བཤེས་གཉེན་ལགས།
     ཁྱེད་ནི་ཤེས་རིག་གི་བདག་པོ།
     གནས་ལུགས་ཀྱི་དེད་དཔོན།
     མུན་སེལ་གྱི་སྒྲོན་མེ།
     མི་རིགས་ལ་ལམ་སྟོན་གྱི་གསེར་མདོག་གི་ཉི་མ།
     ཁྱེད་ཀྱིས།
     གཞན་ཕན་གྱི་བསམ་པ་ཕྲག་ཏུ་ཁུར།
     ལྷག་བསམ་རྣམ་དག་གིས།
     དཀའ་ངལ་དང་གྲང་འཁྱག་དང་དུ་བླངས་ནས།
     སློབ་ཁང་གྲུ་བཞིའི་ནང་དུ།
     ནག་པང་དང་ས་སྨྱུག་གྲོགས་སུ་བཀུག་ནས།
     གསུང་སྐད་ཞིག་གིས།
     སློབ་མ་ཚོ་མ་རིག་པའི་གཉིད་ལས་དཀྲོགས་ལ།
     བཅུད་ལྡན་གྱི་ཀ་ཁའི་བདུད་རྩི་ཡང་གནང་།
     སྐབས་དེར།
     ང་ཚོ་ནི་གཤོག་རྩལ་མ་རྒྱས་པའི་བྱིའུ་ཆུང་བཞིན།
     མཐོང་སྔོན་གྱི་ལྷ་ལམ་ལ་རྒྱང་ལྟ་བྱེད་བཞིན།
     རེ་སྒུག་གི་ཁུར་པོ་རྒྱབ་ཏུ་ཁུར་ནས།
     མུན་ནག་གི་འཇིག་རྟེན་འདིར་དལ་བུར་འཕྱོ་དུས།
     ཁྱེད་ནི།
     མཁའ་དབྱིངས་སུ་བསྐྱོད་པའི་ཐང་དཀར་བཞིན།
     གཤོག་རྩལ་རྒྱས་ལ།བློ་རྒྱ་ཡང་ཆེ།
     ཁྱེད་ཀྱིས།
     ང་ཚོ་ལ་མཁའ་དབྱིངས་སུ་བསྐྱོད་བྱེད་ཀྱི་
     གཤོག་རྩལ་གནང་།
     གང་ལྟར།
     ཁྱེད་ནི་མི་རིགས་ཤིག་གི་སྤྱི་གཙུག་ན་འཛུམ་པའི་
     གསེར་མདོག་གི་ཉི་མ་སེར་པོ་རེད།