ངུ་རྒོད་རེས་སུ་སྤེལ་བ་མི་ཚེ་ཡི་དབྱངས་རྟ།།
དལ་བྲེལ་ཟུང་དུ་སྦྲེལ་བ་དུས་ཚོད་ཀྱི་འདས་ཟད།།
མ་ངེས་སྡུག་འདི་སྒོམ་བཞིན་ཕྱི་མིག་གི་གླུ་དབྱངས།།
འདི་སྣང་སྐྱིད་སྡུག་རྐྱ་ཡར་དཔུང་རོགས་སུ་འབུལ་ལོ།།
 
བསྡད་ཀྱང་འདུག་བཟོད་མི་བདེ་འཁོར་བ་འདི་ཁབ་རྩེ།།
སོང་ཡང་སྐྱོ་བ་མི་སངས་ངེས་དོན་གྱི་དུ་ཁ།།
སྙིང་རླུང་སྤྲིན་ལ་འཕྱོ་བའི་གནས་ཚང་གི་ལམ་དུ།།
ཉིན་ཞག་ཕྲེང་བ་འདི་ཀོ་ལག་མཐིལ་ནས་ཤོར་སོང་།།
 
འཐམས་ཀྱང་དབང་ན་མི་འདུག་དུས་སྐར་གྱི་འཇའ་ཚོན།།
བསུབས་ཀྱང་མུན་པར་ལག་སྙོབ་དཔྲལ་བ་ཡི་རི་མོ།།
ཉི་ཤུའི་ལང་ཚོ་ཡོལ་བའི་བྲེལ་འཚུབ་ཀྱི་ཀློང་ན།།
ཨ་ཧོ་རིག་པའི་ས་བོན་གཏི་མུག་གིས་བརླན་འདུག།
 
མདོ་སྔགས་བྱུ་རུའི་ཕྲེང་བ་བསྐལ་པའི་བར་བསྒྲིགས་པ།།
ཆོལ་གསུམ་གནས་ཆེན་ལང་ཚོར་གཟི་བག་ཅིག་བསྩལ་ཀྱང་།།
གསར་རྙིང་འཕོ་འགྱུར་ལམ་ནས་ཡུན་རིང་དུ་ལུས་པའི།།
བུ་ངས་ཁྲོམ་ལ་ངོམ་པའི་བསྐལ་པ་རང་ཟད་སོང་།།
 
ཉིན་མཚན་དུས་ཀྱི་རྟ་ཕོའི་བང་ཤུགས་དང་འགྲོགས་ནས།།
ན་ཚོད་ཕྲ་མོ་ཡོལ་བར་མཛུབ་རྩིས་ཤིག་བརྒྱབ་དུས།།
མཚར་སྡུག་ལང་ཚོས་སྙེམས་པའི་ལྔ་རིག་གི་བུ་མོར།།
ཟབ་གསལ་རིག་པས་མ་འཁྱུད་འགྱོད་པ་ཞིག་སྐྱེས་སོང་།།
 
ལྐོག་གྱུར་དམྱལ་བའི་གཏམ་རྒྱུད་རྣ་ལམ་དུ་སོན་ཏེ།།
མངོན་སུམ་རང་གི་རྟིང་མར་ཞིབ་འདང་ཞིག་བརྒྱབ་དུས།།
འགྱོད་སེམས་སྙིང་གི་ཁྲག་རྒྱུན་ལྷོག་ལྷོག་ཏུ་འཕྱུར་ཏེ།།
ཡོད་ཚད་རྣམ་གཡེང་བུ་མོས་ཕྲོགས་པ་དེར་སྡང་བྱུང་།།
 
ཧ་ཧའི་འཕྱ་སྨོད་དྲི་ཆུ་མཁའ་ཀློང་དུ་གཏོར་བ།།
ཡོ་མེད་རང་གི་མགོ་བོར་སིམ་སིམ་དུ་བབས་ཚེ།།
རང་ཡང་སྨྲ་དོན་གོ་བའི་མིའི་རིགས་སུ་སྙམ་ཡང་།།
སྤྱང་གྲུང་ཉིས་འཛོམས་མྱུར་བའི་རིག་པ་དེ་མི་འཛུམ།།
 
ཀྱི་ཧུད་སྒྱུ་འཕྲུལ་སྣང་བ་མུ་མེད་དུ་ཤར་ཏེ།།
ཚེ་མཐར་སྙིང་ནས་མ་བཟོད་རང་འགྱོད་ཀྱི་གཏམ་ཞིག།
རང་བྱུང་ཁྲི་སྐོར་བཅུ་གསུམ་ལོངས་སྤྱོད་ལ་ཞེན་བཞིན།།
རི་བོ་སྒང་དྲུག་དབུས་ནས་ཉམ་ཐག་ངང་གྱེར་ཏོ།།