འཇིག་རྟེན་སྔར་བཞིན་མདུན་ནས་མདུན་དུ་བསྐྱོད།།

ཡོ་བྱད་རིམ་བཞིན་གསར་རྟོགས་གསར་བཟོ་མཛད།།

མི་ཡིས་ཉིན་མཚན་མགོ་རྔ་འཁྲུལ་བ་ལས།།

འཕྲིན་ཕྲན་བསླུ་བྲིད་རྒྱུ་མའི་འཇིགས་སྐུལ་རེད།།

འཕྲིན་ཕྲན་བཤད་པར་ཕན་པ་ཅི་ཞིག་ཡོད།།

ཁ་ནས་ཁམས་བདེ་མ་གཏོགས་དོན་དངོས་མེད།།

ཞོགས་པ་ཉིན་གོང་དགུང་མོ་བདེ་ལེགས་འགའི།།

ཉིན་གཅིག་དུས་ཚོད་ཉེར་བཞི་ངང་གིས་བསྐྱལ།།

ཁྱོད་ཀྱི་སྲོག་ནི་སྐར་དང་གློག་ལ་བརྟེན།།

ཁྱོད་ཀྱི་མིག་ནི་མིག་མངས་རྩེད་མོའི་ཁྲོད།།

སྐར་དང་གློག་རྫས་ཟད་པའི་དུས་སྐབས་སུ།།

ཉིན་མཚན་འཁྱོལ་ཐབས་བྲལ་བའི་སྣང་བ་འཆར།།

གཞོན་ནུ་མ་འོངས་གངས་ཀྱི་རེ་ལྟོས་རེད།།

ཡིན་ཡང་གཏན་དུ་འཕྲིན་ཕྲན་སྣོག་ལུགས་ལ།།

འབྱུང་འགྱུར་ཡོད་ཚད་དུད་འགྲོའི་ཉམས་དང་ལྟར།།

གུག་ནས་མགོ་བོ་དགྱེ་བའི་ནུས་མེད་སྙམ།།

སློབ་མས་རིག་གནས་མི་སློབ་འཕྲིན་ཕྲན་སྤྱོད།།

དཔོན་པོས་སྤྱི་དོན་མི་བསྒྲུབ་འཕྲིན་ཕྲན་སྤྱོད།།

གྲྭ་བས་ཁ་འདོན་མི་འདོན་འཕྲིན་ཕྲན་སྤྱོད།།

འཕྲིན་ཕྲན་ཚོགས་པ་འདི་ཕྱིའི་བར་ཆད་རེད།།

ཨ་རོགས་ཁ་བ་ཅན་གྱི་མིང་སྲིང་ཚོ།།

རང་ལུས་རིན་ཆེན་འདི་ལ་བདག་གཅེས་བྱོས།།

མི་ཡུལ་དག་པའི་ཞིང་འདིར་སླེབས་པས་ན།།

རང་གི་ནུས་པའི་ཕྱི་མར་ལམ་ཆས་བསྐྲུན།།

འདི་ནི་མཁས་པ་ཡིན་ཞེས་དཔང་རྟགས་མིན།།

བསམ་པའི་ཆུ་ཚད་མཐོ་ཞེས་དབུ་བསྟོད་མིན།།

རང་གི་ནུས་པའི་གོ་ཚོད་ཐོས་ཚོད་དེ།།

ཀུན་ཕན་སྙིང་གི་དབུས་ནས་ཞེ་ཚིག་ཡིན།

ལི་སྟོད་བྱམས་བརྩེ་སློབ་གྲྭའི༩.༦༼ བྷོ་བསུ་གཞོན། ༽