ང་ཚོའི་སློབ་གྲྭ་ནི་རྡོ་སྦིས་གསེར་མོ་ལྗོངས་ཀྱི་དཀྱིལ་རྒྱུད་དེ་སྟག་མགོ་རི་བོའི་འདབས་རོལ་ན་ཆགས་ཡོད་པ་དང་།  མཁས་པའི་དབང་བོ་རྗེ་བཙུན་ཤེས་རབ་རྒྱ་མཚོ་མཆོག་གི་བཞུགས་དགོན་ཏེ་རྡོ་སྦིས་གྲྭ་ཚང་གི་གམ་ན་ཡོད།  ང་ཚོའི་སློབ་གྲྭའི་ཁོར་ཡུག་ཀུན་ཏུ་དབྱར་སྡོང་གཙོར་བྱས་པའི་སྡོང་པོ་སྣ་ཚོགས་ཀྱིས་བརྒྱན་ཡོད་པ་དང་།  སློབ་གྲྭའི་གྱང་ར་ནང་རོལ་དུ་བཙུགས་ཡོད་པའི་དབྱར་སྡོང་ཚང་མ་གྲལ་འགྲིག་ཅིང་ཀྲོང་ངེར་འགྱིང་ཡོད་པ་ནི་སློབ་གྲྭའི་ཕྱི་ནང་སྲུང་བའི་སོ་པ་དང་ཨ་ན་མ་ན་རེད།  དཔྱིད་མགོའི་དུས་སུ་སློབ་ཁྲིད་ཐོག་ཁང་གི་མདུན་ཕྱོགས་ཀྱི་གཡས་གཡོན་དུ་ཡོད་པའི་མེ་ཏོག་ཨ་ག་རུ་ནི་མེ་ཏོག་གཞན་གྱི་སྔོན་དུ་བཞད་ལ།  ཞོགས་པ་དང་དགོང་ཁའི་དཔེ་ཀློག་གི་དུས་སུ་མེ་ཏོག་གི་དྲི་བསུང་ནི་སློབ་གྲོགས་ཚང་མའི་སྣ་ལམ་བརྒྱུད་ནས་འོང་བས།  ཚང་མ་ལ་བདེ་བ་དང་སྤྲོ་སྣང་ཚད་མེད་སྟེར་གྱིན་ཡོད།
     ང་ཚོའི་སློབ་གྲྭའི་ཁོར་ཡུག་ནི་མཛེས་སྡུག་ཡིད་དུ་འོང་བ་ཞིག་ཡིན་པར་མ་ཟད།  དགེ་རྒན་རྣམ་པས་གསུངས་པ་ལྟར་ན།  སློབ་གྲྭའི་ལོ་རྒྱུས་ཀྱང་ཧ་ཅང་རིང་།  སློབ་གྲྭ་འདི་ནི་སྤྱི་ལོ1941ལོར་རྗེ་བཙུན་ཤེས་རབ་རྒྱ་མཚོ་མཆོག་གིས་ཐུགས་དགོངས་ལྟར།  སྐབས་དེའི་རྒྱལ་དམངས་སྲིད་གཞུང་གིས་ཆོག་མཆན་ཐོབ་ནས་བཙུགས་པ་དང་།  སྐབས་དེར་སློབ་གྲྭའི་མིང་ལ“ནང་བསྟན་རྒྱ་ཡིག་ཁྲིད་སྦྱོང་སློབ་གྲྭ”ཞེས་འབོད་སྐད།  དེའི་རྗེས་སུ་ལོ་གང་མང་རིང་གི་དཀའ་སྤྱད་དང་འབད་བརྩོན་བརྒྱུད་ནས་ད་ལྟའི་རྣམ་པ་འདི་ལྟ་བུ་ཞིག་གྲུབ་པ་རེད།
ད་ལྟ་སློབ་གྲྭ་འདིའི་མིང་ལ་རྡོ་སྦིས་དཀྱིལ་སྙིང་སློབ་གྲྭ ་ཟེར་ཞིང་། རྡོ་སྦིས་ལུང་པའི་ལྟེ་གནས་སུ་ཆགས་ཡོད།  དེར་ལུང་པ་འདིའི་སྟོད་སྨད་བར་གསུམ་ནས་ཡོང་བའི་སློབ་མ་ཡོད་པས།  རྡོ་སྦིས་ཡུལ་ཚོའི་ལྟེ་གནས་ཀྱི་སློབ་གྲྭ་གཅིག་པུར་གྱུར་ཡོད།  ད་སྐབས་ང་ཚོའི་སློབ་གྲྭའི་ནང་དུ་བོད་རྒྱ་སྐད་གཉིས་ཀྱིས་སློབ་ཁྲིད་བྱེད་བཞིན་ཡོད་ལ།  འཛིན་གྲྭ་བཅུ་གསུམ་དང་སློབ་མ་བཞི་བརྒྱ་ལྷག་ཡོད།  བོད་ཡིག་དང་རྒྱ་ཡིག་གཉིས་ཀའི་སློབ་ཁྲིད་ལ་བྱང་བའི་ཕུལ་བྱུང་དགེ་རྒན་ཉི་ཤུ་ལྷག་ཡོད་པ་དང་།  གོང་རིམ་ལས་ཁུངས་དང་མགོ་ཁྲིད་རྣམ་པས་ཐུགས་ཁུར་དང་།  དགེ་རྒན་རྣམ་པས་ཧུར་བརྩོན་ལ་བརྟེན་ནས་ང་ཚོའི་སློབ་གྲྭ་མུ་མཐུད་དུ་འཕེལ་རྒྱས་སུ་འགྲོ་ངེས་པ་ནི་ཐེ་ཚོམ་མེད་དོ། །