ལེགས་པར་བཤད་པ་ཆུའི་བསྟན་བཅོས།

གུང་ཐང་བསྟན་པའི་སྒྲོན་མེ། 2013-10-10

༄༅། །མཁྱེན་པའི་གཏིང་མཐའ་མི་མངོན་ཞིང༌། །ཐུགས་རྗེའི་ཡིད་བཞིན་ནོར་གྱིས་གཏམས། །མཛད་པའི་རླབས་ཕྲེང་གཡོ་བ་ཅན། །ཐུབ་དབང་ཆོས་ཀྱི་རྒྱ་མཚོ་རྒྱལ། །རྙོག་བྲལ་དྭངས་བའི་ཆུ་རྒྱུན་གྱིས། །ལུས་ཅན་གདུང་བ་ཞི་བྱེད་ལྟར། །ལེགས་བཤད་གསར་པའི་བདུད་རྩི་ཡིས། །བློ་ལྡན་སྐྱེ་བོ་དབུགས་དབྱུང་བྱ། །དྲི་བཟང་བསྒོས་པའི་ཆུ་གཙང་དེ། །མཆོད་ཡོན་ཞབས་བསིལ་བསང་གཏོར་སོགས། །གང་དུ་བྱས་ཀྱང་ལེགས་པ་ལྟར། །ལེགས་བཤད་གཏམ་ནི་ཀུན་ལ་མཛེས། །ལུགས་གཉིས་བླང་དོར་ཤེས་པ་ཡིས། །གནས་སྐབས་མཐར་ཐུག་དེན་འགྲུབ་སྟེ། །བརྟག་པ་ཀུན་ལ་མཁས་པ་ཡི། །དེད་དཔོན་རྒྱ་མཚོར་ཞུཌ་པ་བཞིན། ཆུ་ཕྲན་བརྒལ་བར་མི་ནུས་དེས། རྒྱ་མཚོ་རྐྱལ་གྱིས་ག་ལ་ཆོད། ཡ་རབས་ལུགས་ཀྱང་མི་ཤེས་ན། །ཆོས་ཀྱི་དེ་ཉིད་ཇི་ལྟར་རྟོགས། །གཟུར་གནས་རིག་པ་ལྡན་པ་དེས། །གཞན་གྱི་ཡོན་ཏན་ལེན་པར་བྱེད། སྤང་ལྗོངས་གཙང་མའི་དལ་འགྲོ་མ། །ལྷུང་ལྷུང་ཟེར་ཞིང་མེ་ཏོག་འཐུ། །ངན་པས་ཕྱོགས་མཐའ་བསྐོར་ན་ཡང༌། །སྐྱོན་གྱི་རིགས་རྣམས་སྡུད་པར་བྱེད། །ངམ་གྲོག་ས་རལ་ཅན་གྱི་ཆུས། །འདམ་གྱི་སྙིགས་མ་འདྲེན་དང་མཚུངས། །ཡོན་ཏན་དང་པོ་སློབ་དཀའ་ལ། །ཤེས་བཞིན་མེད་ན་ཉམས་པ་སླ། །ཆུ་ཐིཌ་བསཌ་པས་འགེངས་དཀའ་ཡང༌། །བོ་ན་ཅིག་ཅར་ཉིད་དུ་མཛད། དཀའ་སྤྱད་ཁུར་དུ་འཁྱེར་ནུས་ན། བྱ་བ་གང་ཡང་དཀའ་བ་མེད། ཆུ་ཡི་ནང་དུ་ཞུགས་པ་དེར། །ཆར་གྱིས་ལྷག་པར་གནོད་མི་འགྱུར། རྒྱུན་ཆགས་བརྩོན་པ་མ་བཏང་བར། བགས་ཀྱིས་སྒྲུབ་ན་ཅི་ཡང་འགྲུབ། ཆུ་བོ་དལ་གྱིས་འབབ་པ་ཡིས། །ཡངས་པའི་ས་ཆེན་བསྐོར་ནས་འགྲོ། བྱ་བ་ཆེན་པོ་ཡུན་གྱིས་བསྒྲུབ། ངང་ཐུང་འབད་པས་མཐར་མི་ཕྱིན། ཀླུང་ཆེན་དལ་ཡང་རིང་འགྲོ་ལ། །རྦ་རླབས་དྲག་ཀྱང་ཆེར་མི་འགྲོ། བྱ་བ་ཉམས་ཀྱིས་མི་ལྕོགས་ན། གཞན་གྱིས་རྦད་ཀྱང་བྱར་མི་རུང༌། རྐྱལ་མི་ཤེས་ན་གཞན་དག་གིས། །བསྐུལ་ཡང་ཆུ་ནང་ཅི་ཕྱིར་མཆོངས། ཆུ་བོ་ཐུན་མོང་མཆོད་ཡོན་ཏེ། ཉི་ཟླ་ཐུན་མོང་སྒྲོན་མེ་གསལ། དམ་པ་ཐུན་མོང་གཙུག་རྒྱན་དང༌། །དམ་ཆོས་ཐུན་མོང་འདུད་རྩི་ཡིན། དར་ཆེན་གྲུ་གཟིངས་རྒྱ་མཚོའི་རྒྱན། སྤྲིན་བྲལ་ཟླ་བ་ནམ་མཁའི་རྒྱན། མཁས་པའི་སྐྱེ་བོ་བསྟན་པའི་རྒྱན། །རུ་འདྲེན་དཔའ་བོ་དཔུང་གི་རྒྱན། ཡ་རབས་བཟང་སྤྱོད་དཔོན་དང་འབངས། ཕན་ཚུན་ལེགས་ཚོགས་གོང་དུ་སྤེལ། རྒྱ་མཚོ་ཆེ་དང་ཆུ་བོ་རྣམས། །རེས་མོས་ཚུལ་གྱིས་གྲོགས་སུ་འགྱུར། རྗེ་དཔོན་ངན་དང་གཡོག་ངན་པ། གཉིས་ཀས་གཉིས་ཀ་རྒུད་བྱེད་དེ། རྫས་གསར་ནང་དུ་ཆུ་བླུགས་ན། །གཉིས་ཀ་ཆུད་ཟོས་བརླག་པར་འགྱུར། ཤེས་རློམ་དབང་ཅན་མང་བ་ཡིས། ཡུལ་ཁམས་མདུན་གྲོས་འཇིག་འགྱུར་ཏེ། །གཡས་གཡོན་ཀུན་ནས་ཆུ་འབུར་བའི། ས་ལ་མཁར་ཁྱིམ་བརྟན་མི་སྲིད། རྗེ་འབངས་མཐུན་ན་དགྲ་སྡེ་ཡིས། ཐུབ་དཀའ་སོ་སོར་གྱེས་ན་མིན། །རྟ་ཡིས་བརྒལ་དཀའི་ཆུ་བོ་ཡང༌། མང་དུ་གྱེས་ན་ལུག་ཀྱང་བགྲོད། ཆོས་ལྡན་རྒྱལ་པོས་ཁྲལ་བསྡུས་ཀྱང༌། དེ་ཉིད་ཀྱིས་ནི་འབངས་རྣམས་སྐྱོང༌། །སྤྲིན་ཆེན་རྒྱ་མཚོའི་ཆུ་དྲངས་ཏེ། དལ་གྱིས་འབེབས་པས་འཛིན་མ་སྐྱོང༌། རྒྱལ་ངན་འབངས་ཀྱི་ཟས་ནོར་ཀུན། །འཕྲོགས་ཀྱང་ད་དུང་ལྟོགས་ཤིང་བཀྲེན། རྒོད་མ་ཁ་ཡིས་རྒྱ་མཚོའི་ཆུ། འཐུངས་ཀྱིན་རྟག་ཏུ་འབར་དང་མཚུངས། གཙོ་བོ་ངན་པ་རྟག་བཀུར་ཡང༌། །གསུག་དང་བྲལ་བ་ཙམ་གྱིས་སྡང༌། ཆུ་བོ་ཉིན་ཞག་མང་བསྐོལ་ཡང༌། མེ་དང་བྲལ་བའི་མོད་ལ་གྲང༌། ཁེངས་དྲེགས་གདུག་རྩུབ་ཆེ་བ་ཡི། །དཔོན་ལ་སུ་ཡང་བརྟེན་མི་སྤྲོ། ཤིན་ཏུ་འཁྲུགས་པའི་རྦ་ཀློང་དུ། ཉ་ལ་སོགས་པ་སྡོད་མི་བྱེད། བརྩེ་ཞིང་ཕན་གདགས་ནུས་པ་དེར། །སྐྱེ་བོ་ཐམས་ཅད་ངང་གིས་འདུ། ཡིད་བཞིན་གྱི་ནི་རྒྱ་མཚོའི་ངོགས། འགྲོ་བ་ཀུན་གྱིས་བསྟེན་པར་བྱེད། ཆེ་མཐོ་བསྟེན་པས་དཔལ་འཐོབ་ཀྱང༌། །དེ་ལས་ལྷག་པའི་འཇིགས་པ་འབྱུང༌། རྒྱ་མཚོ་རིན་ཆེན་འབྱུང་གནས་དེ། གདུག་ཅན་ན་ཀྲའི་གྲོང་ཡང་ཡིན། རྒྱུས་མེད་མི་ལ་གསར་འགྲོགས་ཀྱིས། །ཡིད་བརྟན་བྱེད་པ་ཉམས་པའི་རྒྱུ། རྒྱལ་སྲས་ངང་པའི་སྡེ་དཔོན་ཡང༌། མཚོ་གསར་བརྟེན་པས་རྙེ་པས་རྙི་ཡིས་ཟིན། །རྣ་བ་སྲབ་པའི་མཛའ་གཅུགས་དེ། རིང་མིན་དབྱིན་གྱིས་སོ་སེར་གཏོང༌། ཆུ་དང་འོ་མ་རོ་གཅིག་ཏུ། འདྲེས་པ་ངང་པའི་མཆུ་ཡིས་འབྱེད། །མཁས་པས་བདེན་བརྫུན་བརྟག་ནས་བྱེད། བླུན་པོ་གྲོགས་པའི་རྗེས་སུ་རྒྱུགས། ཆུ་ནང་ཅལ་གྱི་སྒྲ་བསྒྲགས་པས། གཅན་གཟན་རི་དྭགས་ཕལ་ཆེར་བྲོས། །འགྲོགས་ན་ལེགས་སྤྱོད་འཕེལ་འགྲིབ་ལས། དགེ་དང་སྡིག་པའི་གྲོགས་འགྱུར་ཏེ། དྭངས་བསིལ་འདྲ་ཡང་ཕན་གནོད་ལས། །སྨན་གྱི་ཆུ་དང་དུག་ཆུར་འཇོག །སྡིག་གྲོགས་གཡེམ་མའི་འཛུམ་དཀར་ལས། ཤ་ཚའི་གདུག་རྩུབ་ཁྲོ་གཉེར་བཟང༌། །ཐན་ཁྱེར་སྤྲིན་གྱི་མདོག་དཀར་ཡང༌། ཆུ་ལྡན་སྤྲིན་ནག་ཞིང་པས་གསོས། བློ་ལྡན་རང་བཞིན་བཟང་པོ་དེ། མཆོག་དམན་བར་མ་ཀུན་གྱིས་བསྟེན། །འཇུག་ངོགས་བདེ་བའི་རྫིང་བུ་ལ། སྐྱེ་བོ་ཐམས་ཅད་དགའ་ཞིང་འཇུག །ཁེངས་དྲེགས་སྤྱོད་པ་རྩིང་པ་ལ། དོན་མེད་རྣམས་ཀྱང་དགྲ་རུ་ལྡང༌། །རྒྱགས་ཤིང་འཕྱར་བའི་གང་གཱ་མ། ཛ་ཧུ་ཁྲོས་པས་ཧུབ་ཀྱིས་བཏུངས། ཉམ་ཆུང་སྟེང་དུ་དཔའ་ཐལ་ན། ཉམ་ངའི་གཡང་དུ་ལྷུང་བར་འགྱུར། །ཆུ་ལ་རྐྱལ་གྱིས་དྲེགས་པའི་ཉ། སྐམ་ལ་ཡར་ན་འཆི་བར་འགྱུར། རིགས་ངན་ཅུང་ཟད་འབྱོར་ན་ཡང༌། རྒྱལ་པོ་ལྟ་བུའི་ཁེངས་དྲེགས་འཛིན། །གཅོང་རོང་དོག་མོའི་ཆུ་ཕྲན་དེ། འུར་སྒྲ་རྒྱ་མཚོའི་རྦ་ཀློང་ཡངས་པའི་རྒྱལ་ཁམས་མ་མཐོང་བ། ས་མཐའི་བླུན་པོ་རང་མཐོང་ཆེ། །ཁྲོན་པའི་ཆུ་ལ་འགྱིངས་པ་ཡི། རུས་སྦལ་རྒྱ་མཚོའི་གཏམ་གྱིས་ཤི། ཐ་ཤལ་རྣམས་ནི་མགུ་ལླ་ཞིང༌། མགུ་བའི་མོད་ལ་ཁྲེལ་ཡང་སླ། །ཕུག་ཐག་ཐུང་བའི་ཆུ་ཕྲན་དེ། བྲུབས་དང་བྲི་བ་ཡུད་ཙམ་ཡིན། མ་རབས་ གཅེས་པར་བསྐྱངས་ན་ཡང༌། དྲིན་དུ་མི་ཚོར་འཁྲུག་པར་བྱེད། །བསིལ་བའི་ཆུ་ཡིས་བྲན་ན་ཡང༌། རྡོ་ཞུན་ལྷག་པར་ཁོལ་ཞིང་ཚ། དམ་པ་རྣམས་ལ་གནོད་བྱས་ཀྱང༌། ཁྲོ་མེད་བཟོད་པས་བདེ་བར་གནས། །བཙོ་མི་སྔགས་ཀྱིས་བཏབ་པའི་ཆུ། ཁོལ་བཞིན་པ་ཡིས་བྲན་ཀྱང་བསིལ། ཁྲེལ་མེད་རྣམས་ལ་ཕན་བཏགས་ཀྱང༌། །བྱ་བ་ཟིན་ན་བརྗོད་པར་འགྱུར། ཆུ་བོ་ཕ་རོལ་བརྒལ་བ་ན། གྲུ་གཟིངས་ལྟོས་པ་མེད་པར་འདོར། མི་ངན་རེ་རེའི་བྱེད་པས་ཀྱང༌། །ཡུལ་ཁམས་ཆེན་པོ་ཕུང་བར་བྱེད། དྲང་གདུག་པ་མཆོངས་པ་ཡིས། སི་ཏ་ཚལ་བརྒྱར་གྱེས་ཞེས་གྲགས། དམུ་རྒོད་སྐྱེ་བོས་སུན་ཕྱུང་རྣམས། །དམ་པ་ལ་ཡང་ཡིད་མི་ཆེས། ཆུ་ཟླས་བསླུས་བྱས་ངང་པ་ཡིས། ཉི་མོའང་པད་རྩ་ཟ་མི་བྱེད། སྐྱེ་བོ་ངན་པ་བཅོས་ན་ཡང༌། །རྐྱེན་དང་འཕྲད་ཚེ་རང་མཚང་སྟོན། ཆུ་ཀླུང་འོལ་ཁ་བསྒྱུར་བ་དེ། བྲུབས་ཚེ་སྔར་གྱི་ལམ་དུ་འགྲོ། དམ་པ་མཐོ་དམན་འབྱོར་རྒུད་སོགས། །ཅིས་ཀྱང་རང་བཞིན་མི་འགྱུར་ཏེ། ཆུ་བོ་བསིལ་ལམ་ཚ་ན་ཡང༌། རླན་གྱི་རང་བཞིན་ག་ལ་འདོར། མི་བསྲུན་སྐྱེ་བོ་གདམས་པ་ལས། །ནན་ཏུར་ལས་ཀྱིས་གདུལ་བར་སླ། གོས་ཀྱི་དྲི་མ་འཁྲུད་པ་ལ། གཙང་མའི་ཆུ་ལས་འགྱུར་བྱེད་བཟང༌། ལུས་ཅན་ནང་གི་སྐྱོན་ཡོན་རྣམས། །ཕྱི་རོལ་སྤྱོད་པས་མཚོན་ནུས་ཏེ། ཆུ་སྐྱ་ལྡིང་བས་ཆུ་བོ་དང༌། དུ་བ་ལས་ནི་མེར་ཤེས་བཞིན། གཞན་གྱི་སྐྱོན་ཡོན་མཐོང་སླ་ཡང༌། །རང་གི་སྤྱོད་ཚུལ་མཐོང་བར་དཀའ། མཚོ་ནང་ནམ་མཁའི་ཟླ་སྐར་ཀུན། གསལ་ཡང་རང་གི་གཏིང་མི་མཐོང༌།བསམ་ངན་གཡོ་སྒྱུའི་བྱ་བ་ནི། །འདྲ་ཡང་ཡང་ཕུགས་སུ་འཕུང༌། ཆུ་ཀླུང་གྱ་གྱུར་བགྲོད་པ་ཡང༌། བབས་ཀྱིན་ཐུར་ནས་ཐུར་དུ་འགྲོ། རིཌ་བརྒྱུད་ཟད་འོདད་བུ་ངན་སྐྱེ། །བསོད་ནམས་ཟད་འདོད་བསམ་ངན་འཆར། རང་ཉིད་བརླག་འདོད་རིག་པ་རྒོད། ཆུ་མིག་སྐམ་འདོད་སྙིཌ་མ་མང༌། །བླུན་པོས་ངལ་བརྒྱས་བསྒྲུབས་ན་ཡང༌། གྲགས་པ་བློ་ལྡན་གཞན་གྱིས་འཁྱེར། རི་ལས་སྐྱེས་པའི་པདྨ་ཡང༌། སྐྱེས་པའི་གྲཌ་པ་ཆུ་ཡིས་འཐོབ། །ལུང་རྟོགས་ཡོན་ཏན་མི་ལྡན་ཡང༌། དམ་པར་སྒྲོག་པས་སྐྱེ་བོ་བསླུ། སྦྲང་ཆར་བཅུད་དང་བྲལ་བ་ཡིས། ཐན་འཁྱེར་སྤྲིན་གྱི་འབྲུག་སྒྲ་བཞིན། །སྙིགས་དུས་རང་བྱུང་ཀུན་མཁྱེན་རྣམས། སྦྱངས་ཆེ་ཕལ་པ་ལས་ཀྱང་རྟུལ། རང་བྱུང་ཆུ་ཚན་ལྔར་ཚ་ཡང༌། བསྐོལ་ན་ཆུ་གྲང་རྗེས་སུ་འཁོལ། །དྲེད་པོ་ཁ་ཡི་ཆོས་བཤད་མཁན། ཤེས་རྒྱུད་གདོལ་པ་ལས་ཀྱང་ཐུ། དགུན་དུས་རླངས་པ་ན་བུན་བཞིན། འཐིབས་པའི་ཀློང་དེ་ལྷག་པར་གྲང༌། །དམ་པའི་སྐྱེ་བོ་ཉམས་ཐག་ཀྱང༌། ཆོས་དང་འགལ་བའི་ལས་མི་བྱེད། ཆར་འདོད་བྱིའུ་སྐོམ་ན་ཡང༌། ས་ལ་བབས་པའི་ཆུ་མི་འཐུང༌། །དགེ་སྦྱོར་བརྩོན་པར་འདོད་པ་དང༌། ལོག་པའི་འཚོ་བ་སྒྲུབ་པ་འགལ། མེ་ཏོག་སྐྱེ་བར་འདོད་པ་ཡིས། ཆུ་ཚན་བླུགས་ན་ཕན་འགྱུར་རམ། །ཆེན་པོ་རེ་ཞིག་རྒུད་ན་ཡང༌། སླད་ནས་གཟི་བྱིན་རྒྱས་པར་འགྱུར། འཁྱག་པའི་སྦུབས་སུ་ཚུད་པའི་ཆུ། སོས་ཀ་རིམ་གྱིས་འཕྱུར་ནས་འོང༌། །བློ་དང་རྩོལ་བ་ཞན་པའི་མིས། ཕུན་ཚོགས་ཐོབ་ཀྱང་མོད་ལ་འགྲིབ། རྫིང་ཆུ་ལྷག་ཆུ་ཆུད་པ་དེ། གང་ཡང་མྱུར་དུ་སྐམ་པར་འགྱུར། །ནོར་མེད་མཆོར་དང་ཁ་ཞིམ་འདོད། གཞུང་ལུཌ་སྦྱངས་མཁས་ཁུར་འཛིན། ཆུ་རྐྱིལ་མི་ཤེས་མཚོར་བརྒལ་བ། བསམ་བཞིན་རང་སྡུག་ཉོས་པ་ཡོན། །མངའ་ཐང་བློ་རྒྱ་སྐྱེད་ཆེས་པས། བསོད་ནམས་ཚད་ལས་འགོང་མི་རུང༌། མཚོ་ཆུང་རང་གི་ཁྲོན་པ་ཡི། ཚད་ལས་རྒྱས་ན་བོ་བར་འགྱུར། །དེན་ཆེན་ཐོག་ཏུ་མ་བབས་པའི། དུས་ནས་ཐབས་དང་རིམ་གྲོ་བྱ། ཆུ་ལོན་སྔར་ནས་མ་བརྩིགས་ན། བྲུབས་ཀས་འོལ་ཁ་བསྒྱུར་བ་དཀའ། །དོན་མེད་ལས་ལ་ཕོད་བཙུགས་ནས། རང་ཉིད་ཉམས་བྱེད་དཔའ་བོ་མིན། ཆུ་ཡི་ནང་གི་གཟུགས་བརྙན་ལ། །མཆོགས་པས་སེང་གི་ཤི་དང་མཚུངས། དགྲ་བོ་འདུལ་བར་འདོད་ན་ཡང༌། སྤྱོད་ཚུལ་དལ་ཞིང་འཇམ་པར་བྱ། ཆུ་སྐྱར་འཇབ་ཅིང་འགྲོ་བ་ཡིས། །ཉ་ལ་སོགས་པ་འཛིན་ལ་ལྟོས། གཞན་གྱི་འབྱོར་པ་ལ་སྡང་བའི། རང་གི་བསོད་ནམས་ཉམས་པར་ཟད། ཆུ་ཀླུང་དྲག་པོར་མཆོངས་པ་ན། བདག་ཉིད་འཆི་ཡི་དེར་མི་གནོད། དེ་བས་དགྲ་ལས་རྒྱལ་འདོད་ན། ཡོན་ཏན་སྒྲུབ་ལ་འབད་པར་བྱ། ཆུ་བོ་ཆེ་ལ་བརྒལ་བའི་ཐབས། ཐང་ནས་གྲུ་གཟིངས་འཆོས་པ་ཡིན། རང་ལས་བསོད་ནམས་མ་ཉམས་ན། དགྲ་བོ་ཁོ་ནས་མི་ཐུབ་སྟེ། ཆུ་མིག་རང་ཉིད་མ་སྐམ་པར། ས་ཡིས་མནན་ཀྱང་འགོག་ནི་ནུས། དབུལ་ཕྱུག་དར་རྒུད་མཐོ་དམན་ཀུན། སྔོན་སྤྱོད་ལས་ཀྱི་གོ་རིམ་སྟེ། ཆུ་ཡི་དཀྱིལ་འཁོར་བསྲུབས་པ་ལས། རི་གླིང་ཁོར་ཡུག་རིམ་པར་ཆགས། མཁས་པ་ཕལ་ཆེར་དབུལ་འགྱུར་ལ། བླུན་པོའི་སྐྱེ་བོ་ནོར་གྱིས་ཕྱུག །རྙོག་མ་ཅན་གྱི་ཆུ་བོ་ལ། སྦལ་ལྕོང་འབུ་སྲིན་ལྷག་པར་མང༌། བརྒྱ་ཡི་ནང་ནས་དཔའ་བོ་དང༌། སྟོང་གི་ནང་ནས་མཁས་པ་སྟེ། མ་དྲོས་མཚོ་ལས་ཆུ་གསེར་དང༌། རྒྱ་མཚོ་ལེ་ལས་ནོར་བུ་འབྱུང༌། བློ་དང་མི་ལྡན་སྐྱེ་བོ་ཡིས། འབྱོར་པ་རྙེད་ཀྱང་སྤྱོད་མི་ཤེས། ཁྱི་ནི་སྐོམ་ཡང་ཆུ་ཀླུང་ལ། ཧུབ་ཀྱིས་མི་འཐུང་ལྡག་པར་བྱེད། རང་གཞན་སུ་ལ་ཡང་མི་ཕན་པའི། ནོར་དེ་མེད་པ་ཉིད་དང་མཚུངས། ཆུ་མེད་ས་གཞི་རྒྱ་ཆེ་ཡང༌། མྱ་ངན་ཐང་ཞེས་ཀུན་གྱིས་འདོར། ལོངས་སྤྱོད་སྤེལ་བར་འདོད་པས་ཀྱང༌། ཅུང་ཟད་གཏོང་ཚུལ་ཤེས་དགོས་ཏེ། ཁྲོན་ཆུ་བཅུས་ན་འཕེལ་འགྱུར་ཞིང༌། བཞག་ན་སྙིགས་མས་སྐམ་པར་འགྱུར། བླུན་རྨོངས་འབྱོར་པ་རྒྱ་ཆེ་ཡང༌། སྡུག་བསྔལ་རྒྱུ་ལས་མ་འདས་ཏེ། གསེར་རིའི་བར་གྱི་རོལ་མཚོ་རྣམས། རྟག་ཏུ་མུན་པའི་སྨག་གིས་ནོན། འབྱོར་ལྡན་བསོད་ནམས་གསོག་དགོས་ཏེ། བསོད་ནམས་ཉམས་ན་རྒུད་པར་སླ། ལྗོན་ཤིང་ཡལ་ག་རྒྱ་ཆེ་ཡང༌། ཆུ་དང་བྲལ་ན་སྐམ་པར་འགྱུར། བསོད་ནམས་མཐུ་དང་དགེ་བའི་བློ། ཕན་ཚུན་རྒྱུར་གྱུར་སྐལ་བ་བཟང༌། ཆུ་ཡིས་ཆར་དང་ཆར་གྱིས་ཆུ། རྒྱས་བྱེད་རེས་མོས་གྲོགས་སུ་འགྱུར། ཁ་བཤད་མང་ངམ་ཉུང་ཡང་རུང༌། དགོས་དོན་ལག་ཏུ་བླང་ན་གོ ཆུ་ཞེང་ཆེ་ཆུང་ཅི་འདྲ་ཡང༌། ཟབ་དང་མི་ཟབ་བརྒལ་ན་ཤེས། ལེགས་བྱས་སྲོལ་འབྱོད་མཁས་ཕ་སྟེ། དེ་ཡི་རྗེས་སུ་འཇུག་པ་སླ། ཅང་ཤེས་རྟ་ཡིས་རབ་བཙལ་བའི། ཕྱི་བཞིན་ཁྱི་ཡང་འབྲང་བར་བྱེད། མཁས་པ་ཀུན་ལ་སྙོམས་ལྡན་ཞིང༌། ཕྱོགས་རེའི་མིག་ཅན་ཆགས་སྡང་ཆེ། བུམ་པ་གང་བ་བཀུར་བ་སླ། ཕྱེད་ཙམ་གང་བ་ཡོ་འཁྱོམ་མང༌། བསམ་ཚད་ཁ་རུ་འདོན་པ་དེར། གཏད་སོ་མེད་ཅེས་ཀུན་གྱིས་བརྙས། ཤག་ཤག་འབབ་པའི་ཆུ་བོ་ལ། བྱིས་པ་རྣམས་ཀྱང་བརྒལ་བར་བྱེད། ཁ་ཉུང་བཞིན་འཛུམ་གནད་ཕིགས་པ། དེ་ལ་ཀུན་གྱིས་བག་ཟོན་བྱེད། སྒྲ་མེད་མེར་གྱིས་འགྲོ་བ་ཡི། ཆུ་ཀླུང་གཏིང་མཐའ་དཔོག་པར་དཀའ། ཆུ་ལ་རི་མོ་བྲིས་པ་བཞིན། སྡིག་སེམས་མོད་ལ་འདོར་བྱ་ཞིང༌། དགེ་བའི་དམ་བཅའ་རྡོ་བ་ཡི། རི་མོ་བཞིན་དུ་བརྟན་པར་བྱ། བསམ་པ་བཟང་ན་འཇིག་རྟེན་གྱི། བྱ་བ་ཀུན་ཀྱང་ཆོས་སུ་འགྲོ །ཟོ་ཆན་ལ་བརྟེན་འོབས་ཀྱི་ཆུ། ཤིན་ཏུ་མཐོ་བའི་རི་རྩེར་འགྲོ །གཙོ་བོ་ལས་འབྲས་དཀོན་མཆོག་ལ། བློ་ཕུགས་གཏད་ན་ཅི་བསམ་འགྲུབ། ལྷ་ཡི་རྒྱལ་པོས་ཆར་ཕབ་ན། ལོ་ཏོག་ཕུན་སུམ་ཚོགས་པར་འགྱུར། འཇིག་རྟེན་ཚངས་པའི་རལ་ཀློང་དུ། འཁྱམས་པའི་ས་རྒ་མཐར་སོན་ཏེ། སྒྲིབ་གཉིས་དྲི་མ་འཁྲུད་པའི་ཕྱིར། དམ་པའི་ཆོས་ཀྱི་ལམ་དུ་འདྲེན། ཆུ་རིགས་བདུན་ལས་མཆོག་འགྱུར་བའི། ཆུ་འགོ་ས་ལ་ཐུག་པ་བཞིན། ཆོས་ཀྱང་འཁྲུལ་མ་ནོར་བ། རྒྱལ་བའི་བཀའ་ལས་འབྱུང་བ་དགོས། དེ་ནས་ཟབ་རྒྱས་ཉམས་ལེན་གྱི། ལམ་གསུམ་རིམ་པར་འབབ་པ་ཡི། གདམས་ངག་ཚང་ལ་མ་ནོར་བ། སྐལ་བཟང་རྣམ་སད་མཆོད་ཡོན་ཡིན། འོན་ཀྱང་དུས་ཀྱིས་ཆེར་སྙིགས་ཚེ། འཇམ་དབྱངས་བླ་མས་གསལ་མཛད་དེ། རྒྱ་མཚོར་བྱིངས་པའི་རིག་བྱེད་བཞི། ཉ་ཡི་གཟུགས་ཀྱིས་བཏོན་པ་བཞིན། འདི་འདྲའི་བསྟན་དང་མཇལ་བཞིན་དུ། ལྟར་སྣང་ལམ་ལ་སུ་ཞིག་འཇུག །ལྷ་ཡི་ཆུ་བོ་གང་གཱའི་རྩར། བ་ཚྭའི་ཁྲོན་པ་སུ་ཞིག་བརྐོ། བློ་ཆུང་སྐལ་དམན་ཟབ་ཟབ་ཀྱི། གྲགས་པས་བསླུས་ནས་ལོག་པར་འགྲོ། སྨིག་རྒྱུ་ཆུ་རུ་འཁྲུལ་བ་ཡི། རེདྭགས་དོན་མེད་སྡུག་བསྔལ་མྱོང༌། ཆོས་ཀྱི་ལམ་དུ་འཇུག་པ་ལ། དང་པོ་དགེ་བའི་བཤེས་གཉེན་བསྟེན། རྒྱ་མཚོར་བགྲོད་འདོད་བྱ་བའི་འགོར། དེད་དཔོན་མཁས་པ་འཚོལ་བ་ཡིན། འཇིག་རྟེན་འཇིག་རྟེན་འདས་པ་ཡི། དགེ་ལེགས་རྩ་བ་བླ་མ་སྟེ། འཛམ་གླིང་རྩི་ཤིང་ལོ་འབྲས་ཀུན། མ་དྲོས་མཚོ་གནས་ཀླུ་ཡིན་དྲིན། ང་རྒྱལ་སྤངས་ཏེ་ཞི་དུལ་གྱིས། དམ་ཆོས་སྣོད་དུ་རུང་བར་བྱ། ཆུ་བོ་སྒང་དུ་མི་གནས་པར། དམའ་བའི་གཤོང་དུ་འཁྱིལ་བར་འགྱུར། ཆོས་ཀུན་ཅིག་ཅར་མི་ཤེས་ཀྱང༌། ཅི་ཙམ་ཤེས་བཞིན་དོན་དུ་འགྱུར། ཆུ་ཀླུང་རྫོགས་པར་མ་འཐུངས་ཀྱང༌། ཅི་ཙམ་བཏུངས་པས་སྐོམ་པ་སེལ། ཐོས་མང་ཉམས་སུ་མ་བླངས་ན། རང་གི་རྒྱུད་མ་མི་ཕན་ཏེ། ཆུ་ནང་ལོ་བརྒྱར་གནས་པ་ཡི། རྡོ་བའི་རང་བཞིན་སྐམ་པོར་གནས། སྟོང་རྐྱལ་གོམས་པའི་རིམ་པ་ཡིས། རྟག་འཇུ་རེས་འཇུ་མི་འཇུ་ལྟར། ཐོས་བསམ་སྒོམ་པ་སྒྲ་སྤྱི་ལ། བརྟེན་པའི་ཚུལ་ཡང་གསུམ་དུ་གསུངས། མི་ཡི་གྲུ་གཟིངས་རྙེད་དུས་འདིར། ཐོས་བསམ་སྒོམ་པའི་བ་དན་ལ། བརྟེན་ནས་སྲིད་མཚོ་བརྒལ་བར་བྱ། གྲུ་འདི་ཕྱི་ནས་རྙེད་པར་དཀའ། རིགས་དྲུག་སྐྱེ་སྒོ་མཐའ་ཡང་ཀྱང༌། དལ་བརྒྱད་ཚང་བ་ཤིན་ཏུ་དཀོན། ཆུ་བོ་གྲངས་མེད་འབབ་ན་ཡང༌། ཡན་ལག་བརྒྱད་ལྡན་རེ་རེ་ཙམ། སྐྱེས་པའི་སྐད་ཅིག་དེ་ཉིད་ནས། མི་སྡོད་འཆི་བདག་ཁར་ཕྱོགས་ཏེ། ཆུ་ཀླུང་སྐད་ཅིག་རེ་རེ་བཞིན། ཕྱིར་མི་ལྡོག་པར་རྒྱ་མཚོར་འགྲོ །མི་རྟག་སྲིན་པོས་བཟུང་བཞིན་དུ། སོས་བདེར་སྡོད་པ་ག་ལ་རིགས། ཆུ་སྲིན་མཆེ་བའི་ཕྲག་གནས་ལ། བདེ་བའི་གོ་སྐབས་ནམ་ཡང་མེད། བསྒྲུབས་ཀྱང་ཕ་མཐར་ཕྱིན་མེད་པའི། འཇིག་རྟེན་བྱ་བ་བཙན་ཆོད་བྱ། ཆུ་གཉེར་གཅིག་རྗེས་གཉིས་ནོན་ཏེ། ཅི་ཙམ་བདས་ཀྱང་ཟིན་དུས་མེད། བློ་རིག་སྟོབས་དང་རྩལ་ཆེ་ཡང༌། དུས་ཀྱི་ཕོ་ཉས་དབང་མེད་འཆིང༌། ཆུ་ཆེན་རླབས་ཀྱིས་གར་མཁན་མ། དགུན་དུས་འཁྱག་པའི་སྦུབས་སུ་ཚུད། སྒོ་གསུམ་མི་དགེའི་སྤྱོད་ཚུལ་འདིས། ཕྱི་མའི་སྐྱེ་བ་ངན་འགྲོར་ངེས། རི་བོའི་ཟོམ་ནས་འབབ་པའི་ཆུ། གཡང་ས་བརྒྱུད་མར་བརྡབ་ཅིང་འཕྱོ། དེ་ནས་ལོ་གྲངས་བྱ་བ་བརྒྱར། བསྲེགས་ཤིང་འཚེད་ཀྱང་འཆི་མེ་ནུས། རྡོ་སོལ་རི་ལ་ཆར་གྱི་རྒྱུན། བབ་པ་བསྐལ་པའི་བར་དུ་འཁོལ། འཇིགས་ཆེན་དེ་ལས་སྐྱོབ་པའི་སྐྱབས། བསླུ་མེད་དཀོན་མཆོག་གསུམ་ལས་མེད། ཆུ་བོའི་རྒྱུན་གྱིས་ཁྱེར་བ་དེ། སྒྲོལ་བྱེད་མཉན་པ་ཁོ་ནར་ངེས། མཆོག་གསུམ་བྱིན་རླབས་མཐའ་ཡས་ཀྱང༌། དད་པ་མེད་ན་ཇི་ལྟར་སྐྱོབ། རྒྱ་མཚོ་ཆེ་ཡང་ཆར་སྡོད་ཀྱི། བྱིའུའི་སྐོམ་པ་སེལ་མི་ནུས། འཁོར་བའི་འདམ་ལས་མ་བརྒལ་བའི། འཇིག་རྟེ་པ་ལ་བརྟེན་མི་བྱ། ཆུས་ཁྱེར་ཆུ་ཡིས་ཁྱེར་བ་ལ། འཇུས་ན་གཉིས་ཀ་བྱིང་བར་འགྱུར། མཆོག་གསུམ་བསྟེན་ན་དེ་ཡི་ཁྲིམས། ལས་འབྲས་བླང་དོར་འབད་པ་གཅེས། དེད་དཔོན་བསྟེན་ཀྱང་གྲུ་གཟིངས་སུ། མི་སྡོད་དེ་ཉིད་ཇི་ལྟར་སྒྲོལ། སྣོད་བཅུད་བདེ་སྡུག་སྣང་བ་ཀུན། འཁྲུལ་མེད་སྔོན་བསགས་ལས་ལས་འབྱུང༌། ཆུ་ཕོར་གང་ཡང་འགྲོ་བ་བཞིར། སྣང་ཚུལ་ཐ་དད་འབྱུང་བར་གསུངས། དགེ་དང་མི་དགེ་ཆུང་ངུ་ནས། བསགས་པས་ཤེས་རྒྱུད་གང་འགྱུར་ཏེ། ཆར་གྱི་ཐིགས་པ་བསགས་པས་ཀྱང༌། མཐའ་ཀླས་ཆུ་ཡི་དཀྱིལ་འཁོར་ཆགས། གནས་སྐབས་དགེ་བ་ལྟར་སྣང་ཡང༌། བསྔོ་དང་འདུན་པས་བསླད་པ་མང༌། མཆོག་ཏུ་མངར་བ་གང་གཱའི་ཆུ། རྒྱ་མཚོར་འདྲས་ན་ཁ་བར་འགྱུར། རྨོངས་པ་མུན་ནག་གིས་ལྡོངས་ཤིང༌། ལས་ཀྱི་གཌ་པས་བཅིངས་པ་རྣམས། སྲེད་པའི་ཀླུང་གིས་རབ་དྲངས་ཏེ། མི་ཟད་སྐྱེ་བའི་རྒྱ་མཚོར་འགྲོ། འདོད་པ་ལན་ཚྭའི་ཆུ་བོ་ནི། ཅི་ཙམ་སྤྱང་ཀྱང་མི་ངོམས་པས། ཆུ་མཆོར་འཁྱགས་པའི་ངང་པ་ལྟར། སྲིད་ལས་ངེས་འབྱུང་སྐྱོ་ཤས་སྐྱེད། ལས་ཉོན་ན་ཀྲས་ཡོངས་གང་བ། སྡུག་བསྔལ་འཁོར་བའི་རྒྱ་མཚོར་ལས། སྒྲོལ་བྱེད་བསླབ་གསུམ་གྲུ་བོ་ཆེ། བཟུངས་ནས་ཐར་པའི་གླིང་དུ་གཤེགས། ཁྱད་པར་ཁས་བླངས་ཚུལ་ཁྲིམས་ནི། ཉེས་ལྟུང་དྲི་མས་མ་སྦགས་པ། རྒྱ་མཚོ་རེ་དང་མི་འགྲོགས་ལྟར། རྟག་ཏུ་དྲན་ཤེས་བརྟན་པོ་སྲུངས། འོན་ཀྱང་མ་རྒན་སེམས་ཅན་རྣམས། དོར་ནས་རང་དོན་བྱར་མི་འོས། རྒྱ་མཚོའི་གླིང་དུ་གཉེན་བཤེས་ཀུན། བོར་བ་དེད་དཔོན་སྤྱོད་ཚུལ་མིན། མཚོར་གནས་གཡོ་དང་མི་བདེན་པའི། ཁྱད་པར་གསུམ་ལྡན་ཆུ་ཟླ་ལྟའི། འགྲོ་ལ་སྙིང་རྗེ་རྣམ་གསུམ་གྱིས། ཐེག་ཆེན་ལམ་གྱི་སྲོག་རྩ་ཚུགས། བྱང་ཆུབ་སེམས་ཀྱིས་ཟིན་པའི་དགེ །མི་ཟད་བྱང་ཆེན་རྒྱུར་འགྲོ་སྟེ། འཛམ་བུའི་འབྲས་བུ་མ་དྲོས་མཚོར། ལྷུང་བའི་གསེར་སྦྱངས་ཁམས་སུ་འགྱུར། རྒྱལ་སྲས་སྤྱོད་པ་མཐའ་ཀླས་ཀྱང༌། ཕ་རོལ་ཕྱིན་པ་དྲུག་ཏུ་འདུ། རི་སུལ་ལ་ལུང་ཆུ་བོ་བརྒྱ། ཟམ་འོག་གཅིག་ཏུ་འདྲིལ་བ་བཞིན། རྒྱལ་སྲས་རྣཾས་ནི་བདག་པ་ཀུན། འབྲས་བཅས་གཏོང་སྟེ་སྦྱིན་པའི་མཆོག །ཆར་གྱིས་རྩི་བཅུད་ལོ་ཏོག་ཀུན། བསྐྱངས་ཀྱང་ལན་དང་རེ་བ་མེད། རྣམ་དག་ཁྲིམས་ཀྱིས་ཉེས་ལྟུང་གི །རྙོག་མ་མ་ལུས་དྲུངས་འབྱིན་ཏེ། ཀེ་ཏ་ཀ་འབྲས་བྱེ་མ་ཡིས། ཆུ་བོའི་རྙོག་མ་དྭངས་པར་བྱེད། དགེ་ཚོགས་ལ་ལུས་སྲེག་བྱེད་པའི། ཁོང་ཁྲོའི་དགྲ་འཇོམས་བཟོད་པ་སྟེ། ཀུན་ཟ་འབར་བའི་མེ་ལྕེ་ནི། གསོད་བྱད་གཉེན་པོ་ཆུ་ཡིན་ནོ། རྟག་གུས་བརྩོན་པ་མ་བཏང་ན། མི་འགྲུབ་བྱ་བ་གང་ཡང་མེད། ཆུ་ཐིགས་རྟག་ཏུ་འབབ་པ་ཡིས། བྲག་གི་རི་བོ་འབིགས་ལ་ལྟོས། བྱིང་རྒོད་སྐྱོན་བྲལ་ཏིང་ངེ་འཛིན། གསལ་བར་ཡོན་ཏན་ཐམས་ཅད་འཆར། བཻཌཱུརྱར་མེ་ལོང་ཕྱིས་འདྲ་བའི། དྭངས་མཚོར་གཟུགས་བརྙན་ཅི་ཡང་གསལ། དངོས་ཀུན་སྟོང་པར་དམིགས་པ་ཡིས། འཁོར་བའི་གདུང་བ་ཀུན་སེལ་ཏེ། ཆུ་ཀླུང་མཐའ་དག་ཨ་གསྟ་ཡས། ཧུབ་ཀྱིས་གཞལ་བས་འདུད་རྩིར་འགྱུར། ཀླུ་སྒྲུབ་བློ་མཚོ་རྒྱ་ཆེ་བས། དངོས་པོར་སྨྲ་རྣམས་སྤོབས་པ་འཕྲག །རྔ་མ་གནག་གཏིང་མཐའ་མི་མངོན་པའི། རྒྱ་མཚོས་བྱིས་པ་སྐྲག་པར་བྱེད། ཟབ་མོའི་དེ་ཉིད་འབྱེད་པ་ལ། ཐོག་མར་དགག་བྱ་ངེས་དགོས་ཏེ། རྒྱ་མཚོར་ནོར་བུ་ལེན་པ་ལ། འཇིགས་པ་གར་ཡོད་ཤེས་པ་གཅེས། གདགས་གཞི་ཕུང་སོགས་འདུས་པ་ལ། ངའོ་སྙམ་དུ་འཁྲུལ་པ་སྟེ། ཀླུང་ཆེན་གདོད་ནས་བྲུབས་འདྲ་ཡང༌། ཆུ་ཕྲན་དུ་མ་འདུས་པ་ཡིན། བཏགས་དོན་རིགས་པས་དཔྱད་པ་ན། ངོ་བོས་གྲུབ་པ་འགའ་མེད་དེ། ཆུ་ཀླུང་ཡུར་བ་བརྒྱར་དྲངས་པའི། ཤུལ་ན་ཟིལ་པ་ཙམ་ཡང་མེད། སྟོན་པས་ཇི་སྙིད་བཀའ་སྩལ་བ། སྟོང་དང་རྟེན་འབྱུང་འདིར་འཇུག་སྟེ། ས་སྟེང་ཆུ་བོ་མ་ལུས་པ།རྒྱ་མཚོ་ཆེན་པོར་འཞོལ་ཞིང་འབབ། རང་རྒྱུད་སྨིན་པའི་རྒྱལ་སྲས་ཀྱིས། བསྡུ་བ་རྣམ་བཞིས་གདུལ་བྱ་སྐྱོང༌། རྒྱ་མཚོར་འཇུག་མྱོང་དེད་དཔོན་གྱིས། གཞན་ཡང་ཁྲིད་ནས་ནོར་ལ་སྦྱོར། རྒྱུ་ཡི་ཐེག་པའི་ལམ་རིང་ཡང༌། གསང་སྔགས་ཐབས་ཀྱིས་མྱུར་དུ་འགྲོད། ཐང་དུ་འདྲེན་དཀའི་གྲུ་བོ་ཆེ། རྒྱ་མཚོར་ཞུགས་ན་ཡུད་ཀྱིས་འགྲོ །རྡོ་རྗེ་ཅན་གྱིས་ལེཌ་གསུངས་པའི། གསང་སྔགས་ནུས་པ་བསམ་མི་ཁྱབ། གདུང་བ་མ་ཞེས་བོས་པས་ཀྱང༌། ལྷ་ཡི་ཆུ་བོ་འགུགས་པར་བྱེད། ཟུང་འཇུག་གདེངས་ཅན་བདག་པོའི་གནས། རྡོ་རྗེ་ཐེག་པ་རྒྱ་མཚོ་ཆེའི། འཇུག་ངོགས་བདེ་བའི་འབབ་སྟེགས་ནི། དབང་བཞི་རིན་ཆེན་ཐེམ་སྐས་ཡིན། འོན་ཀྱང་དངོས་གྲུབ་རྣམ་གཉིས་ཀྱི། གཞི་རྟེན་དམ་ཚིག་སྡོམ་པ་སྟེ། རྩ་བ་ཆུ་མཚོ་སྐམ་གྱུར་ན། རླབས་ཀྱི་ཕྲེང་བ་གང་ལས་འབྱུང༌། དེ་ཉིད་རིག་པའི་རྣལ་འབྱོར་པས། འདོད་པ་སྤྱོད་ཀྱང་ཞེན་པ་མེད། ཉ་ནི་ཆུ་གཏིང་ཟབ་མོ་ན། འགྱུ་ཡང་ཆུ་ཡིས་ཚུགས་མི་འགྱུར། ཆགས་སོགས་ཉོན་མོངས་ཉེས་པ་རྣམས། ཉོན་མོངས་ལམ་བྱེད་ཉིད་ཀྱི་འཇོམས། རྣ་བར་ཆུ་སོན་ཆུས་འབྱིན་ཞིང༌། མེས་འཚིག་མེ་ཡིས་གདུངས་པས་ཞི། བསྐྱེད་རིམ་ཕྲ་རགས་རྣལ་འབྱོར་གྱིས། སྐྱེ་ཤེ་བར་དོ་གསུམ་སྦྱོང་སྟེ། ལྐལ་ལྡན་ཤིང་རྟའི་མཆོད་ཡོན་གྱིས། དུག་ཅན་དྲི་མ་འཁྲུད་པ་བཞིན། དགའ་བཞིའི་ལྷན་སྐྱེས་བདེ་བ་ཆེས། སྟོང་བཞིའི་ཡེ་ཤེས་རྒྱས་འགྱུར་ཏེ། ཆུ་བོ་རྣམ་བཞིའི་རྒྱུན་འབབ་པས། རྟ་གདོང་མེ་ཆེན་འབར་བར་འགྱུར། ཕྲ་བ་གཉུག་མའི་རླུང་སེམས་ལས། སྒྱུ་མ་ལྒ་བུའི་སྐུར་བཞེངས་པ། དྭངས་པའི་ཆུ་ལས་ཆུ་བུར་དང༌། དག་པའི་མཁའ་ལས་ཆུ་འཛིན་བཞིན། རྩྭ་རྩེའི་ཟིལ་པ་རེ་རེར་ཡང༌། ཟླ་བའི་གཟུགས་བརྙན་སྣང་བ་བཞིན། དཔེ་ཡི་རིམ་པ་རེ་རེས་ཀྱང༌། འཁོར་འདས་ཆོས་ཀུན་མཚོན་པར་ནུས། ལོགས་སྤྱོད་འཁོར་ལོའི་ཆུ་གཏེར་ན། དབྱངས་ལྡན་ངང་མོ་རྣམ་རོལ་བ། དེ་ཡི་ཁ་ལས་ལེགས་བཤད་ཀྱི། རྦ་རླབས་འཁྲི་ཤིང་ཅི་ཡང་གཡོ། གང་ཡང་བདག་བློའི་ཆུ་གཏེར་ལས་འཁྲུངས་ལེགས་བཤད་གསར་པའི་ཟླ་བ་ནི། འཇིག་རྟེན་རྨོངས་པའི་མུན་འཕྲོག་སྙིང་གི་གདུངས་སེལ་བསིལ་བའི་རེག་བྱ་ཅན། དེ་ཡི་དགེ་བ་ས་གསུམ་རྣམ་དཀར་འོད་ཀྱི་གོས་བཟང་འཛིན་པ་དེས། སྐྱེ་དགུའི་ལེགས་བྱས་བློ་དང་ལྷན་ཅིག་བསྟན་པའི་ཆུ་གཏེར་རྒྱས་གྱུར་ཅིག།

ལེགས་པར་བཤད་པ་ཆུའི་བསྟན་བཅོས།

དོ་སྣང་ཆེ་བའི་རྩོམ།

རྩོམ་གསར། 10

དོ་སྣང་ཆེ་བའི་རྩོམ། 10