ཚེས་གསུམ་ཟླ་བ།
ཀརྨ་དབང་གྲགས་ཀྱིས། 2013-07-22
མི་ཁའི་སྟ་རེས་གཙེས་པའི།
ཉམ་ཐག་པའི་རྨི་ལམ་ལྗང་ཁུ།
ཟེར་སྟོང་འགྱེད་པའི་སྤོབས་པས་དབེན་ཡང་།
འཚོལ་སྙེགས་ཀྱི་གོམ་ཁ།
སྨག་གནག་པའི་མཚན་མོ་གཤགས་ནས།
མཁའ་ལམ་ཡངས་མོར་བསྒྱུར།
ཟོར་བ་ལྟ་བུའི།
ཉག་ཕྲ་བའི་ཚེས་གསུམ་ཟླ་བ།
ཕྲ་ཚོམ་སྐར་ཚོགས་ཀྱི་དབུས་སུ།
ཁེངས་སྐྱུང་གིས་ཕེབས་པའི་རེ་བའི་གྲུ་ཆུང་།
དགུན་རླུང་གི་ངར་ཁ་སྡང་པོའི་ཁྲོད།
ཁྱེད་དངངས་ཤིང་འདར་བའི་སྡར་མ་མིན།
ཚེས་གསུམ་ཟླ་བ།
ངའི་སྙན་ངག་གི་རུམ་དུ་དགོད་པའི།
མཚར་སྡུག་གི་གངས་ལྷ་དཀར་པོ།
དོ་ནུབ།
ངས་འཇིག་རྟེན་འདིའི་མཛེས་པ་ཡོངས་རྫོགས་སོར་བཅུས་བཏུས་ཏེ།
ཁྱེད་ལ་གཏང་རག་ཅིག་འབུལ་འདོད་ཨང་།
སུས་ཀྱང་དྲན་མི་སྲིད་པའི།
མདུན་བསྐྱོད་ཀྱི་དཔའ་དར་བསྒྲེངས་པའི།
མཚན་མོ་འདིའི་མེ་ལྕེ་ལྟ་བུའི།
ཚེས་གསུམ་ཟླ་བ།