སྣང་བྱེད་སྲིད་པའི་སྒྲོན་མེའི་འཛུམ་མདངས་བསུ་བའི།།
སྐྱ་རེངས་ཁུ་བྱུག་སྔོན་མོའི་གསུང་དབྱངས་སྒྲོག་དུས།།
རང་སྣང་སྐྱིད་པའི་རྫི་བོའི་ལུས་ཟོར་ཡང་མོ།།
གྱི་ལིང་རྟ་མཆོག་རྒོད་པོའི་བང་དང་འཁྱུད་ཡོད།།

སྤྲིན་དཀར་ཟེགས་མས་སྐྱུག་པའི་ཆར་ཆུའི་དབུས་སུ།།
གྲང་རེག་འཛིན་པའི་རླུང་གི་སྤུ་གྲིའི་ཁ་ན།།
ནོར་ནག་ཕྱུགས་རྫི་བུ་མོའི་དབྱངས་རྟ་གསོན་པོ།།
རྒྱང་རིང་མཛའ་བོའི་རྣ་བའི་གསོས་སུ་ལྷུང་ཡོད།།

མེ་ཏོག་འཛུམ་མདངས་རྒོད་པོའི་སྤང་རིའི་འདབས་དང་།།
བྱེའུ་ཆུང་དྲུག་འགྱུར་སྒྲོག་སའི་ཁུགས་སོའི་བར་ན།།
གཡུ་གུ་རོག་པོའི་སྒལ་བར་རྒྱབ་རྟེན་འཆའ་བའི།།
ན་ཆུང་རྫི་བོའི་སེམས་གཞས་གཡང་དུ་འཁྱིལ་ཡོད།།

དགོང་སྔོན་གོས་སུ་གྱོ ན་པའི་མཚོ་མོའི་ངོགས་སུ།།
གསེར་བྱ་ངང་པ་གསེར་པོས་འདམ་རྩྭ་ཟ་བཞིན།།
ཞི་བདེའི་ལྷོ་ཕྱོགས་བསྙེག་པའི་འཕུར་སྟངས་བསམས་ན།།
ཡ་ཆུང་སེམས་པ་ཕྲ་མོ་སྨུག་གིས་དཀྲིས་སོང་།།

ཁ་བའི་འདབ་ལོ་འཕུར་བའི་དགུན་གྱི་དུས་སུ།།
མ་ཡུམ་སློབ་གྲྭའི་གླིང་ལ་གྱེས་ཕག་འབུལ་བཞིན།།
གཞན་ཡུལ་འགྲིམ་པའི་གླེང་བརྗོད་འབྲི་ཐེངས་ཤིག་ལ།།
སྙིང་ཆུང་ལུ་གུས་རྩེད་འཇོའི་གར་སྟབས་རོལ་བྱུང་།།

གཡུ་མདོག་གོས་སུ་མནབས་པའི་རྩྭ་ཐང་ཡངས་པོར།།
སྦྲ་གུར་དཀར་ནག་ཚོམ་བུའི་ཕྲ་ཚོམ་བཏབས་ཡོད།།
མ་ཎི་དབྱངས་རྟ་འཐོར་སའི་རང་སྡེའི་ལུང་བར།།
ན་ཆུང་བློ་གསལ་སློབ་བུའི་སྙིང་སྟོབས་བརྟས་ཡོད།།

བྱིས་གླུ་དབྱངས་སུ་འཐེན་པའི་བློ་གསལ་སློབ་བུ།།
འཆད་རྩོད་རྩོམ་པའི་བདུད་རྩིར་རྟག་ཏུ་རོལ་བཞིན།།
དགེ་སློབ་སྐྱིད་པའི་དཔལ་ལ་ཚད་མེད་མྱོང་ཡང་།།
བརྩེ་འཛུམ་མེ་ཏོག་དགོད་པའི་རྩྭ་ཐང་དྲན་བྱུང་།།མར་གད་ཞུན་མས་བྲན་པའི་རི་ཀླུང་ཀུན་ཏུ།།
རྒྱན་བཟང་སྤྲས་པའི་ཕྱུགས་རྫི་ན་ཆུང་བུ་མོས།།
སྙན་འཇེབས་དབྱངས་རྟ་ཐོས་འཛིན་བུ་གར་བརྒྱུད་དུས།།
རྩྭ་ཐང་དྲན་པའི་མགུར་དབྱངས་སྨྱུག་རྩེར་འཐོར་བྱུང་།།