སྣ་ཚོགས་ཐབས་བཀོད་འཇོན་ནུས་ལུས་ལ་ཚང་། །
    དྲིན་ཅན་ཡབ་ཡུམ་བྱམས་ཀྱིས་སྐྱོང་ལ་མཁས། །
    བརྩེ་བའི་བུ་དང་མཛའ་མོ་འཛུམ་གྱིས་བསུ། །
    དུས་རབས་རྗེས་སུ་སྙེགས་པའི་ཁྱིམ་བདག་ཅིག །
    བློ་རིག་བཀྲ་ལ་སྨྲ་ཉུང་སེམས་རྒྱུད་དྲང་། །
    ཟས་རིགས་གཡོས་སྦྱོར་མཁས་ཤིང་གཙང་སྦྲ་ལེགས། །
    རྒན་བཀུར་གཞོན་གཅེས་ཁོར་ཡུག་འཆམ་མཐུན་བཟང་། །
    བཟའ་ཟླའི་བློ་དང་མཐུན་པའི་ཆུང་མ་ཞིག །
    བྱམས་ལྡན་ཕ་མ་སྤྱི་བོའི་གཙུག་ཏུ་བཀུར། །
    ཞི་ཞིང་དུལ་ལ་ལེགས་པའི་ཆ་ཀུན་སློབ། །
    མ་འོངས་ཕུགས་འདུན་སློབ་གྲྭའི་དགའ་ཚལ་འགྲིམ། །
    ཕ་མའི་ངག་ལ་ཉན་པའི་བུ་ཕྲུག་ཅིག །
    ཡིད་འོང་ཁང་བཟང་ལྷ་ཡི་མཁར་ལ་འགྲན། །
    གང་དགོས་ཀུན་འཛོམས་ལོངས་སྤྱོད་ཀླུ་དང་མཉམ། །
    སྐྱིད་པའི་ཁྱིམ་གཞིར་མཉམ་འཛོམས་དགོད་སྒྲས་ཁེངས། །
    དུས་རབས་གསར་པའི་གཡང་ཁྱིམ་གྲུ་བཞི་ཞིག །