སྙན་ངག་འབྲི་བ་ནི་སྐྱེས་ཆེན་སུ་ཞིག་གི་རླུང་རྟ་དར་བས་མ་ཡིན་ལ།

སྙན་ངག་འབྲི་བ་ནི་ནམ་མཁའ་མཐོ་ཞིང་ས་གཞི་དམའ་བས་ཀྱང་མ་ཡིན།

སྙན་ངག་འབྲི་བ་ནི་རང་ནོམ་རྩ་ཆེན་ཞིག་ཕྱི་རུ་ངོམ་པ་དེ་མིན་ལ།

སྙན་ངག་འབྲི་བ་ནི་བུད་མེད་ཅིག་གི་ཆེད་དུ་མིག་ཆུ་གཏོང་བའང་མ་ཡིན།

སྙན་ངག་འབྲི་བ་ནི་ཚོར་རྟོགས་རིགས་ཤིག་ལ་དཔུང་འཇུག་བྱེད་པ་དེ་འདྲ་མིན་པར་མ་ཟད་།

རྟོག་གེ་བའི་གསང་ཚིག་ཞིག་ལ་འགྲེལ་སྟངས་གསར་བ་ཞིག་བཟོ་བ་དེ་འདྲའང་ག་ལ་ཡིན།

སྙན་ངག་འབྲི་བ་དེ་བྱིས་པ་བསམ་མེད་ཚོ་དང་འབྲེལ་བ་ཡེ་ནས་མེད་ཅིང་།

སྙན་ངག་འབྲི་བ་དེ་རྒན་ཡོལ་བྱས་ཟིན་པ་དག་དང་བར་ཐག་ཧ་ཅང་རིང་།།

སྙན་ངག་འབྲི་བ་དེ་གློག་དམར་ཞིག་འཁྱུག་ཙམ་བྱས་པ་དང་འདྲ་བར་སྣང་ཡང་།

སྙན་ངག་འབྲི་བ་དེས་དྲག་ཆར་དང་ཤྭ་འོད་སློང་བར་མི་བྱེད།

སྙན་ངག་འབྲི་བ་ནི་མི་རེ་རེར་ཡོད་པའི་འཇོན་ཐང་ཞིག་མིན་ལ།

སྙན་ངག་འབྲི་བ་ནི་མི་གཅིག་ཁོ་ནའི་ལས་ཀ་ཞིག་ཀྱང་ག་ལ་ཡིན།

སྙན་ངག་འབྲི་བ་ནི་ཐུན་མོང་གི་ལོངས་སྤྱོད་ཅིག་ཡིན་ན་འགྲིག་ནས་ཡོད་མོད།

སྙན་ངག་དེ་ཐུན་མོང་གིས་བྲིས་པ་ཡིན་ན་གོ་འཛོལ་ཐེབས་ཡོང་།

སྙན་ངག་འབྲི་བ་ནི་ཉལ་ཐ་འཐེན་པ་དང་གཤང་འཚོང་ཁང་དུ་འགྲོ་བ་མིན་ཞིང་།

སྙན་ངག་འབྲི་བ་ནི་མེ་མདའ་དང་འགལ་རྫས་ཀྱི་ལྐོག་འཚོང་ཀྱང་མ་ཡིན།

སྙན་ངག་འབྲི་བ་དེ་དམག་དཔོན་ཚོས་གཡལ་འཐབ་འཐེན་པ་དང་འདྲ་བར་སྣང་མོད།

སྙན་ངག་འབྲི་བ་དེ་མེ་མདའ་མེད་པའི་བོའུ་སྟོང་རྒྱག་པ་དེ་འདྲ་ག་ལ་ཡིན་ཨང་།

སྙན་ངག་བྲིས་ན་ཁྱོད་ཀྱི་ཤ་མདངས་དཀར་པོར་འགྲོ་མི་ཐུབ་ཅིང་།

སྙན་ངག་བྲིས་ན་ཁྱོད་ལ་ཁྱད་པར་ཅན་གྱི་རླུང་རྟ་ཞིག་ཀྱང་རྒྱུགས་མི་སྲིད།

སྙན་ངག་དེ་རྒྱ་མཚོ་ཆེན་པོའི་ནང་གི་ནོར་བུ་མིན་པས་ན།

སྙན་ངག་པའང་ཚོང་དཔོན་ཟླ་བ་བཟང་པོ་ག་ལ་ཡིན།

སྙན་ངག་ལ་རང་གི་ཁྱད་ཆོས་ཤིག་ཡོད་ན་འགྲིག་པར་འདུག་ལ།།

སྙན་ངག་ལ་རུལ་དྲི་ཞིག་དང་འདམ་མྱགས་ཀྱི་དྲི་ཞིག་ཀྱང་ཡོད་པར་འོས།

སྙན་ངག་ནི་གནམ་ལ་འཕུར་དགུ་མ་ཡིན་ལ།

སྙན་ངག་ནི་ས་ལ་འཛུལ་དགུའང་མ་ཡིན།

སྙན་ངག་དེ་སྨར་སྐམ་ཉི་མ་ཐག་བརྟོད་ཀྱིས་ནམ་མཁའ་མཐོ་ས་ཞིག་ཏུ་བཏེགས་མེད་ལ།

སྙན་ངག་དེ་ཨ་ལྕགས་གཡའ་མ་མེ་འབུད་ཀྱིས་མེ་ཐབ་ཚ་མོ་ཞིག་ཏུ་བསྒོངས་ཡང་མེད།

སྙན་ངག་གིས་སྲིད་པའི་བ་ཆུང་བཤའ་མི་ཤེས་ལ།

ནམ་མཁའི་སྐར་མ་བླངས་ནས་བྱིས་པ་ཚོའི་ངུ་ཁ་ལེན་སྤྱད་ཀྱང་ག་ལ་ནུས།

སྙན་ངག་གིས་ཁྱི་རྒྱག་གི་དབྱུག་པའང་མི་ཉན་པས།

སྙན་ངག་དང་བར་ཐག་ཅི་ཙམ་རིང་ན་ཁྱོད་རང་དེ་ཙམ་གྱིས་མཁས་པར་འགྱུར་སྲིད།

སྙན་ངག་འབྲི་བ་ནི་གཡང་ཚང་གི་མར་སྒམ་རྙེད་པས་མ་ཡིན་ལ།

སྙན་ངག་འབྲི་བ་ནི་རླུང་རྟ་ལྷག་མ་ཞིག་བརྒྱུགས་པར་སྒུག་པའང་མ་ཡིན།

སྙན་ངག་བྲིས་ན་ཁྱོད་རང་དུས་དང་དུས་སུ་དབུལ་པོར་འགྱུར་སྲིད་ཅིང་།

སྙན་ངག་བྲིས་ན་ཁྱོད་རང་རྒས་ཤིང་འཁོགས་པར་གྱུར་ཏེ།

སྡོང་རྒན་ཞིག་ལྟར་ཚོར་བ་ཡང་ཡོད་མི་སྲིད།

སྙན་ངག་བྲིས་ན་ཁྱོད་ཀྱི་སྐྲ་ལོ་བྱི་བར་འགྱུར་ལ།

སྙན་ངག་མ་བྲིས་ན་ཁྱོད་ཀྱི་སོ་ཕྲེང་ཀྱང་ཐོར་ནས་ཚར་ངེས།

སྙན་ངག་འབྲི་བ་དེ་མ་རབས་ཐ་ཆད་ཀྱི་བྱ་སྤྱོད་ཅིག་སྟེ།

ཞི་ཐེ་ལེའི་མི་གཤིས་ལས་ཀྱང་སྡུག་པར་སྣང་ཞིང་།

སྙན་ངག་བྲིས་ན་ཆང་འདྲེ་ཟེར་བ་ཞིག་ཀྱང་འཁོར་རྒྱུ་ཡོད་སྐད།

སྙན་ངག་གཏན་ནས་མ་བྲིས་ནའང་དེ་འདྲ་ཞིག་འགྲིག་གི་མེད་པར་སྣང་ཞིང་།

སྙན་ངག་མ་བྲིས་ནའང་མྱི་ཁ་དེ་སྔར་བཞིན་འཁོར་ནས་ཐོན་ཡོང་།

སྙན་ངག་ལ་འཇིག་རྟེན་མཐུན་འཇུག་གི་ཆང་ས་བརྒྱབ་པ་ནས་བཟུང་།

སྙན་ངག་ལ་འཐོར་ཐབས་དང་གཤོལ་ཐབས་ཤིག་ཡེ་ནས་མི་འདུག