འོད་ཀྱི་ཕུང་པོ། 　　　　　
བོད་ཀྱི་ས་ཆེན་མཐའ་ནས་སྲུང་བའི་ཁམས་ཕྱོགས་ས་འཛིན་ཡུལ་གྲུ་རུ། །
ལེགས་འཁྲུངས་དུང་གི་ཟླ་བ་གཞོན་ནུ་འཛུམ་པའི་འོད་ཀྱི་བདག་ཉིད་ཅན། །
ཡིད་འོངས་མཛེས་སྡུག་མདངས་ཀྱིས་སྤྲས་པའི་འོད་དཀར་ཕུང་པོའི་ལང་ཚོ་ཡི། །
ཁམས་པའི་འཛུམ་མདངས་ཆོལ་གསུམ་སྐྱེ་བོའི་ཀུ་མུད་དགྱེས་པའི་དཔལ་དུ་ཆས། །
 
རིགས་ཀྱི་ཟུངས་ཁྲག་ཁོག་ན་འཕྱུར་བའི་ལྷག་བསམ་ཅན་གྱི་མི་བུ་གང་།།
སྨད་ཀྱི་ཕྱོགས་སུ་ཟིང་ཟིང་གྲོང་པ་དར་རྩེ་མདོ་ཞེས་གྲགས་པ་རུ། །
རང་སྐད་རང་ཡིག་བཙན་ས་ཟིན་པའི་ཚགས་པར་གྲུ་བཞིའི་ངོ་བོ་ཅན། །
ཁམས་པའི་འཛུམ་མདངས་མི་ཡུལ་བརྫངས་པ་ཞེན་པ་དཀར་པོའི་་དྲིན་ལས་མེད། །
 
དཔྱིད་ཀྱི་མེ་ཏོག་ལྷུག་པོར་བཞད་སར་ཁམས་ཀྱི་མི་སྣའི་མཛད་རྗེས་གསལ། །
དབྱར་གྱི་ལང་ཚོ་མཛེས་སྡུག་ངོམ་སར་དམངས་ཁྲོད་རྩོམ་རིག་བཅུད་ཀྱིས་བལྟམས། །
སྟོན་གྱི་སྙེ་མ་མགོ་ལྕོག་ལྡེམ་སར་རྩོམ་རིག་འབྲས་བཟང་གཡུར་དུ་སྨིན། །
དགུན་གྱི་འཛུམ་མདངས་རིམ་གྱིས་བཞད་སར་སྣོད་བཅུད་མཛེས་སྡུག་ལྷག་ཏུ་བཀྲ། །
 
བཞག་བྲ་ལྷ་རྩེའི་བང་མཛོད་ཁྲོད་ན་འོད་དུ་འབར་བ་ཁྱོད་ཉིད་ཙམ། །
གངས་དཀར་རི་བོའི་རྩེ་རུ་འགྱིང་བའི་གངས་ཀྱི་སེང་ཕྲུག་ཁྱོད་ཉིད་ཙམ། །
རྒྱལ་མོ་དངུལ་ཆུར་འཁྱུག་རྩལ་ངོམ་པའི་གསེར་མིག་ཉ་མོ་ཁྱོད་ཉིད་ཙམ།།
ཁམས་པའི་འཛུམ་མདངས་ས་ཆེན་འདི་ཡི་ཕང་ནས་འཛུམ་པའི་རྒྱན་དུ་མཚར། །
 
རིགས་ཀྱི་རྒྱལ་སྲས་གངས་ལས་འཁྲུངས་ནས་ཟླ་འཁོར་བརྒྱ་ཡི་ཉིན་མོ་འདིར། །
ཞབས་རྗེས་རི་མོ་གངས་ལས་བཞག་པ་ངོ་མཚར་སྟོང་གི་མཛེས་སྡུག་སྤུད། །
རིགས་མཐུན་སྤུན་གྱིས་གཉོར་ཞིང་སྐྱོང་ནས་གོམ་བརྒྱ་སྤོས་པའི་ཉིན་མོ་འདིར། །
རྒྱལ་ཁའི་ཁ་གཡང་མཐོ་རུ་སྒྲོག་ནས་ཁྱེད་ལ་ཤིས་པའི་མེ་ཏོག་འཐོར། ། 
                                        རྒྱལ་ལྡོང་བ།
 

སྙིམ་མཐིལ་གྱིས་བཏེགས་པའི་ཁ་བཏགས།
ཆོལ་གསུམ་མཛེས་རྒྱན་གསེར་ལྡན་འཛིན་མའི་སྤོར།།
ཆུ་གཉིས་དལ་གྱིས་འབབ་པའི་འདྲེས་མདོ་ན།།
གངས་ལྗོངས་གཙུག་ལག་ཉིང་བཅུད་འཁྱིལ་བའི་གཏེར།།
《ཁམས་པའི་འཛུམ་མདངས་》ལྔ་རིག་གན་མཛོད་ཉིད།།
ཟབ་ཡངས་ཤེས་བྱ་མ་ལུས་ཀུན་འདུས་པའི།།
ཇི་སྙེད་ཆོས་ཀུན་གསལ་བའི་མེ་ལོང་ཞེས།།
དྲང་སྲོང་རྒན་པོའི་བདེན་ཚིག་དུང་གི་སྒྲ།།
སྐལ་ལྡན་སྐྱེ་བོའི་ཡིད་ཀྱི་གསོས་སུ་འབེབས།།
 
རང་ལྟ་མཆོག་འཛིན་ལོག་བཤད་དུག་ནད་ཀྱིས།།
བདེན་དོན་མཛའ་མོ་གདུང་བས་གཙེས་པ་ན།།
ཁྱེད་ནི་ལོག་རྟོག་འཇོམས་པའི་སྨན་མཆོག་ཅེས།།
《ཁམས་པའི་འཛུམ་མདངས་》མཚན་གྱི་སྙན་པ་འཕུར།།
  
རྨད་བྱུང་དགེ་མཚན་འབུམ་གྱི་སྤྲིན་རུམ་ལས།།
བྱུང་བའི《ཁམས་པའི་འཛུམ་མདངས་》དབྱར་སྐྱེས་སྒྲས།།
བློ་གསལ་མདོངས་མཐའ་དགའ་བའི་གར་ལ་བྲེལ།།
ལེགས་བྱས་དགེ་ལེགས་དཔལ་འདིའི་མཐའ་མ་རིག།།
                     སྐུ་བཅར་འོད་ཟེར།

ཆུ་འཛིན་བུ་མོ།
མུ་མེད་བསམ་བློའི་ཞིང་སར་ཆ་འཕྲིན་ཆུ་བཅུད་དཀོན་པའི་དུས༎
སྒྱུ་རྩལ་ལ་སོགས་ལོ་ཏོག་འཕེལ་ཁ་མི་ལེགས་ས་འོག་རུལ༎
སོ་སོའི་སྟོང་རྨུས་ཡིད་སེམས་དོན་མེད་རླུང་གིས་དཀྲུག་པའི་ཚེ༎
ཨེ་མ་ངོ་མཚར་ཆུ་འཛིན་བུ་མོ་དབྱིངས་སུ་འཕུར་བར་ལྟོས༎
 
ཕུལ་བྱུང་གཞོན་ནུ་འགའ་ཡི་མི་ཆད་བརྩོན་པའི་མཐུ་སྟོབས་ལས༎
ངོ་མཚར་ཆུ་འཛིན་བུ་མོ་རི་ཆུ་ཐང་གསུམ་བརྒལ་ནས་སྐྱོད༎
མི་ཡུལ་རང་ཡུལ་ཀུན་གྱི་དཔལ་ཡོན་ཉིང་བཅུད་ཀུན་བསྡུས་ཏེ།།
ཁམས་པའི་གཞི་ཆེན་དབྱིངས་སུ་ཁུར་གྱིས་ལྕི་ནས་ཕེབས་པ་མཚར༎
 
ཆུ་འཛིན་བུ་མོའི་ངོ་མཚར་རྒྱས་སྤྲོས་སྒུག་པའི་སྐྱེ་བོའི་ཚོགས༎
སྣ་ཚོགས་ཡིད་ཀྱི་ལོངས་སྤྱོད་རྩོམ་པར་དབང་པོ་སངས་ནས་ཡོང་༎
ཆུ་འཛིན་ངོས་ནས་ཆ་འཕྲིན་རྫོགས་མེད་རྣམ་པ་རབ་བཀྲ་བས༎
རིག་ལྡན་ཆར་ཟེགས་འོག་ཏུ་མྱོས་ནས་གླུ་གར་བརྩམས་པ་རྨད༎
 
ངོ་མཚར་ཆུ་འཛིན་སྔོན་མོ་ལས་མཆེད་ཁམས་པའི་འཛུམ་ཟེར་འདིས༎
ཤེས་བྱ་རིག་པའི་སྣ་ཚོགས་འབྲས་བཟང་ཀུན་གྱི་མིག་སྔར་གཤོམ༎
བདག་གི་བློ་ངོར་ཤར་བའི་ཁྱད་མཚར་ལྟ་བའི་འབྲས་བཟང་ཡང་༎
སྲིད་མཐར་ཁྱེར་ནས་སོང་བས་སྤྲིན་གྱི་ཕོ་ཉ་བདག་གི་རྒྱན།།
རྣམ་རྒྱལ།