སྙིང་སྡུག་མ།ཁྱོད་ཀྱི་མངོན་ལྐོག་གི་གསང་ཚིག་དང་ངའི་རེ་སྒུག་གི་ལོ་ཟླ་ལས་གྲུབ་པའི་ལྕགས་ནག་གི་སྒོ་ཟྭ་ལ་ལས་དབང་གི་ཐོ་བས་གཏོར་ཉིན།དེ་རིང་།སླར་ཡང་ཤེས་རིག་གི་ལང་ཚོ་དགོད་པའི་སྐྱེད་ཚལ་འདི་ནས་འུ་གཉིས་གྱེས་གདུང་གི་སྣེ་ནས་འཁྲེང་ཞེན་གྱིས་འཛོམས་བྱུང་།
     གཟའ་སྤེན་པའི་ཕྱི་དྲོ་དེར།ངས་སྡོད་ཁང་གི་དྲ་མ་ལས་ངའི་དྲན་ཤིང་མ་སྟེ་ཁྱོད་མཐོང་བྱུང་།སྐབས་དེར།ངས་ཡུན་རིང་ལ་སེམས་ཀྱི་གཏིང་རིམ་དུ་བསྙལ་བའི་སྙིང་གཏམ་གྱི་སྦྲང་ཆང་ལི་མ་ཁྱོད་ཀྱི་མཛེས་སྡུག་གི་ལང་ཚོའི་སྐྱེམས་སུ་འབུལ་འདོད་ཡོད་ཅིང་།ཁྱོད་ལ་ཐུག་འདོད་ཀྱི་འདུན་པ་དམར་པོ་མེ་རིག་བཞིན་ངང་གིས་འབར།འོན་ཀྱང་།རེ་སྒུག་གིས་མནར་བའི་ངས་གོ་སྐབས་དེ་འཚོལ་དུས།ང་ནི་ཅི་འདྲའི་སྙིང་མེད་དང་ཁྲེལ་ཡོད།སེམས་ཆུང་ཞིག་ཏུ་གྱུར་འདུག་ཨང་།
     དྲན་ཤིང་མ།ཁྱོད་རང་ཨ་གསར་དང་གཞན་རྗེས་ལ་ཕྱོགས་མི་སྲིད་ན།ཁྱོད་རང་དབང་ཐང་དང་སྒོར་མོ་ལ་ཆགས་མི་སྲིད་ན།ངས་སུ་ལ་ཡང་མི་བསམ་པར།ཁྱོད་རང་ཐོབ་འདོད་ཀྱི་སེམས་པ་རྒོད་པོས་ད་ལྟ་སྨོས་ཅི།མ་འོངས་པའི་སྐྲ་དཀར་དང་གཉེར་མའི་གསེབ་ནས་ཀྱང་འུ་གཉིས་ཀྱི་ལང་ཚོའི་གླེགས་བམ་བསྐྱར་དུ་ཀློག་ཅིང་བརྩེ་དུང་གི་གཏམ་རྒྱུད་བདེ་སྨོན་དང་བསྡེབས་ནས་འདོན་སྲིད།
     དེ་ལས་གཞན།འཁྱུད་འཁྱུད་འདྲ་བའི་འུ་གཉིས་ཀྱི་ལག་གདང་དམ་དམ་འདྲ་བ་དོན་དངོས་ཡིན་ཚེ།མི་ཚེ་ཡི་དགའ་དགོད་གྱི་འཚོ་བ་དང་མཉམ་གཅིག་གི་གོམ་འགྲོས་སམ་འགུལ་སྐྱོད་རེ་རེའང་འུ་གཉིས་ཀྱི་ལས་འཕྲོ་ཡིན་ངེས།
     མོས་ང་ལ།ཁྱོད་ཀྱི་ཡ་ཆུང་གི་སེམས་ཀྱི་འཕར་སྒྲའི་གསེབ་ན་ཤག་ཤག་གིས་འབབ་པའི་སྙིང་གཏམ་དེར།སྐྱོ་སྨྲེང་དང་དྲན་གདུང་།ཁེར་རྐྱང་དང་ན་ཟུག་གིས་ཁྱབ་འདུག་ཟེར།
     ཨ་མ།ངའི་ཚེ་སྲོག་གི་གྲུབ་ཆར་གྱུར་པའི་ཁྲག་ཤའཇིག་རྟེན་ལོངས་སྤྱོད་ཀྱི་ཕྱེད་ཀར་གྱུར་པའི་འཕགས་མ།ཁྱོད་ཀྱི་ཞལ་ངོ་དང་མཉེན་ལྕུག་གི་ལང་ཚོ་ནི་འཐུང་ན་མི་ཟད་པའི་སྦྲང་ཆང་ཞིགཁྱོད་ཀྱི་སྙིང་གཏམ་དང་བརྩེ་འཛུམ་ནི་མྱོང་ན་མི་ཚར་བའི་དྲི་བསུང་ཞིགགཞན་ད་དུང་ཁྱོད་ནི་ངའི་སེམས་ཁོང་ན་བཞད་པའི་མེ་ཏོག་རྐང་གཅིག་གོ།