ཆུ་འཛིན་ལང་ལོང་རྩེན་པའི་རྒྱུ་སྐར་ལམ་གྱི། །
     རབ་གསལ་གསེར་མདོག་འཚེར་བའི་བཅུ་གཉིས་བདག་པོ། །
     སྤྲིན་གྱི་བང་རིམ་གཏོར་བཞིན་མཐོན་མཐིང་དབྱིངས་ནས། །
     དྲོད་འཇམ་བདེ་སྐྱིད་འཚོ་བའི་མངར་ཁ་སྩོལ་རོགས། །
    
     མི་གསལ་ནག་ནོག་མུན་པའི་སྨག་རུམ་ཁྲོད་ནས། །
     འཁྱར་འཁྱོར་གོམ་འགྲོས་མི་མཐོང་དཀའ་བ་མོད་པས། །
     རབ་དཀར་དུང་མདོག་འཕྲོ་བའི་ཀུ་མུད་གཉེན་གྱིས། །
     མུ་མེད་རྩྭ་ཐང་ཡངས་པོའི་མུན་པ་སེལ་རོགས། །
    
     ལས་དབང་བསོད་ནམས་དམན་པའི་སྙིགས་མའི་དུས་འདིར། །
     ཉོན་མོངས་དུག་གིས་ཡུལ་ཁམས་ཁ་ལོ་བསྒྱུར་བས། །
     མ་རིག་མུན་པ་སངས་བའི་ཉི་ཟེར་གང་དེས། །
     ལེགས་པའི་ལམ་བཟང་ཞིག་ལ་ཕག་བརྡ་གནང་རོགས། །
    
     རླུང་ནག་འཚུབ་སྒྲ་རྔམ་པའི་དགུན་གྱི་དུས་འདིར། །
     གྲང་རླུང་རྒྱ་སྟག་ངར་མོར་སྙིང་རྗེ་དབེན་པས། །
     ལྷོ་མོན་རྒྱ་རྫོང་ནགས་ཀྱི་གཞན་གསོས་བུ་མོས། །
     སྙན་འཇེབས་སྒྲ་དབྱངས་ཤིག་གིས་དཔྱིད་དཔལ་བསུ་རོགས། །
    
     སྟོང་གསུམ་འཇིག་རྟེན་ཁམས་ཀྱི་ཀློང་ཡངས་འདི་ནས། །
     མི་གཟུགས་འཛིན་པའི་དུད་འགྲོ་མང་དུ་སྣང་བས། །
     བསིལ་ལྡན་ཁ་བའི་ལྗོངས་ཀྱི་ཡུལ་གྲུ་ཀུན་ལ། །
     སློབ་གསོའི་སྦྲང་ཆར་མེ་ཏོག་བར་མེད་སྩོལ་རོགས། །