ཀྱེ་ཀྱེ་ཁ་བ་ལྗོངས་ཀྱི་སྤུན་ཟླ་ཚོ།།
སྙིང་ནས་རྡོལ་བའི་ཚིག་གི་ཕྲེང་བ་ཞིག།
ཁྱེད་ཚོར་སྤྲིངས་པས་ཐོས་འཛིན་བུ་ག་དེ།།
བདག་ལ་གཡར་ནས་རེ་ཞིག་གསོན་པར་མཛོད།།
 
ལང་ཚོའི་འདབ་མ་རྒྱས་པའི་དུས་སྐབས་འདི།།
མི་ཚེའི་རྒྱང་ལམ་བགྲོད་པའི་ཐོག་མ་ཡིན།།
མི་ཚེའི་གོམ་པ་དང་པོ་མི་ནོར་བར།།
རིག་པའི་གནས་ལ་འཇུག་དང་ལམ་མཆོག་ཡིན།།
 
ཁྱོད་དང་ང་སྟེ་གངས་རིའི་ན་གཞོན་ཚོ།།
ཁ་བ་ཅན་གྱི་མ་འོངས་བདག་པོ་ཡིན།།
ཧུར་བརྩོན་ཤུགས་ཀྱིས་འབད་པ་མ་བྱེད་ན།།
ཕ་ཡུལ་གངས་ལྗོངས་འཛུགས་སྐྲུན་ཇི་ལྟར་བྱ།།
 
རིག་པའི་རྐང་ལམ་བགྲོད་པའི་སྐལ་བཟང་འདི།།
གསེར་སྲང་སྟོང་གིས་ཉིས་ཀྱང་མི་འདང་བས།།
དགོས་མེད་དོན་གྱིས་ཆུས་ཟོས་མི་གཏོང་བར།།
གཅེས་སུ་འཛིན་དང་ང་ཡི་སྤུན་ཟླ་ཚོ།།
 
བཅུ་ཕྲག་རིག་གཞུང་འོ་མའི་ཆུ་གཏེར་འདི།།
མེས་པོའི་རྔུལ་ཆུ་བསགས་པའི་ནོར་བུ་ཡིན།།
ཕ་ནོར་བུ་ཡིས་ལོན་པར་ཡིད་ཆེས་ཅིང་།།
ཤུགས་ཀྱི་སྒྲིམས་ཤིག་ང་ཡི་ན་ཟླ་ཚོ།།
 
དུས་རབས་གསར་པར་བོད་ཡིག་མི་མཁོ་ཞེས།།
རང་རིགས་མདོ་མེད་འགའ་རེས་འཆལ་གཏམ་བཤད།།
བོད་ཀྱི་ཡུལ་དུ་བོད་ཡིག་མཁོ་ཞིང་བྲིན།།
རང་ཚུགས་རང་གིས་མ་དོར་མདུན་དུ་སྐྱོད།།
ཁམས་ལྷོ་མཐོ་འབྲིང་།