ཡོན་ཡང་ལྷག་བསམ་ཅན་གྱི་སྦྱིན་བདག་རྣམས་ཀྱི་གནང་བ་རེད། སློབ་ཆེན་ལོ་རིམ་གསུམ་པ་ནང་སློབ་ཡོན་རང་གི་སྤྲོད་དགོས། ལོ་འདིའི་ནང་ལ་བེ་ཤ་ཉོ་མཁན་ཡང་མི་འདུག ངའི་སློབ་ཡོན་སྟོང་ཕྲག་ལྔ་དེ་ཨ་ཕའི་ཕྲག་ཏུ་འཁུར་པོ་ལྗིད་པོ་ཞིག་འགྱུར་སོང་། ཨ་ཕས་ཉེ་རིང་ཚང་མ་ལ་སྒོར་མོ་གཡར་ས་སོང་བ་རེད། འོན་ཀྱང་། ཨ་ཕས་ཡིད་སྐྱོ་ནི་ཁྱིམ་ལ་ལོག་འདུག
ཉིན་ཞིག་ཨ་ཕ་ངེད་གཉིས་རྫོང་ཐོག་གི་ཉེ་རིང་ཞིག་གི་ཁྱིམ་ལ་སྒོར་མོ་གཡར་སོང་ཡིན། ཁོ་ཚོ་ནི་དུད་ཚང་ཧ་ཅང་ཕྱུག་པོའི་གྲལ་ལ་ཡོད། འོན་ཀྱང་། ངེད་གཉིས་ལ་གཡར་མ་སོང་། ཉེ་རིང་གི་སྒོ་ཕྱིར་ཐོན་འདུག་ཨ་ཕས་ཁོང་ཁྲོ་ལངས་ནས་ངོ་གདོང་ཚང་མ་དམར་པོ་འགྱུར་སོང་། རྗེས་སུ་ངེད་གཉིས་དངུལ་ཁང་ནང་དུ་སྒོར་མོ་སྟོང་ལྔ་གཡར་ཐུབ་སོང་།
ང་རང་ནི་ང་ཚོ་ཕ་ཡུལ་གྱི་སློབ་ཆེན་སློབ་མ་དང་པོ་ཡིན། བོད་རྒྱ་དབྱིན་གསུམ་ཆེད་ལས་འཛིན་མཁན་དང་པོ་ཡིན། དེ་ཚོ་ཚང་མ་དྲིན་ཆེན་ཨ་ཕ་གཙོས་པའི་གཟའ་མི་ཚང་མའི་དྲིན་ཡིན།
སློབ་མཐར་ཕྱིན་རྗེས་ང་རང་ཡང་ནུས་པ་གང་ཡོད་ཀྱི་སྒོ་ནས་ཁྱིམ་ཚང་དབུལ་པོའི་སློབ་མ་རྣམས་ལ་རོགས་སྐྱོར་བྱེད་དང་བྱེད་བཞིན་ཡོད། ཁོ་ཚོའི་ད་ལྟ་ནི་ངའི་འདས་པ་རེད། ངའི་ཨ་ཕ་ཡང་ང་ལ་རྒྱབ་སྐྱོར་ཆེན་པོ་ཡོད། ད་ལྟ་ང་རང་ཨ་ཕ་བྱེད་རྗེས་དྲིན་ཆེན་ཨ་ཕ་དང་ཨ་མ་གཉིས་ཀྱི་དཀའ་ངལ་ད་གཟོད་གསལ་པོ་རྟོགས་བྱུང་། འཛམ་གླིང་ཨ་ཕའི་དུས་ཆེན་ལ་ཨ་ཕ་ཚེ་རིང་ནད་མེད་ཤོག།
དོ་སྣང་ཆེ་བའི་རྩོམ།
རྩོམ་གསར། 10
རྫ་སྨུག་མཁར་གྱི་མཛེས་དཔལ་ཉམས་སུ་མྱོང་།- སླར་མཇལ་བ།
- དུར་ཁྲོད་འོག་གི་དྲན་པ།
- མཐོ་རྒྱུགས་ལ་སྦྱར་བའི་མགུར་མ་དགུ་སེང་དྲུག་འགྱུར།
- ཨ་ཕ་དང་ལུག་ཁྱུ།
- ༄༅།།ཤིང་ཏོག་གི་དྲི་ཞིམ་ཁྲོད་ཀྱི་བོད་ཁང་དམར་པོ།
- གསར་བརྗེ་རིག་གནས་རྒྱུད་འཛིན་གྱིས།། ཆོས་ལུགས་ཡར་རྒྱས
- ཁུ་བྱུག
- ཀྲུང་གུང་ཀྲུང་དབྱང་ཆབ་སྲིད་ཅུས་ཀྱིས་ཚོགས་འདུ་འཚོགས
- ལྷ་སར2021ལོའི“ལྷ་མོའི་ཟློས་གར་འཁྲབ་སྟོན་དུས་ཚིགས”སྤེ