གངས་རི་ར་བས་བསྐོར་བའི་སྨན་ལྗོངས་ཀྱི་གནས་མཆོག །
བཅུ་ཕྲག་བསྟན་པ་འཛིན་པའི་ཆོལ་གསུམ་གྱི་མ་ཡུམ། །
སི་བོད་རིག་པའི་སློབ་གླིང་ཕན་བདེ་ཡི་གླིང་ཀ །
ང་དང་ང་ཡི་སློབ་གྲྭར་འཕྲད་པ་དེ་རྨད་སོང་། །
 
མུ་ཁྱུད་གྱང་རས་བསྐོར་བའི་རྒྱ་ཡངས་ཀྱི་སློབ་ར། །
རྔམ་བརྗིད་དཔག་ཏུ་བརྩེགས་པའི་རབ་གསལ་གྱི་ཁང་མིག །
དམར་སེར་ཕྱོགས་བཅུར་བསྐྱོད་པའི་སྐར་ལྔ་ཡི་རྒྱལ་དར། །
ང་དང་ང་ཡི་སློབ་གྲྭའི་མཛེས་ཆོས་སུ་གདའོ། །
 
སྒྲ་ཚད་བཟོ་གསོ་ནང་དོན་བོད་རིགས་ཀྱི་ཤེས་ཡོན། །
གློག་ཀླད་གློག་བཪྙན་སྣ་ཚོགས་དེང་རབས་ཀྱི་ཚན་རྩལ། །
དབྱིན་ཡིག་དབྱིན་སྐད་དག་ནི་ཕྱི་རྒྱལ་གྱི་ཤེས་བྱ། །
ང་དང་ང་ཡི་སློབ་གྲྭའི་བསླབ་བྱ་དེ་ལགས་སོ། །
 
རིགས་མཐུན་གངས་རིའི་རྗེས་འཇུག་དོན་གཉེར་གྱི་སློབ་ར། །
མདོ་དབུས་ཁམས་གསུམ་ཨོ་ལོ་ཁྱུ་ཚོགས་ཀྱི་རྩེད་ར། །
ཆོས་ལུགས་གྲུབ་མཐའ་གཅོད་པའི་བཙུན་ཆུང་གི་ཆོས་ར། །
ང་དང་ང་ཡི་སློབ་གྲྭ་གངས་ཅན་གྱི་ཁྱིམ་གཞིས། །
 
ཆོས་སྲིད་བསྟན་པའི་འབྱུང་གནས་ལྔ་རིག་གི་ཚལ་བཟང་། །
ཡ་རབས་གོམས་སྲོལ་ཟབ་པའི་སི་བོད་ཀྱི་སློབ་གླིང་། །
མི་རིགས་འཕེལ་རྒྱས་སྐྱོང་པའི་ཆུ་གཏེར་གྱི་དེད་དཔོན། །
ང་དང་ང་ཡི་སློབ་གྲྭ་བོད་རིགས་ཀྱི་སྲོག་རྩ། །