དཔལ་གྱི་འབྱུང་གནས་འཇམ་དཔལ་ཀུན་གྱི་དཔལ། ། མཐའ་དག་བྱམས་པས་ཁྱབ་པར་འཇམ་པའི་ངང་། ། འཇམ་དང་དཔལ་གྱི་གྲགས་པའི་ཐུགས་རྗེའི་མགོན། ། འཇལ་དཔལ་ཀུན་གྱི་མགོན་ལ་ཕྱག་འཚལ་ཏེ། ། བློ་དམན་སྐྱེ་བོ་མུན་ནག་ལྟ་བུ་ལ། ། སྙན་ངག་སྒྲོན་མེ་ལྟ་བུས་གསལ་བྱའི་ཕྱིར། ། བདག་ལྟ་དམན་ལ་སྙན་ངག་སྒྲོན་མེད་ཀྱང་། ། བླུན་པོ་གསོ་ཕྱིར་ཆུ་ཐིགས་ཙམ་ཞིག་བརྗོད། །གཞན་གྱི་སྐྱོན་རྣམས་བརྗོད་མི་བྱ། ། གཞན་གྱི་སྐྱོན་རྣམས་ཅི་བརྗོད་པ། ། དེ་བཞིན་བདག་ལའང་ཡོདཔ་སྟེ། ། དཔེར་ན་ཝ་དང་བུད་མེད་བཞིན། ། བདག་ཉིད་ལ་ནི་བསྟོད་མི་བྱ། ། བདག་ཉིད་ལ་ནི་གང་བསྟོད་པ། ། དེ་ནི་བློ་ཆུང་ཤེས་རབ་ཞན། ། དཔེར་ན་ཀ་ལནྡ་ཀ་འདྲ། ། གྲོགས་ངན་བསྟེན་པར་མི་བྱ་སྟེ། ། གྲོགས་པོ་ངན་པ་སུས་བསྟེན་པ། ། ན་གུ་ཏ་ནི་བསྟེན་པ་ཡིས། ། ཤིག་རྣམས་ཕུང་བར་གྱུར་ལ་ལྟོསས། ། ངན་པ་རནམས་ལ་གྲོས་མི་གདབ། ། ངན་པ་རྣམས་ལ་གྲོས་བཏབ་ན། ། ལེགས་པར་སྨྲས་ཀྱང་ངན་པར་འགྲོ། ། སྤྲེའུས་ཀ་ལནྡ་ཀ་ཡི། ། ཚང་བཤིག་པ་ཡི་ཚུལ་ལ་ལྟོས། ། སྤྱོད་པ་རྣམས་ལ་བག་ཡོད་བྱ། ། བག་མེད་རྒྱུན་དུ་སྤང་བར་བྱ། ། གླང་ཆེན་མྱོས་པ་ལྟ་བུ་ནི། ། ནམ་ཡང་བྱ་བ་མ་ཡིན་ནོ། ། ཚིག་རྣམས་བརྗོད་འདོད་རྟག་ཏུ་ནི། ། ཇི་ལྟར་བརྟགས་ཤིང་དེ་ལྟར་སྨྲ། ། གང་ཞིག་མ་བརྟགས་པར་སྨྲ་བ། ། དཔེར་ན་སྨྱོན་པའི་བསྟན་བཅོས་བཞིན། ། དགོས་པ་མེད་པའི་ཚིག་རྩུབ་ནི། ། ནམ་ཡང་བརྗོད་པར་མི་བྱ་སྟེ། ། བདག་ལ་མི་ཕན་གཞན་གནོད་པ། ། དཔེར་ན་ནེ་ཙོའི་རྫུན་ཚིག་བཞིན། ། རྫུན་གྱི་ཚིག་རྣམས་བརྗོད་མི་བྱ། ། རྫུན་གྱི་ཚིག་རྣམས་བརྗོད་བྱས་ན། ། མྱུར་བར་གཞན་གྱི་ཤེས་འགྱུར་ཏེ། ། དཔེར་ན་བྱི་ལའི་རྫུན་ཚིག་བཞིན། ། ཚུལ་འཆོས་སྤྱོད་པ་བྱ་བ་མིན། ། ཚུལ་འཆོས་སྤྱོད་པ་གང་བྱེད་པ། ། དེ་ཡིས་བཙུན་པར་མི་འགྱུར་ཏེ། ། བྲམ་ཟེ་ན་ཡའི་རྒྱལ་མོ་བཞིན། ། མཛའ་བཤེས་ངན་པའི་ཚིག་མི་མཉན། ། མཛའ་བཤེས་ངན་པའི་ཚིག་ཉན་པ། ། འདོད་དོན་མེད་དེ་བསླུས་པར་འགྱུར། ། དཔེར་ན་རུས་སྦལ་སྤྲེའུ་བཞིན། ། གཡོ་ཅན་ནག་འཇམ་ཚིག་མི་མཉན། ། དེ་ཡི་ཚིག་རྣམས་ཉན་བྱེད་པ། ། དཔེར་ན་དབང་པོའི་རྒྱལ་མཚན་གྱིས། ། སྤྱང་ཀི་ལ་སོགས་བསླུས་ལ་ལྟོས། ། གནོད་སེམས་ཅན་གྱི་ཚིག་མི་མཉན། ། དེ་ཡི་ཚིག་རྣམས་ཉན་བྱེད་ན། ། བདག་ལ་ཕན་པ་མི་འབྱུང་སྟེ། ། ཝ་ནི་སྲེག་པས་ཕུང་བ་བཞིན། ། སྡིག་པའི་གྲོགས་པོ་ཡིད་མཐུན་བཞིན། ། དགའ་བ་སྣ་ཚོགས་ཚིག་བརྗོད་ཀྱང་། ། སྡིག་ངན་དེ་ནི་བདུད་ཡིན་ཏེ། ། དཔེར་ན་གླིང་གི་སིན་མོ་བཞིན། ། ཕྱུག་པོ་ཀླ་ཀློ་ལ་ཡང་ཡོད། ། དཔའ་བོ་དོད་འགྲོ་ལ་ཡང་ཡོད། ། དོན་དང་མཐུན་པའི་གཏམ་སྨ་བ། ། འཇིག་རྟེན་འདི་ན་ཤིན་ཏུ་དཀོན། ། དེ་ཕྱིར་ཡོན་ཏན་དག་ལ་ནི། ། སོག་དང་བསྡོས་འབད་པར་བྱ། ། གང་ཞིག་ཡོན་ཏན་མི་སློབ་པ། ། དེ་ནི་བླུ་པོ་ཕྱུགས་ལྟ་བུ། ། ཡོན་ཏན་མེད་པའི་ཁ་ཉིད་ནི། ། ས་ཡི་བུ་ག་དག་དང་མཚུངས། ། ཡོན་ཏན་རབ་ཀྱིས་བརྒྱན་པ་ཡིས། ། ཁ་ནི་པད་པ་ཡིད་འོང་ལྡན། ། གཞོན་པའི་དུས་སུ་རིག་པ་བསླབ། ། ཞོ་འདོད་བ་ནི་དགུན་ནས་གསོས། ། དྲོད་གཤེར་ལྡན་དུས་ས་བོན་གདབ། ། འདི་གསུམ་འབྲས་བུ་སྨིན་པའི་རྒྱུ། ། ཡོན་ཏན་དག་ལ་འབད་བྱ་ཡི། ། འགྱིང་ཚུལ་དགོས་པ ་ཅི་ཞིག་ཡོད། ། འོ་མ་མེད་པར་གྱུར་པའི་བ། ། དྲིལ་བུ་བཏགས་ཀྱང་ཉོར་མི་འདོད། ། བདག་ལ་ཕུན་སུམ་ཚོགས་ཡོད་ཀྱང་། ། གཞན་ལ་བརྙས་པར་མི་བྱ་སྟེ། ། ཞུན་མར་ལྟ་བུའི་སེམས་ཀྱིས་སུ། ། ཡོན་ཏན་མཐའ་དག་ཁོང་དུ་སྦ། ། ཤེས་རབ་ལྡན་པ་ལུས་ཆུང་ཡང་། ། དར་བབས་གཞན་གྱིས་བརྙས་མི་བྱ། ། དཔེར་ན་བློ་གསལ་རི་བོང་གིས། ། སེང་གེ་སྲོག་དང་ཕྲལ་བ་བཞིན། ། ཀུན་ལ་མཐོ་དམན་མེད་པ་ཡི། ། ཉི་མ་ལྟ་བུའི་ཕན་བྱས་ན། ། ཀུན་གྱིས་ལན་རྣམས་ལྡོན་འགྱུར་ཏེ། ། བྱི་བས་གླང་ཆེན་བསླངས་པ་བཞིན། ། སེམས་ཅན་ཀུན་ཕན་སེམས་བསྐྱེད། ། རེས་འགའ་རྩྭ་བཞིན་ཞུམ་པར་བྱ། ། རེས་འགའ་མེ་བཞིན་སྦར་བར་གྱིས། ། རེས་འགའ་གངས་རི་ལྟ་བུར་གྱིས། ། རེས་འགའ་དམག་ལ་ངར་བ་བཞིན། ། གཞན་གྱི་ཡུལ་ན་གནས་པ་དང་། ། གཞན་གྱི་འཚོ་བས་འཚོ་བའི་ཚེ། ། ཇི་ལྟ་བུར་ནི་བརྙས་གྱུར་ཀྱང་། ། ཁ་རོག་འདུག་པས་བདེ་བ་འཐོབ། ། སྐྱེ་བོ་ངན་པ་ཡུན་རིང་བསྟེན་བྱས་ཤིང་། ། བཟའ་བཏུང་ཞིམ་པོ་མང་པོས་ཕན་བཏགས་ཀྱང་། ། ཕན་མེད་གྲོགས་པོས་ངན་པ་སྤྱོད་གྱུར་ཏེ། ། དཔེར་ན་ཁྲོན་པར་ལྷུང་བའི་མི་བཞིན་ནོ། ། མི་གང་བློ་ནི་གཡོ་ཞིང་འགྱུར་བྱང་བ། ། དེ་ཡི་མཛའ་བཤེས་རྟག་པར་མི་འགྱུར་ཏེ། ། རབ་ཏུ་ཉོན་མོངས་མི་དེ་ཅི་འདྲ་ན། ། ཤིང་ཤུང་ཚོས་ཀྱིས་རས་དཀར་བཙོས་པ་བཞིན། ། གལ་ཏེ་བློ་ལྡན་མཁས་པས་དགྲ་བོ་དག ། ། རབ་ཏུ་མི་དགའ་བར་ནི་བྱེད་འདོད་ན། ། ཚིག་རྩུབ་མི་སྨྲ་རབ་ཏུ་ངག་འཇམ་གྱིས། ། དེས་ནི་དེ་ལ་གནོད་པ་ཆེན་པོར་འགྱུར། ། རྒྱ་མཚོ་དང་ནི་རི་རབ་གླིང་ལ་སོགས། ། འཇིག་རྟེན་པ་རྣམས་བདག་གི་ཁུར་མིན་གྱི། ། ཇི་ལྟར་བྱས་པ་མི་གཟོ་གང་ཡིན་པ། ། དེ་ནི་བདག་གི་ཁུར་ཆེན་དག་ཏུ་འབྱུང་། ། མི་གང་སེམས་ནི་མི་རྒོད་ཅིང་། ། བྱས་པ་གཟོ་དང་བྱས་པ་ཚོར། ། བྱས་པ་ཆུད་གཟོན་མི་བྱེད་པ། ། དེ་དག་མཁས་པས་རབ་ཏུ་བསྔགས། ། ཆོས་འདི་བྱམས་པ་བདེ་བ་སྟེ། ། འཇུག་ངོགས་བདེ་བའི་ཆུ་ཀླུང་བཞིན། ། གྲོགས་པོ་འཁུ་བ་མེད་པ་དང་། ། ང་སྙེམས་ང་རྒྱལ་ཟད་པ་བདེ། ། ཁེངས་དང་ཟོལ་བྱེད་ང་རྒྱལ་ཆེ། ། སྡིག་པའི་གྲོགས་པོ་བསྟེན་པ་དང་ སྟོབས་ལྡན་རྣམས་ལ་རྒོལ་བྱེད་པ། ། དེ་དག་ཡིད་ནི་བདེ་མི་འགྱུར། ། དེ་ཕྱིར་ཁེངས་པར་མི་བྱ་སྟེ། ། ཁྲོ་བ་རྣམ་པར་སྤང་བར་བྱ། ། ཁེངས་དང་ཁྲོ་བ་འོང་གྱུར་ན། ། དེ་དག་རྣམས་ཀྱིསགྲགས་པ་འཇོམས། ། གང་ཞིག་རྒན་དང་བྱས་པ་ནད་པ་དང་། ། ཉམ་ཆུང་ཐབས་དོར་དེ་བཞིན་དམན་པ་དང་། ། རྒྱལ་པོས་སྤངས་དང་སྐྱབས་མེད་པ་དག་ལ། ། སྙིང་རྗེ་མེད་པ་མིར་མི་རུང་། ། རང་གི་ཡུལ་འཁོར་གནས་སྤངས་ཏེ། ། གཞན་གྱི་ལྗོངས་སུ་ཕྱིན་པ་ན། ། ཚིག་ངན་སོ་སོར་ཟློས་པ་ལ། ། བཟོད་པ་ཆེན་པོ་བསྐྱེད་པར་བྱ། ། དཀའ་ཐུབ་ཚུལ་ནི་བཟོད་པ་ཡིན། ། གཙོ་བོའི་ཚུལ་ནི་དཀའ་སྤྱོད་ཡིན། ། ཤར་བའི་ཚུལ་ནི་དཀའ་བཟློག་ཡིན། ། བུད་མེད་ཚུལ་ནི་དཀའ་སྡུག་ཡིན། ། དེ་ལྟར་མ་ཡིན་རང་བཞིན་ངན་པའི་མི། ། བྱམས་ལ་ལན་མེད་གཞན་གྱིས་ཕན་བྱས་བརྗེད། ། སྡང་བས་གནོད་པ་ཇི་སྙེད་བྱེད་གྱུར་ཀྱང་། ། སྡང་ཐབས་བྱས་པ་དེ་ཡང་ཆུ་བཞིན་འཐུངས། ། ཚེ་དང་ལོངས་སྤྱོད་གཉེན་བཤེས་ཀུན་དེར་དཀོན། ། དེ་དག་རྒུད་པ་ཤིན་ཏུ་རྙེད་པར་སླ། ། དེ་ཕྱིར་སེམས་ཅན་དམས་པར་གྱུར་པའི་ཚེ། ། ཁྭ་བཞིན་མུ་ཅོར་མི་སྨྲ་ཁ་རོག་འདུག གལ་ཏེ་ནོར་མེད་བདག་གིས་ཕྱོགས་ཉུང་ལ། ། མཛའ་བཤེས་ཕྱོགས་ཀྱི་སྟོབས་ཀྱང་ཆུང་གྱུར་བཞིན། ། དགྲ་བོའི་ཕྱོགས་ཀྱི་སྟོབས་ཚུལ་ལྡ་པའི་ཚེ། ། ཚིག་རྩུབ་མི་སྨྲ་ཁ་རོག་འདུག་པར་བྱ། ། ཡ་རབས་ཚུལ་མེད་ཁེངས་པས་ང་རྒྱལ་ཤིན་ཏུ་ཆེ། ། གཡོ་སྒྱུ་དད་མེད་ཁྭ་བཞིན་ཤིན་ཏུ་མུ་ཅོར་སྨྲ། ། གཟུ་ལུམ་ཕྲག་དོག་རྐམ་དང་ཁྲེལ་མེད་ངོ་ཚ་བྲལ། ། མི་དེ་བུར་གྱུར་ཀྱང་ནི་གཞན་བཞིན་སྤང་བར་བྱ། ། དེ་ལྟ་བུ་ཡི་དམན་ཞིང་ངན་པ་སྟེ། ། མཐོན་པོའི་སར་མི་དྲང་ཞིང་དེར་མི་བཞག ས་དེར་བཞག་ཀྱང་དྲེགས་དང་ཁེངས་མི་ཐུབ། ། དཔེར་ན་པགས་པ་སྔོན་པོའི་ཝ་དང་འདྲ། ། སྐྱེ་བོ་རྨོངས་པ་འགའ་ཞིག་ནི། ། ལོག་པའི་ཆོས་ལ་རབ་ཞེན་པ། ། འདོད་པའི་དོན་དེས་བསླུས་འགྱུར་ཏེ། ། རུས་སྦལ་སོ་ཡིས་བྱ་བསླུས་བཞིན། ། རབ་ཏུ་མི་གཟོའི་སྐྱེ་བོ་རྣམས། ། སྡུག་བསྔལ་འབྱུང་བའི་རྒྱུ་དག་ལ། ། དང་བླངས་དོན་དུ་གཉེར་བྱེད་པ། ། གཅན་གཟན་གལ་སྒོར་འཇུག་པ་བཞིན། ། དྲེགས་པའི་ལོང་བ་འགའ་ཞིག་ནི། ། རང་གི་སྐྱོན་རྣམས་མ་བསམས་པར། ། ཡོན་ཏན་ཕྲ་མོས་རབ་ཏུ་མགུ་བ། ། ཁྲོན་པའི་སྦལ་བ་ཇི་བཞིན་ནོ། ། རྨོངས་པའི་ལོང་བ་འགའ་ཞིག་ནི། ། ཆོས་དེ་ཉིད་མ་རྟོགས་པར། ། ལོག་པའི་ཆོས་ཀྱིས་རབ་མགུ་བ། ། བླུན་པོས་ནོར་བུ་ལེན་པ་བཞིན། ། ཤིན་ཏུ་བླུན་པ་ལ་ལ་དག ། ། འཆི་བའི་རྣམ་པ་རབ་བརྗེད་ནས། ། བྱ་བ་མང་པོ་རྩོམ་བྱེད་པ། ། བདུད་ཀྱིས་བསླུས་པར་ཤེས་པར་བྱ། ། འགྲོ་བ་བཟང་པོ་བཟང་མོ་ལ། ། གང་ཞིག་རབ་ཏུ་ཆགས་བྱེད་པ། ། སྲོག་ཆགས་མེ་ལ་མཆོང་བ་བཞིན། ། འདོད་པས་འཕུང་བར་འགྱུར་བ་ཡིན། ། རྟ་དང་མ་ཧེ་གླང་པོ་སོགས། ། གང་ཞིག་དེ་ལ་ཆགས་བྱེད་པ། ། འདོད་པ་ཅན་གྱི་སྐྱེས་བུ་ཡིས། ། རྨི་ལམ་ནོར་རྙེད་བསླུས་པ་བཞིན། ། སྡིག་པའི་ལས་ལ་རབ་དགའ་ཞིང་། ། དགེ་ལ་དྲན་པར་མི་བྱེད་པ། ། འཇིག་རྟེན་དག་ལ་རབ་ཏུ་ཆགས། ། དུག་དང་འདྲ་བའི་སྐྱེས་བུ་དེ། ། འདིར་ཡང་སྡུག་བསྔལ་ཆེན་པོ་ཅན། ། ཕྱི་མ་མནར་མེད་རབ་ཏུ་འཇིགས། ། བར་མདོ་སྲིད་པའི་ལས་རྣམས་དྲན། ། གསལ་བའི་མེ་ལོང་རབ་འཇིགས་པས། ། ལས་ཀྱི་དགེ་སྡིག་རྣམ་པར་ཕྱེ། ། རང་འདོད་གནས་སུ་གནས་དབང་མེད། ། མི་འདོད་སར་ནི་རྣམ་པར་ཁྲིད། ། ལས་ཀྱི་རྒྱུ་འབྲས་མི་བསླུ་བ། ། ཕོ་མོ་མཐོང་བའི་རྣམ་པའམ། ། གཞན་ཡང་རབ་ཏུ་གྲངས་མང་ལྟོས། ། དེ་ཕྱིར་པའི་སྐྱེས་རྣམས་ཀྱིས། ། རྒྱུན་དུ་འཆི་བ་དྲན་པར་བྱ། ། རང་གིས་ཅི་བྱས་ལས་རྣམས་བགྲང་། ། ཡུད་ཙམ་པ་ཡི་ཚེ་འདི་ལ། ། ཐང་གཅིག་འདུག་པའི་བློ་ཅན་ཏེ། ། དེ་ནི་ཤིན་ཏུ་འཁྲུལ་བ་སྟེ། ། མཁའ་འགྲོ་མ་ཡི་རྫུ་འཕྲུལ་བཞིན། ། དེ་ཕྱིར་རྟག་པའི་སེམས་མི་བསྐྱེད། ། ངན་སོང་གསུམ་པོ་དྲན་པར་བྱ། ། རྫུན་སོགས་ངག་གི་ཉེས་པ་སྤང་། ། དེ་བཞིན་ཡིད་ཀྱི་ཉེས་པ་སྤང་། ། མ་ལུས་རབ་ཏུ་བསྡམ་པར་བྱ། ། དེ་ནི་སྐྱེས་བུ་དམ་པའི་ཚུལ། ། རབ་ཏུ་ཚ་ཞིང་གྲང་བ་ཡི། ། དམྱལ་བ་ཉི་མ་གཅིག་བཞིན་དྲན། ། བཀྲེས་སྐོམ་དག་གིས་རིད་པ་ཡི། ། ཡི་དྭགས་རྣམས་ཀྱང་དྲན་པར་བྱ། ། རྨོངས་པའི་སྡུག་བསྔལ་རབ་མང་བའི། ། བྱོལ་སོང་ལྟ་ཞིང་དྲན་པར་བྱ། ། དེ་རྒྱུ་རྣམས་སྤང་བདེ་རྒྱུ་འབད། ། ཐོབ་དཀའ་འཛམ་གླིང་མི་ཡི་ལུས། ། དེ་ཐོབ་དུས་སུ་ངན་སོང་རྒྱུ། ། རབ་ཏུ་བསྒྲིམས་ཏེ་བཅད་པར་བྱ། ། འདིར་བདག་མི་ཡི་ལུས་ཐོབ་ནས། ། ཕྱི་མར་སྨོན་ལམ་འདེབས་བྱེད་པ། ། དེ་ནི་བླུན་པོ་ལེ་ལོ་ཅན། ། ངན་སོང་གནས་སུ་རབ་འགྱོད་དེ། ། གྲོ་བཞིན་སྐྱེས་ཀྱི་རྡོ་འཇོག་གི ། ། ཡི་དྭགས་མཐོང་བ་ཇི་བཞིན་ནོ། ། འདི་ཡི་ཚེ་ནི་མ་ངེས་པས། ། དེ་རིང་སང་ངམ་ཟླ་བ་འམ། ། ལེ་ལོའི་རྣམ་པ་འཆི་འགྱུར་ཏེ། ། དེ་ཕྱིར་དགེ་ལ་བརྩོན་པར་བྱ། ། དམ་པའི་ཆོས་ལ་རབ་ཏུ་འཇུག་ན། ། རིག་ངན་གཤམ་མོ་ལྟ་བུ་དང་། ། འཁོར་ལོས་བསྒྱུར་བའི་རྒྱལ་པོ་ཡང་། ། བྲན་པོ་བཙུན་མོར་ཐུབ་པས་གསུངས། ། དམ་པའི་ཆོས་ལ་མི་འཇུག་ཅིང་། ། འཇིག་རྟེན་ཁྲེལ་ལྟས་མི་སྲུང་བ། ། ཤིན་ཏུ་སྨད་ཅིང་བཤུང་འགྱུར་ཏེ། ། བྷི་ར་ལི་བའི་དཀའ་ཐུབ་བཞིན། ། རི་བྲག་འདོམ་གང་སོགས་ཡོད་ཟབ། ། དེ་ལའང་རབ་ཏུ་སྲུང་བྱེད་ན། ། ཤིན་ཏུ་གཏིང་མེད་གྱུར་པ་ཡི། ། གཡང་སར་ལྷུང་བ་ཅིས་མི་སྲུང་། ། ཡུངས་འབྲུ་ཙམ་གྱི་རྨ་ཁུང་ཡང་། ། ཤིན་ཏུ་བསྒྲིམས་ཏེ་འཆོས་བྱེད་ན། ། འཚོ་མེད་ཚལ་བར་འགས་པ་ཡི། ། རྨ་དེ་ཅི་ཕྱིར་འཆོས་མི་བྱེད། ། ཉིན་པར་འགའ་ཟུང་ཙམ་དུ་ཡང་། ། ཟས་སྒོམ་གྱིས་དབུལ་མི་བཟོད་ན། ། བར་གྱི་བསྐལ་པ་ལ་སོགས་སུ། ། ཟས་གོས་མི་མྱོང་ཅི་ཕྱིར་བཟོད། ། རང་ལུས་དག་ལ་ཚེར་མ་ཡི། ། རྩེ་མོའང་བཟོད་པར་མི་འགྱུར་ན། ། གཞན་གྱི་ལུས་ལ་མཚོན་དག་གིས། ། སྲོག་དང་འབྲེལ་བ་ཅི་ཕྱིར་བཟོད། ། རྨ་འབུ་དུག་རྡེའུ་ཤིང་སྲིན་དང་། ། ས་བོན་མྱུ་གུ་སྡོང་སྐྱེས་དང་། ། དེ་བཞིན་ངན་པའི་མི་རྣམས་ནི། ། རང་རྟེན་ཁོ་ན་འཕུང་བ་སྒྲུབ། ། ཕྱི་མ་ཤེས་མ་མཛངས་མའི་ཚུལ། ། ཉོན་མོངས་དགྲ་ཐུལ་དཔའ་བོའི་ཚུལ། ། ཆགས་པ་མེད་པ་ཆོས་བྱེད་ཚུལ། ། མཁས་པའི་ཚུལ་ནི་རྟོགས་པ་ཡིན། ། རྟོགས་པའི་ཚུལ་ནི་བྱེད་པ་ཡིན། ། འགྱོད་པ་མེད་ནི་སྦྱིན་པའི་ཚུལ། ། ཚུལ་ཁྲིམས་ཚུལ་ནི་མ་བཅོས་པ། ། བཟོད་པའི་ཚུལ་ནི་ཆོས་ཉིད་ཤེས། ། བརྩོན་འགྲུས་ཚུལ་ནི་འཆི་བ་དྲན། ། བསམ་གཏན་ཚུལ་ནི་གཡེང་བ་མེད། ། རྣམ་པར་འབྱེད་ཤེས་ཤེས་རབ་ཚུལ། ། སངས་རྒྱས་འདོད་པ་དད་པའི་ཚུལ། ། རྟོག་པ་ཆུང་བ་རྣལ་འབྱོར་ཚུལ། ། ཟང་ཟིང་གཉེན་བྲལ་སྒོམ་མཁན་ཚུལ། ། ཕན་སེམས་ཆེ་བ་སྒྲིན་པའི་ཚུལ། ། དྲང་པོའི་ཚུལ་ནི་མི་བསླུ་བ། ། བག་ཡོད་ཉམ་ང་མེད་པ་གང་། ། དེ་ནི་རྒྱལ་པོའི་ཚུལ་དུ་བཤད། ། དེ་ཡི་ཚུལ་དང་མི་ལྡན་པ། ། དམན་ཞིང་སྨད་པའི་ཚུལ་བྱེད་པ། ། ལས་ཀྱི་རྒྱུ་འབྲས་མི་བསླུའི་ཚུལ། ། འོག་གི་ཚུལ་ནི་འདི་བཞིན་ནོ། ། ཡོ་བྱད་ལྡན་ལ་སེར་རྣས་བཅིངས། ། བསླངས་ན་ཁྲོ་བ་དང་བཅས་པ། ། སྡུག་བསྔལ་ཆེན་པོས་ནོན་གྱུར་ཏེ། ། ཤུམ་མ་རི་ཡི་མི་སྡུག་བཞིན། ། མཉམ་སོགས་དག་ལ་ཕྲག་མི་དོག འདིར་ཡང་སྡུག་བསྔལ་ཆེ་འགྱུར་ལ། ། ཕྱི་མར་རྣམ་སྨིན་ཆེ་འགྱུར་ཏེ། ། དཔེར་ན་གཞོན་ནུ་ཝ་དང་འདྲ། ། དྲེག་མེད་ཤིན་ཏུ་དུལ་བ་བྱ། ། ཀུན་ལ་གསོང་པོར་སྨྲ་བར་བྱ། ། ཁྲོ་མེད་ང་རྒྱལ་སྤང་བར་བྱ། ། ཀུནལ་འཛུམ་བཞིན་དྲང་པོར་སྨྲ། ། དོན་མེད་ཅལ་ཅོལ་སྨྲ་མི་བྱ། ། འདུ་བ་མང་པོའི་སར་མི་འགྲོ། ། ཆང་སོགས་མྱོས་པ་བཏུང་མི་བྱ། ། ཅི་འདོད་སྦྱིནལ་ཡངས་པར་བྱ། ། བཤེས་མེད་མི་ལ་བྱམས་པར་བྱ། ། དགེ་བའི་ཆོས་ལ་བརྩོན་པར་བྱ། ། ཁྲིམས་སོགས་བླངས་ལ་བསྲུང་བར་བྱ། ། དེ་ལྟར་བྱས་ན་མང་པོའི་མི། ། ངང་གིས་བདེ་བ་འཐོབ་པར་འགྱུར། ། ད་ལྟ་ཤིན་ཏུ་ངན་པའི་མིས། ། རྒྱལ་བའི་བསྟན་པ་ནུབ་ཏུ་ཉེ། ། ད་ནི་མནའ་སྔགས་ངན་སྤྱོད་དང་། ། ལོག་པའི་ལྟ་བ་མང་བ་ཡི། ། རྨོངས་པ་དག་གིས་བཅོམ་ལྡན་གྱི། ། བསྟན་པའི་ལྗོན་ཤིང་བཅད་ཀྱིས་མེད། ། ད་ནི་སྙིང་རྗེ་མེད་པ་ཡིས། ། ཆོས་ལུགས་བོར་ཞིང་རང་བཟོ་བྱེད། ། བརྐམ་ཆགས་ཕ་རོལ་མ་མཐོང་བས། ། བསྟན་པའི་རྒྱལ་མཚན་བསྙལ་གྱིས་མེད། ། ད་ནི་གདུལ་དཀའ་ངོ་ཚ་མེད། ། སྡིག་ལ་དགའ་ཞིང་ཚུལ་འཆོས་བྱེད། ། སྡིག་ཅན་རྣམས་ཀྱིས་ཐུབ་པ་ཡི། ། བསྟན་པའི་ཟམ་པ་བཅག་གིས་མེད། ། ད་ནི་མགོ་བྲེགས་ཉམས་མི་ལེན། ། སྤྱོད་འཆལ་སྨད་པ་ལུས་ལ་འཆོས། ། ངན་གཡོ་ཅན་གྱིས་ཐུབ་པ་ཡི། ། བསྟན་པའི་ཚོགས་འདུས་བཅོམ་གྱིས་མེད། ། ད་ནི་ཁྲོ་དང་ང་རྒྱལ་དང་། ། རྒྱགས་ཆོས་བྱེད་ཅིང་རྙེད་ལ་ཞེན། ། སྡིག་པ་སྣ་ཚོགས་བྱེད་པའི་མིས། ། ཆོས་ཀྱི་གྲུ་བོ་བཅག་གིས་མེད། ། ད་ནི་ཐུབ་པའི་བསྟན་པ་ཡང་། ། ཅུང་ཟད་ཙམ་ཞིག་ལུས་པར་ཟད། ། ཐུབ་པའི་བསྟན་པ་གངས་ཆེན་མཚོ། ། རང་པོར་མི་ཐོགས་སྐམ་པར་འགྱུར། ། སེང་གེའི་སྒྲ་ཡི་བསྟན་པ་ནི། ། དུས་ཀྱི་འཁོར་ལོས་རབ་བཅོམ་ནས། ། མྱུར་བ་ཉིད་དུ་འཇིག་པར་འགྱུར། ། གང་དག་འདི་འདྲའི་དུས་བབ་ཚེ། ། བདེ་འདོད་རྣམས་ཀྱིས་ཕན་པའི་དོན། ། ད་ནི་ལེགས་པར་བརྟག་པའི་རིགས། ། དུས་ཀྱི་འཁོར་ལོ་ངན་བྱེད་པ། ། ཡ་རབས་ཤེས་རབ་ལྡན་དང་། ། ཚུལ་ཅན་དག་དང་བསྟེན་མི་ཤེས། ། ཉེས་པ་བསྟེན་ཅིང་ཚུལ་ཁྲིམས་སྤངས། ། དབེན་པས་འཇིགས་ཤིང་འདུ་འཛི་འདོད། ། མི་མཁས་བསླབ་ཉེས་སློབ་དཔོན་ནོར། ། གདུག་རྩུབ་ང་རྒྱལ་བརྙས་པ་ཆེ། ། ངན་པའི་མི་ལ་ཡིད་རྟོན་པས། ། སངས་རྒྱས་བསྟན་པ་མ་རུང་བྱེད། ། ཞི་ཞིང་བདེ་བའི་དུས་ནི་ཟད། ། གདུག་རྩུབ་མི་བཟད་དུས་ནི་བྱུང། ། ཤེས་རབ་ཅན་གྱི་མི་རྣམས་དང་། ། དཔང་གྱུར་སྐྱེ་བོ་རྣམས་ནི་ཟད། ། གང་ཞིག་དེ་ལྟའི་དུས་བྱུང་ཚེ། ། རང་གི་ཡུལ་འཁོར་གནས་སྤངས་ཏེ། ། གཞན་གྱི་ལྗོངས་སུ་ཕྱིན་པ་ནི། ། དེ་ཡང་ནགས་འདབ་དབེན་པ་རུ། ། སྨྲ་བ་བསྐྱུངས་ཏེ་གནས་པར་བྱ། ། དཀར་པོའི་ཆོས་རྣམས་ཡིད་ལ་མི་འཇོག་སྐྱེ་བོ་རྣམས་ལ་ནི། ། མི་ཆོས་ཕུལ་དུ་བྱུང་བ་ཡིད་ལ་འཇོག་པ་དེ་ཉིད་ནི། ། ཅུང་ཟད་དགེ་བར་གྱུར་ན་སྙམ་ནས་བྲིས་པའི་དགེ་བ་ཡིས། ། བློ་མུན་མ་ལུས་སྒྲོལ་ཞིང་བསྟན་བཅོས་ཡུན་དུ་གནས་པར་ཤོག