གྱེས་པའི་ན་ཟུག
     སྐད་ཅིག་ཙམ་ཡང་འབྲལ་དུ་དབེན་ཞིང་ཞིང་གཞན་དུ་ཡང་ཪྙེད་དཀའ་བའི་།།
     ལས་ཀྱིས་དབང་གིས་རིང་ནས་གྱེས་ཤིང་ཤིང་བའི་ལུས་པོ་སྟོང་བར་ཟད།།
     མི་འདོད་བཞི་བརྒྱའི་ནད་ཀྱིས་མ་གཙེས་གཙེས་པའི་ཡིད་སེམས་རབ་ཏུ་སྐྱོམ།།
     དྲན་གདུང་བརྩེགས་པའི་བང་རིམ་ཁྲོད་ན་ན་ཚའི་འཁུན་སྒྲ་བར་མེད་མཆེད།།
     སྟོན་གྱི་རང་མདངས།
     དྲི་མེད་སྟོན་གྱི་ནམ་མཁའི་གཟུགས་འཛིན་འཛིན་མའི་ཆུ་གཏེར་ཡངས་པ་ཡི།།
     བཟའ་ཤིང་ཡལ་ག་འབྲས་བུས་ལེགས་སྤུད་སྤུད་པའི་ཞིང་གྲོང་ལྷག་པར་མཛེས།།
     མྱོས་པའི་ལུག་ཆུང་གྲུ་གུ་ལྟར་མཆོངས་མཆོངས་ལྡིང་གར་ལ་ཅི་དགར་རྩེན།།
     འཛུམ་གྱིས་ཕྱུག་པའི་རྫི་བོའི་སེམས་སུ་སུ་ལས་རྒྱལ་བའི་རྒྱལ་ཁ་ཞིག།
     སེམས་པའི་གཤོག་འགྱུ།
     རང་སོར་སྡོད་དུ་མི་ཚུགས་སེམས་བྱུང་བྱུང་ཚེ་ལུས་ཉིད་དེ་ཡིས་བདག་འཛིན་བྱས།།
     གཟུགས་མེད་བེམ་པོའི་ངང་ཚུལ་འཛིན་ཡང་ཡང་ཡང་བརྟག་ན་གཟུགས་ཅན་ཉིད།།
     མ་རིག་རྨོངས་པའི་མུན་པའི་བར་ན་ན་ཆུང་ང་ལ་སེམས་ངལ་ཞིག།
     ཅིས་ཀྱང་འདོད་དགུ་ཡིད་ལ་མ་ཐོབ་ཐོབ་ཤོར་ཀློང་ན་ཡིད་འབྱུང་ཆེ།།