འབའ་ཆུ་སྔོན་མོས་གསོ་བའི་དཔའ་རྒོད་ཁྱེད།
    འབའ་འབྲུ་སྣ་ལྔས་གསོ་བའི་དཔའ་རྒོད་ཁྱེད།
    འབའ་བའི་སྙན་གྲགས་ཁྱབ་མཁན་དཔའ་རྒོད་ཁྱེད།
འབའ་ཕྲུག་སྙིང་གི་ནོར་བུ་དཔའ་རྒོད་ཁྱེད།
 
    གེ་སར་ལྟ་བུའི་དཔའ་ངར་ཁྱེད་ལ་ཡོད།
    སྲོང་བཙན་ལྟ་བུའི་ཆབ་སྲིད་ཐབས་ལ་མཁས།
    མི་རིགས་ལ་རྒྱ་ལྡན་པའི་མཁས་དབང་ཁྱེད།
ནམ་ཡང་བརྗེད་ཐབས་བྲལ་བའི་དཔའ་རྒོད་ཁྱེད།
 
    དམྱལ་བ་ལྟ་བུའི་དཀའ་ངལ་ཁྱེད་ཀྱིས་མྱངས།
    ཟླ་བའི་ཐོག་གི་ཆུ་གཤེར་ཁྱེད་རང་དཔྱད།
    རིགས་གཅིག་བདེ་སྡུག་ཚང་མ་ཁྱེད་རང་རྟོགས།
སྙིང་སྟོབས་བློ་རིག་ཡོན་ཏན་ཁྱེད་ལ་འཛོམས།
 
    བོད་མི་ཡོངས་ཀྱི་དཔའ་མཛངས་ཁྱེད་རང་ཡིན།
    བོད་མི་ཡོངས་ཀྱི་གཅེས་ནོར་ཁྱེད་རང་ཡིན།
    འཛམ་གླིང་ཐོག་གི་མཁས་དབང་ཁྱེད་རང་ཡིན།
    ང་ཡི་ལམ་སྟོན་སྒྲོན་མེ་ཁྱེད་རང་ཡིན།