དྲིན་ཆེན་མ་ལོ།
རྨ་ལྷོ་རྫོང་མི་རིགས་སློབ་འབྲིང་གི་སློབ་མ་ཆབ་བྲག་ཚེ་རིང་དབང་རྒྱལ།
ཁ་ཆར་ཟློས་གར་འཁྲབ་པའི་རྫི་ལུང་གི་འཕྲང་ན།།
དུང་མདོག་སྐྲ་ལོ་བར་མེད་རླུང་ཁ་རུ་བསྐྱོད་ཀྱང་།།
བུ་ངའི་དོན་དུ་རྐང་རྗེས་རྫ་གསེབ་ལ་བཏབས་པའི།།
མ་ལོའི་ཞལ་རས་དྲན་འཛིན་མེ་ལོང་དུ་གསལ་བྱུང་།།

སྦྲ་ནག་རལ་བོར་བསམ་བློ་ཁྱེའུ་བཞིན་འཁུམ་པས།།
མི་ཚེའི་རིན་ཐང་ལྕི་བའི་འདམ་མྱག་གིས་བརྫིས་ཤིང་།།
ལང་ཚོའི་དཔལ་ཡོན་སྦྲ་ནག་གོང་ཁ་ན་ཟད་པའི།།
མ་ལོ་དྲན་པའི་སྐྱོ་གདུང་མིག་ཆུ་རུ་འཁྱིལ་འོང་།།

ལོ་ཟླའི་ཁོར་མོ་ཡུག་གི་དཀའ་སྡུག་གི་འཇིངས་སུ།།
ཡོད་ཚད་ཕངས་མེད་སྦྱིན་པའི་དྲིན་ཆེན་གྱི་མ་ལོའི།།
ཞེན་ཆགས་ལྕི་མོ་བུ་ཡི་རྗེས་ཕྱོགས་ན་ལུས་པས།།
དྲན་གདུང་སྐྱོ་འཕྲིན་མེ་ཏོག་སྨྱུག་རྩེ་རུ་བཞད་སོང་།།མཚོ་ལྷོ་ཁུལ་མི་རིགས་སློབ་འབྲིང་གི་སློབ་མ་འབའ་རྡོ་རྗེ་ཚེ་བརྟན།
རྩྭ་གསེབ་ནས་འཕུར་མྱོང་བའི།
རྒུམ་བུ་འཐུ་མཁན་གྱི་བྱིའུ་དག
བྲག་བར་ནས་ཆར་ལ་བྱོལ་མྱོང་བའི།
བྱིའུ་མ་བུ་དག
མཐའ་འཁོབ་དང་ས་སྲོད་ཀྱི་སྨུག་ལོང་ཁྲོད།
མིག་ཆུའི་གླུ་སྐད་ཀྱ་ཀྱུ།
ལང་ཚོའི་གཤོག་ཟུང་ལ་བརྒྱུས་ནས་ཡོད།
ས་སྲོད་དུ།
ས་སྲོད་ཀྱི་དུས་མཚམས་ལས་མེད་ནའང་།
ས་སྲོད་དུ།
གཞས་གདངས་དག་མཉམ་དུ་དཀྲོལ་ངེས།
རླུང་བུ་ལྟ་བུའི་གཞས་གདངས་དག
འཇའ་ཚོན་ཇི་བཞིན།
ས་སྒང་འདིའི་མཆོད་སྟེགས་གང་ཞིག་གི།
མེ་ལྕེ་ལ་མཁོ་ངེས།
སྟོན་རླུང་གིས་བསྐྱལ་འོང་བའི་ཁ་བ།
ས་སྲོད་ཀྱི་བརྡ་རྟགས་ཀྱིས་ཁུར་འོང་བའི་ས་སྲོད་ཀྱི་ཁ་བ།
གྲ་སྒྲིག་མེད་ནའང་།
དགོས་དབང་གི་གོ་རིམ་ཞིག་ཡོད་པ་ནི།
ཧ་ཅང་ཞིབ་ཚགས་རེད།
ཁ་བ་ལེབ་མོ་རེ་རེ།
སྣང་སྟོང་གི་འཚོ་བའི་ས་སྲོད་དུ།
འཁོར་འཁོར་ནས།
ངའི་ཐ་སྙད་ཀྱི་ཚོགས་སྤྱི་སྒུལ་བྱུང་།
ད་དུང་།
རེས་གསལ་རེས་མོག་གི་བསང་མེ་དང་།
རླུང་བུ་རྒྱུ་མཚམས་ཀྱི་ཕ་རོལ་ནས།
ས་སྲོད་ཀྱི་རྨང་གཞི་ནི།
སེམས་གསོ་ཡིན་པ་ར་སྤྲོད་བྱུང་སོང་།
ས་སྲོད་ནི་རླུང་གིས་དབང་སྒྱུར་བྱེད་པའི་དུས་ཚིགས་རེད།
ས་སྲོད་ནི་བསམ་གཞིག་མེ་རུ་སྦར་བའི་སྟོན་མོ་རེད།
ས་སྲོད་ཀྱི་སྔ་ནུབ་ཏུ།
ས་སྲོད་ཀྱི་ཕྱོགས་ཟུར་རེ་རེ་ནས།
ངེས་ཤེས་འདྲོངས་དཀའ་བ་ནི།
ལུག་ཁྱུ་བརྩི་སྲོལ་ལས།
བོད་པ་རྒན་པོ་ཚོས།
སྐར་མ་བརྩི་སྲོལ་མ་བྱུང་བ་དེ་ཡིན།
ས་སྲོད་དུ།
གླིང་བུ་ཁེར་འབུད་ཀྱི་བུ་ལོ་དེས།
ཉི་ནུབ་ཀྱི་བར་མཚམས་ནས།
ས་སྲོད་དང་སྐྱ་རེངས་གཅིག་ཏུ་བརྒྱུས་ནས་ཡོད།
ས་སྲོད་དུ།
ལྷ་སར་མཇལ་བའི།
ངའི་གཉེན་ཉེ་ཚོ་ཕྱིར་སླེབས་བྱུང་།