དུས་དང་བསྟུན་ནས་སྟོན་ཁ་དལ་གྱིས་སླེབས་བྱུང་།འོན་ཀྱང་།ཡིད་སྐྱོ་བ་ཞིག་ལ།བདག་གི་དྲན་པའི་ཨ་སྔོན་དབྱིངས་སུ་རྒྱུ་བའི་སྟོན་རླུང་གིས་སྡོང་ལོ་ཐང་ལ་ལྷུང་བའི་དྲན་པའི་སྐྱོ་བ་དེ་མ་ཁྱེར།
     དེ་ནས།བདག་གིས་སློབ་གྲྭའི་སྒེའུ་ཁུང་ནས་ཕ་རོལ་གྱིས་ཡུལ་ལྗོངས་ལ་བལྟས།ཡུལ་གྲུ་འདིའི་རི་ལུང་ཐང་གསུམ་སེར་པོར་འགྱུར་བ་ནི་གསེར་སྐུད་ཀྱིས་བཏགས་པའི་ལྭ་བ་གསར་པ་ཞིག་གོན་པ་དང་ཀུན་ནས་མཚུངས།
     སྐབས་དེར།སྒེའུ་ཁུང་ཕྱོགས་ལ་འཁྱག་སིབ་སིབ་ཀྱི་བསིལ་རླུང་ཞིག་ལྡང་བ་ན།ཉམས་མ་འཇོག་པའི་བདག་གི་སེམས་པ་སྐྱོ་ལྷང་ལྷང་དུ་གཏོང་།རྒྱུན་པར་བདག་ལ་ཤ་ཚ་ཞིང་སྙིང་ཉེ་བ་དང་།ཉིན་མཚན་དུས་དྲུག་ཀུན་ཏུ་དཀའ་ཁག་ལ་མ་འཛེམ་ནས་རྟ་ནོར་ལུག་གསུམ་གྱི་རྗེས་སུ་འབྲངས་པའི་བདག་གི་ཨ་མའི་འཛུམ་མདངས་དང་།བྱམས་བརྩེ་སོགས་ཡོད་ཚད་ནས་ཡོད་ཚད་དེ་མུར་མུ་འབྲེལ་ཟློས་གར་གཏོང་བ་ནང་བཞིན་བདག་གི་ཡིད་ལ་ཝ་ལེར་དྲན་བྱུང་།
     སེམས་སྐྱོ་བའི་བདག་གིས་སྐད་གསང་ཐོན་པོས་སྒེའུ་ཁུང་ནས“ཨ་མ།བདག་གིས་ཁྱེད་རང་དྲན་བྱུང”ཞེས་འབོད་མོད་ཀྱང་།བདག་གིས་དྲན་གདུང་གི་འབོད་པ་དེ་ཨ་མས་མ་ཐོས།དེའི་རྐྱེན་གྱིས་བདག་གི་སླར་ཡང་དྭངས་གཙང་གི་མིག་ཆུའི་མཆོད་པ་ཕ་ཡུལ་གྱི་ཨ་མའི་ཕྱོགས་སུ་བཞུར་དགོས་སོང་།ཨ་མ་དྲན་ནས་རང་དབང་མེད་པའི་དབང་གིས་རྒྱང་རིང་གི་ཨ་མ་ལ་སླར་ཡང་སྐད་ཆ་འདི་རྒྱང་འབོད་མི་བྱེད་ཀ་མེད་དུ་གྱུར།
     བྱམས་བརྩེ་ཅན་གྱི་ཨ་མ་ལགས།ལོ་དུ་མའི་རིང་ལ་ཁྱེད་ཀྱི་ཀ་མ་ལ་ལྟར་དཀར་བའི་ལྷག་བསམ་གྱིས་སློབ་གསོའི་མངར་ཁ་ཚོར་ཐེངས་རེ་རེར།ང་རང་ལ་གཞུང་དྲང་དང་ཀུན་ལ་ཕན་ཐོགས་ཐུབ་པའི་མི་ཞིག་བྱ་རྒྱུ་ཡིན་པའི་ངེས་ཤེས་ཐོབ་སྟེ།དེང་སྐབས།ང་རང་སྤྱོད་ཡོན་གཉིས་ལྡན་གྱི་མི་ཡག་པོ་ཞིག་ཏུ་འགྱུར་རོ།།དེ་ཚང་མ་དྲིན་ཆེན་ཨ་མ་ཁྱེད་ཀྱིས་བདག་ལ་གནང་བའི་ལྷག་བསམ་དཀར་པོ་ཡིན།
     སྐད་ངག་ཁུ་བྱུག་ལྟར་སྙན་ཞིང་།བརྩེ་བ་རྒྱ་མཚོ་ལས་ཟབ་པའི་ཨ་མ་ལགས།ད་ལྟ་འཚོ་བ་དང་ཕྱོགས་གང་ཐད་ཀྱི་ལས་ཀ་ལྕི་མོ་ཚང་མ་ཁྱེད་རང་གཅིག་པུའི་ཕྲག་ཏུ་ལྷུང་རུང་།ཅུང་མ་འགོར་བར་བདག་ནར་སོན་རྗེས།ཁྱེད་རང་སྤྲོ་སྐྱིད་ལྡན་པའི་ལམ་ལ་བསྐྱལ་རྒྱུ་ཁོ་ཐག་ཡིན་ནོ།།ཨ་མ་གཙུག་ཏུ་གུས་པའི་བུ་ཕྲུག་ངས།ཕ་ཡུལ་ཨ་མ་ཡིད་ལ་དྲན་ཐེངས་རེར།ལག་ནས་ཅི་བྱེད་འདི་བྱེད་མ་ཤེས་པར།སྨོན་པའི་ཚུལ་བཞིན་རྩོམ་ཐུང་འདི་བྲིས་སོ།།