ཡུལ་སྐྱིད་པོ་ས་མ་འབྲོག་གི་ཡུལ།།
    ཆབ་སྙེ་གཞུང་མ་ཆུ་དལ་གྱིས་བཞུར།།
    ས་རོང་འབྲོག་ཞིང་ཕྱུག་འཕེལ་ས་འདི།།
    ངའི་ཕ་ཡུལ་སྙེ་གཞུང་ཕྱུག་མོ་ཡིན།།
    ཤར་སྟག་རིར་བཻ་རོའི་སྒྲུབ་ཕུག་བཞུགས།།
    ལྷོ་ཇོ་མོ་མཁའ་རེག་གཟི་བྱིན་འབར།།
    ནུབ་འུ་མིག་ཐོད་རིར་དགེ་བཅུ་འཛོམས།།
    བྱང་ཇོ་མོ་གངས་དཀར་དབུ་རྩེ་དགུང་།།
    བོད་དབྱངས་ཡིག་སྲོལ་འབྱེད་སམ་བྷོ་ཊ།།
    གནམ་མཐའ་མཉམ་ལོ་ཆེན་བཻ་རོ་མཆོག།
    ངའི་མེས་པོ་དྲིན་ཅན་སྙིང་ནས་དྲན།།
    རྒན་ལོ་ལོན་བྱམས་སེམས་ཆེ་དང་གཅིག།
    བུ་བུ་མོ་རིག་སྟོབས་རྒྱས་དང་གཉིས།།
    ཆོས་གྲུབ་མཐའ་རིས་མེད་དར་ས་འདི།།
    ངའི་ཕ་ཡུལ་སྙེ་གཞུང་ཕྱུག་མོ་ཡིན།།
    བསང་དྲི་ཞིམ་ཐོན་གྱི་སྤོས་ལས་འཐུལ།།
    ཡུལ་ཕུ་གསུམ་པར་བརྐོས་འགྲན་ཟླ་མེད།།
    དཀར་ཞོ་ལེགས་བོད་ཤོག་ཁྱད་དུ་འཕགས།།
    ཡུལ་སྙེ་གཞུང་ཕྱུག་མོའི་རྒྱན་ཆ་ཡིན།།
    གཞུ་མར་རྐྱང་བྲག་སྐོར་ཕྱུགས་ཀྱིས་བཀང་།།
    སྲད་དར་རོང་ཟངས་རིར་འབྲུ་དྲུག་སྨིན།།
    ཐོན་བྲེ་ནང་ལྷུན་སྒང་ནགས་ཀྱིས་བརྒྱན།།
    སྐྱིད་སྟེ་གཞུང་ཕྱུག་མོ་གཡང་གིས་ཕྱུག།།