སྲིད་པའི་ཁམས་འདིར་འཚོ་བ་རྣམས། །
    ཡོན་ཏན་སྦྱངས་དང་མ་སྦྱངས་ལས། །
    མི་ལ་མཆོག་དང་དམན་པ་ཡི། །
    ཁྱད་པར་དེ་ལས་བྱུང་བ་ཡིན། །
    ཡོན་ཏན་ཀུན་གྱི་གཞི་རྩའི་རྟེན། །
    རང་གི་ཕ་སྐད་གཙང་མ་ལ། །
    སྐད་རིགས་གཞན་གྱིས་མ་སྦགས་པ། །
    ཡན་ལག་བརྒྱད་པའི་ཆབ་བཞིན་དགོས། །
    གསར་སྐྱེས་མྱུ་གུ་ཕྲ་མོ་ལ། །
    སད་སེར་དྲོ་གྲང་ལ་སོགས་པའི། །
    འགལ་རྐྱེན་ཕྲད་ན་སྐམ་པ་ལྟར། །
    དེ་ལ་ཐོག་མའི་དོགས་ཟོན་གཅེས། །
    བགྲང་བྱ་དྲུག་བདུན་སོན་པའི་ཚེ། །
    ཤེས་བྱ་ཀུན་གྱི་རྨང་གཅིག་པུ། །
    དབྱངས་གསལ་སྦྱོར་ཀློག་སྔོན་རྗེས་འདོགས། །
    དག་གསལ་མྱུར་ལ་བྱང་བ་གཅེས། །
    དེ་ནས་ངག་གི་རྗོད་ཚིག་རྣམས། །
    རི་མོར་འབེབས་ལ་བྱང་བ་དང་། །
    མིང་ཚིག་བརྗོད་ལ་མི་རྨོངས་ཕྱིར། །
    སུམ་རྟགས་དག་གསུམ་གཞུང་ལ་འཇུག །
    ཇི་ལྟར་ཤེས་བྱ་མཐའ་མེད་ལ། །
    མིང་དང་ཐ་སྙད་དེ་མཚུངས་ཕྱིར། །
    འདོད་རྒྱལ་རྗེས་གྲུབ་གང་རུང་གི །
    མངོན་བརྗོད་དག་ཡིག་སྦྱོང་པ་གནད། །
    མིང་རྣམས་ཚིག་ཏུ་བསྒྲུབ་པ་ལ། །
    རང་རང་ལུགས་ཀྱི་བརྡ་སྤྲོད་ལྟར། །
    ཕྲད་དང་རྣམ་དབྱེ་སྦྱོར་བའི་ཕྱིར། །
    སུམ་ཅུ་པ་ལ་བྱང་བ་གཅེས། །
    བྱ་བྱེད་དུས་གསུམ་མིང་མཐའ་འདྲེན། །
    གངས་ཅན་བོད་བརྡའི་ཐུན་མིན་ལུགས། །
    གཞན་ལུགས་ཉོག་མས་མ་བསླད་པའི། །
    རྟགས་འཇུག་དཀའ་གནད་ཤེས་པ་གལ། །
    དེ་ལྟར་མིན་པ་རང་གཞན་གྱི། །
    སྐད་དང་བརྡ་སྤྲོད་འདྲེས་པའི་གཏམ། །
    གར་མཁན་རྣམས་ལ་མཛའ་བ་ལས། །
    གཞན་ལ་མིན་པས་བསྲེ་སླད་སྤོངས། །
    བརྗོད་བྱའི་དོན་ནི་བཟང་ན་ཡང་། །
    རྗོད་བྱེད་ཚིག་ལ་རྒྱན་བྲལ་ན། །
    མཛེས་མ་སྒྲེན་མོ་ལྟར་འགྱུར་བས། །
    སྙན་ཚིག་རྒྱན་ལ་གསོག་སྲུང་གལ། །
    དེ་རྗེས་མི་རིགས་རྒྱལ་ཁབ་སོགས། །
    གཞན་གྱི་སྐད་ཡིག་ཤེས་དགོས་པ། །
    དུས་དང་མཐུན་པའི་སྦྱང་བྱ་ལ། །
    མ་འདྲེས་བརྡ་སྐད་འཁྱོལ་བ་དགོས། །
    དེ་ནས་དེང་དུས་རིག་པའི་བཅུད། །
    རྩིས་རིག་དངོས་ཁམས་རྫས་འགྱུར་སོགས། །
    ཤེས་བྱ་སྤྱི་ཡི་ཁང་བཟང་ལ། །
    འཇུག་འོས་འཛམ་གླིང་སྤྱི་འགྲོས་ཡིན། །
    ཕ་ནོར་བོད་ཀྱི་རིག་པའི་གཏེར། །
    མ་ཤེས་གཞན་རིག་ཤེས་ཟེར་རྣམས། །
    ཨ་མ་ངོ་མ་ཤེས་པ་ཡིས། །
    རྒྱལ་ཕྱིའི་མི་ངོ་ཤེས་དང་མཚུངས། །
    བསྒྲུབ་བྱ་སྒྲུབ་བྱེད་ཚད་ལྡན་མིན། །
    འབྱིན་སྒྲུབ་བྱེད་དང་མངོན་ལྐོག་སོགས། །
    འདེགས་བྱེད་རྒྱ་མའི་རྗེས་འགྲོ་ཕྱིར། །
    ཚད་མའི་རིག་པ་ཤེས་ན་ལེགས། །
    དེ་ནས་ཡོན་ཚད་མཐོར་སོང་ཚེ། །
    སྤྱི་དོན་རྒྱ་མཚོ་ཆེན་པོ་ལ། །
    སྲུང་སྐྱོབ་བྱེད་པའི་ཀུན་སློང་ནི། །
    བཅོས་མིན་སྙིང་ནས་ཡོད་པ་དགོས། །
    སློབ་གྲྭ་འགྲིམ་ནས་སློབ་དཔོན་བསྟེན། །
    ཁྱིམ་མི་དགེ་སློབ་གསུམ་ག་ཡིས། །
    དཀའ་བ་བརྒྱ་ཕྲག་འཕྲང་བརྒལ་བའི། །
    དམིགས་འབྲས་གང་ཡིན་མ་ནོར་གཅེས། །
    རང་གི་ལྟོ་གོས་ཙམ་ཞིག་གི །
    ཆེད་དུ་སྦྱངས་པ་བྱས་སྙམ་ན། །
    དེ་ནི་ཆེས་ཆེར་འཁྲུལ་བ་སྟེ། །
    དགོས་པ་ཤེས་པའི་བརྟག་དཔྱད་དགོས། །
    སྤྱི་དོན་ལེགས་པར་སྒྲུབ་ནུས་ན། །
    རང་དོན་ཆེད་རྩོལ་མི་དགོས་པར། །
    ཞར་ལ་འགྲུབ་པའི་ཆོས་ཉིད་དེ། །
    མེ་ལོང་ནང་གི་གཟུགས་ལྟར་གསལ། །
    ཁ་བཤད་ཚིག་གི་འཇའ་ཚོན་དེ། །
    གནས་སྐབས་བཀྲ་ཡང་ཡུན་མི་བརྟན། །
    ལག་ལེན་དོག་མོའི་གྲོག་རོང་དག །
    བརྒལ་བ་ནུས་དེ་མི་ཡི་མཆོག །
    ཡར་རྒྱས་གཏོང་བའི་བློ་ལྡན་ན། །
    གནའ་དེང་ཕྱི་ནང་རིག་པ་ལ། །
    ཕྱོགས་ལྷུང་བྲལ་བའི་ལྟ་བ་དགོས། །
    དེ་འདྲས་མཐར་ཐུག་འབྲས་བུ་རྙེད། །
    རིག་གཞུང་ཁ་ནས་འཆད་མཁས་ཀྱང་། །
    ལག་ལེན་དོན་ལ་མི་འཁྱོལ་ན། །
    རྒྱལ་སྤྱིའི་རིག་པ་སྦྱངས་ན་ཡང་། །
    མཐའ་མའི་འབྲས་བུ་ཅི་ཞིག་འཐོབ། །
    བཤད་ན་ཚིག་དོན་སྒྲོ་འདོགས་ཆོད། །
    ལས་ལ་ཞུགས་ཚེ་ཕན་འབྲས་ཀྱི། །
    དངོས་པོ་སྐྲུན་པར་ནུས་པ་ན། །
    དེ་ལ་མ་བསྡུས་མི་ཀུན་འདུ། །
    སྐད་ཡིག་མང་པོའི་མཁྱེན་རྟོགས་ཅན། །
    སྔོན་བྱོན་ལོ་ཙཱ་དུ་མ་ཡིས། །
    རྒྱ་གཞུང་བོད་ལ་བསྒྱུར་བ་རྣམས། །
    ད་ལྟ་བོད་ཀྱི་ནོར་དུ་གྱུར། །
    སྔར་ཡོད་བོད་ཀྱི་རིག་པ་དག །
    གཞན་གྱི་ཡིག་རིགས་ལ་བསྒྱུར་ན། །
    གནས་སྐབས་ཙམ་གྱི་ཕན་འབྲས་ལས། །
    མཐར་ཐུག་དགོས་པ་ཆུང་ངམ་སྙམ། །
    གཞན་གྱི་ཤེས་རིག་ལག་རྩལ་སོགས། །
    བོད་ཡིག་བོད་སྐད་ལ་བསྒྱུར་ན། །
    རང་ལ་དབང་བའི་ནོར་མཆོག་ཏུ། །
    འགྱུར་བའི་གནས་ལུགས་ཤེས་གལ་ཆེ། །
    དཔེར་ན་མཚོ་སྔོན་ལ་སོགས་ཀྱི། །
    བཤེས་གཉེན་འགའ་ཡིས་རྩིས་རིག་དང་། །
    དངོས་ཁམས་ལ་སོགས་བསྒྱུར་བ་རྣམས། །
    བདག་ཐོབ་དངོས་པོར་གྱུར་ལས་ཤེས། །
    གཞན་གྱི་སྐད་ཡིག་མཁས་ན་ཡང་། །
    གཞན་ལ་ཕན་ལས་རང་ལ་མིན། །
    དཔེར་ན་གཞན་གྱི་རྒྱན་གོས་དག །
    གཡར་ཏེ་རང་ལ་བཏགས་དང་མཚུངས། །
    རང་སྐད་གཞན་ལ་སྒྱུར་རུང་མོད། །
    སྐབས་སུ་བབས་པའི་དགོས་གལ་ཆུང་། །
    བུ་རབས་ཚ་རྒྱུད་ལ་ཕན་ཕྱིར། །
    གཞན་རིག་རང་སྐད་ལ་བསྒྱུར་མཆོག །
    གོང་གསལ་རང་གཞན་ཞེས་པའི་ཚིག །
    སྤྱི་ལ་བཤད་ལས་སྒེར་ལ་མིན། །
    རྒྱ་མཚོ་ཆེན་པོ་མ་སྐམ་ན། །
    ཉ་མོ་ཐམས་ཅད་ཅི་ལ་འཆི། །
    ཤེས་བྱ་ནམ་མཁའི་སྐར་ཚོགས་བཞིན། །
    མང་ཡང་འཇིག་རྟེན་གསལ་མི་ནུས། །
    མཐར་ཕྱིན་ཆེད་ལས་ཟླ་བ་ལྟར། །
    རྨོངས་མུན་སེལ་བའི་ཁྱད་ཆོས་ལྡན། །
    དེ་ལྟར་སློབ་གསོའི་གོ་རིམ་དང་། །
    གནས་སྐབས་མཐར་ཐུག་ཕན་འབྲས་རྣམས། །
    མ་ནོར་ལམ་བཟང་འཚོལ་ནུས་ན། །
    དངོས་པོའི་དཔལ་ཡོན་འཕེལ་བར་སྙམ། །
    ཚིག་ལ་སྒྲོ་བཏགས་གཏམ་སྤངས་ཕྱིར། །
    ཀུན་ལ་སྙན་མིན་མ་ངེས་ཀྱང་། །
    དོན་གྱི་རོ་བཅུད་མངར་མོ་དེ། །
    དངོས་སུ་མྱོང་ཚེ་ཟུངས་ཀྱི་གསོས། །
    འདི་ནི་བླུན་པོའི་མལ་གཏམ་སྟེ། །
    དངོས་པོའི་ཆོས་ཉིད་དང་འགལ་ན། །
    མཁས་རྣམས་མདུན་དུ་འཆག་བྱ་ཞིང་། །
    དགོས་མཁོ་ཡོད་ན་དང་དུ་ལོངས། །