ཨོ་རྩལ་འགྲན་ཚོགས་ཀྱི་འདུར་རྒྱུག་ཁྲོད་ཟངས་ཀྱི་རྟགས་མ་ཐོབ་མཁན་བུ་མོ་ཆོས་དབྱིངས་སྐྱིད་ལ་ཕུལ་བ།
ཕ་བཟང་གི་རེ་བའི་མིག་འབྲས་སུ་འོད་དུ་འཚེར་བའི་སྐར་མ་འོད་ཆེན།
མ་བཟང་གི་དྲན་པའི་གཏིང་རིམ་ན་བྲག་ཅར་འཁོར་བའི་གཞས་གདངས་སྙན་མོ།
སྟག་ཤར་ཚོའི་གསང་བའི་མིག་ཀོང་ན་ཀེམ་ཀེམ་གཡོ་བའི་ཟུར་མིག་འཁྱོག་པོ།
ཁྱེད་ཀྱི་འཛུམ་མདངས་ལས།
སྙིང་རྗེའི་འོད་དཀར་སྟོང་གསུམ་གྱི་ཁམས་ལ་སྤྲོས་པའི་སྐྱེས་ཆེན་ཞིག་གི་ཞབས་རྗེས་མངོན་ཞིང་།
ཁྱེད་ཀྱི་གོམ་འགྲོས་ལས།
ས་གསུམ་གྱི་ཕྱེད་ཀ་རྒོད་པོའི་རྨིག་འོག་ཏུ་བཅུག་པའི་མི་ཆེན་ཞིག་གི་རྒྱབ་གཟུགས་མཐོང་ཐུབ།
ཨ་ཨ།ངས་ཁྱེད་ཀྱི་འཛུམ་མདངས་ལས་རིགས་རྒྱུད་ཅིག་གི་མདུན་ལྗོངས་མཐོང་བྱུང་བ་འདྲ།
ཨོ་རྩལ་འགྲན་ཚོགས་སུ་ཡང་བའི་གོམ་ཁ་རླུང་ལ་སྤུར་བའི་འདུར་རྒྱུག་དེ་ནི།
བར་ཐག་དང་མཆོག་དམན་གྱི་སུམ་སྒྲོག་ཐག་གེར་གཏོར་བའི་ཅང་ཤེས་དེ་ལགས་སམ།
འཛུམ་དཀར་དང་དུངས་ཞེན་གྱིས་དྲག་ཏུ་དཀྲུགས་པའི་རྒྱལ་ཁའི་གཟེངས་རྟགས་དེ་ནི།
ས་མཚམས་དང་ཆུ་མཚམས་ཀྱི་རབ་ཁ་ཧྲག་གེར་གཏོར་བའི་དྲང་བདེན་གྱི་དཔང་བོ་དེ་ལགས་སམ།
ཨ་ཨ།ངས་ཁྱེད་ཀྱི་འདུར་རྒྱུག་ལས་དུས་ཚོད་དང་མྱུར་ཚད་གཞན་ཞིག་རྟོགས་བྱུང་བ་འདྲ།
བརྐྱངས་ཕྱག་འཚལ་བཞིན་ལྷ་སར་འགྲོ་བའི་དབུལ་ཕོངས་ཀྱི་མཇལ་པ་དེ་དག་ནི།
ཨ་མདོ་དང་ལྷ་སའི་བར་ནས་བྱུང་བའི་རྨོངས་དད་ཀྱི་གཏམ་རྒྱུད་ཅིག་ག་ལ་ཡིན།
དེ་ནི་སྙིང་སྟོབས་དང་དད་མོས་ཀྱིས་སྦར་བའི་ཚ་ལམ་ལམ་གྱི་དོན་དངོས་ཤིག་སྟེ།
ཁྱེད་ཀྱི་ཕ་མེས་ཡང་མེས་ཀྱིས་བོད་དུ་བཞེངས་པའི་ཨོ་རྩལ་སྙིང་སྟོབས་ལགས།
ཨ་ཨ།ངས་ཁྱེད་ཀྱི་བཞིན་རས་ལས་རིགས་རྒྱུད་ཅིག་གི་རྒྱབ་ལྗོངས་མཐོང་བྱུང་བ་འདྲ།
ག་ལེར་ཉོན་དང་།གསེར་དངུལ་རྩྭ་ཐང་ལས་མཆེད་པའི་འབྲི་མོའི་བཞོ་དབྱང་དེ་ནི།
རྒྱང་རིང་ནས་རྒྱང་རིང་དུ་ལྷོད་ཀྱིས་འཐེན་པའི་རྒྱལ་ཁའི་གཞས་གདངས་དེ་མ་ཡིན་ནམ།
ཨ་ཨ།ངས་བརྙན་ཡོལ་ལས་ཤུགས་ཀྱིས་བགྲོད་པའི་འདུར་རྒྱུག་དེའི་བདེ་རྩལ་བསམ་བཞིན།
ཁྱེད་ཀྱི་བར་ཐག་ལས་བར་ཐག་གཞན་ཞིག་མཐོང་བྱུང་བ་འདྲ།
གངས་དཀར་པོའི་ལ་ཐོད་དུ་བསྡུས་པའི་ལོ་ངོ་ཁྲི་ཕྲག་གི་རྒྱལ་ཕམ་དང་རེ་སྙེག་སྒོམ་བཞིན།
རྫ་ཁོག་ནས་ཁད་ཀྱིས་རྒས་པའི་འབྲོང་རྒོད་ཅིག་གི་གཏམ་རྒྱུད་དང་ན་ཟུག་བསམ་བཞིན།
ལ་ལས་ཆང་ཕོར་བཏེགས་ནས་ཁྱེད་ཀྱི་རྒྱལ་ཁ་གྲོང་ཁྱེར་འདིའི་མཁའ་རུ་བསྒྲེངས་ཡོད་ལ།
ལ་ལས་མར་མེ་སྒྲོན་བཞིན་ཁྱེད་ཀྱི་རྒྱལ་ཁ་སྟོན་མཚན་འདིའི་དབྱིངས་སུ་མཆོད་ཡོད།
ཨ་ཨ།ངས་སྙིང་རུས་དང་སྤོབས་པ་ལས་འཕྱུར་བའི་སྔར་མེད་ཀྱི་རླབས་སྒྲར་ཉན་བཞིན།
ཁྱེད་ཀྱི་རྒྱལ་ཁ་ལས་རྒྱལ་ཁ་གཞན་ཞིག་མཐོང་བྱུང་བ་འདྲ།