༡
དཀྱོག་ཆེན་བརྒྱད་བཅུ་ཟིན་པའི་ལ་མོ་དེ།
རེབ་གོང་ན་སྐད་གྲགས་ཆོད་པའི་རྟ་མཇིང་ལ་རེད།
ལ་རིང་དེས་རྟ་རྒོད་ཀྱི་ཉྭ་ཐག་བཅད་མྱོང་ཟེར།
ཕོ་རྒོད་ཀྱི་དཔུང་པ་བསྣད་མྱོང་ཟེར།
མོ་གཞོན་གྱི་ལྭ་བ་བཤུས་མྱོང་ཟེར།
༢
གལ་ཏེ།ཁྱེད་རང་ཡང་ལ་རྒོད་དེའི་རྩེ་མོར་འཛེགས་ནས།
མིག་གི་རྒྱང་མཐོང་རེབ་གོང་སྟོད་སྨད་བར་གསུམ་ལ་བཙུགས་ཚེ།
ཁྱེད་ཀྱིས་སྟོན་གཞུང་གི་ལོ་ཏོག་མཐོང་ཡོང་།
དགུ་ཆུ་མཐོང་ཡོང་།
སྨུག་སྤྲིན་ལང་ལོང་གི་སྟག་ལུང་དང་ཇོ་མོ་མཐོང་ཡོང་།
མར་ཁུ་བཞིན་ལྟེམས་མེར་འཁྱིལ་བའི
ཁྱུང་དཀར་པའི་གདན་ས་མཐོང་ཡོང་།
ཤར་བླ་བྲང་ཡང་།རབ་བེ་རིབ་བེ་ཞིག་མཐོང་ཡོང་།
༣
ལ་རྩེ་ནས་གོམ་པ་བྱང་ལ་སྒྱུར་དུས།
ཁྱོད་ལ་གསོལ་སྟོན་བཞིན་བཤམས་འདུག་པ་དེ་ནི
སྲན་མའི་ཞིང་ཁ་རེད།
གྲོ་ནས་ཀྱི་འཇིག་རྟེན་ལྗང་ནེམ་མེ་བ་དེ་རེད།
དེ་དག་གི་ཀློང་ན་རླབས་ཀྱི་མེ་ཏོག་བཞིན་བརྩེགས་པ་ནི།
ཧོར་སྙན་བཟང་གི་བཅའ་སྡོད་སློབ་གྲྭ་རེད།
སློབ་གྲྭའི་དགེ་སློབ་གྱི་ཚོགས་རྣམས་དགྱེས་པའི་འཛུམ་ཞལ་རེད།
༤
སྔས་འབོལ་སྟེང་གི་མེ་ཏོག་ལྟ་བུའི
ཕྱི་ནང་གི་བཟོ་བཀོད་དམིགས་བསལ་བ་དེས།
རྫོང་ཐོག་གི་བཅའ་སྡོད་སློབ་གྲྭའི
ངན་མཚང་ཡང་རྗེན་པར་བརྟོལ་ཡོང་།
སྨྱན་མང་གཟུགས་ཀྱི་སློབ་དང་ཁྲིད་དེས།
བྱང་ཆ་དང་བཅས་ཏེ་ང་ཚོའི་མགོ་ལ་ཆུ་འཁྱག་ཟོ་བ་གང་བླུག་སོང་།
ང་ཚོར་ཁོང་འདར་ཡིད་ཚིམས་པ་ཞིག་རྒྱག་ཏུ་བཅུག་སོང་།
༥
མ་ཎི་སྒང་ནས་རྒྱང་ལ་ཅེར་ན།
རྒྱང་རིང་ན་མངོན་ཆུང་གིས་འགྲེང་བའི
ཚོ་འདུ་མིག་ལམ་དུ་མངོན་ཡོང་།
ཚོ་འདུའི་མི་ལོ་ལྔ་བཅུ་ཡང་དྲན་ངོས་སུ་འཁོར་ཡོང་།
ཧོར་ནག་གི་འཕུར་སྟངས་ལ།
ཕྱིར་རྟོག་གི་མིག་མདའ་འཕེན་དུས།
ཧོར་སྙན་བཟང་གི་གྲོ་ནས་སྲན་གསུམ་གྱི
མགོ་འཕང་ལྗིད་ཀྱིས་དུད་འདུག
ལྗིད་ཀྱིས་དུད་འདུག  །