ཁྱོད་ཀྱིས་བསམས་ན་འཇིག་རྟེན་འདིར།
ང་ལ་ཅི་ཡང་ཐོབ་མེད།
ངས་རང་ཉིད་ཀྱི་བསམ་བློ་བདག་འཛིན་ཐུབ་ཡོད།
རང་ཚུགས་དང་སྤོབས་སེམས་བདག་འཛིན་ཐུབ་ཡོད།
ངས་རང་ཉིད་ཀྱི་བླ་སྲོག་ལ་ཚ་འདྲི་ཡང་ཡང་བྱས་རྗེས།
འཇིག་རྟེན་འདིར།ང་ནི་ཕྱུག་པོ་ཡིན་པའི་ངེས་ཤེས་འདྲོངས།
ངས་ཅིའི་ཕྱིར་མགོ་འཕང་དགུང་ལ་བཏེགས་ཏེ་སྣང་བ་གླུ་རུ་གྱེར་མི་ཆོག
ངས་ཅིའི་ཕྱིར་བྲན་མོའི་གཤིས་ཀ་དོར་ཏེ་རང་དབང་གི་ཉི་འོད་སྙེག་མི་ཆོག
ང་ལའང་དྲག་ཏུ་ལྡིང་བའི་སྙིང་ཡོད།
སྟོབས་ཀྱིས་རྒྱུ་བའི་ཁྲག་ཡོད།
ཅིའི་ཕྱིར།
ངའི་བརྗོད་འདོད་ཀྱི་སྨྲ་བ་འགག་དགོས།
ངའི་བསམ་གཞིག་གི་སྒོ་མོ་གཏན་དགོས།
ངའི་སྤོབས་སེམས་ཀྱི་རྩེ་མོ་གཏུབ་དགོས།
འཇིག་རྟེན་འདི་ཐུན་མོང་གིས་བསྐྲུན་པ་ཡིན།
ཐུན་མོང་གི་འཇིག་རྟེན་འདི་རུ།
ཟླ་བའི་འཁོར་འདབས་ཁྲི་འབུམ་སྐར་ཚོམ་གྱིས་བརྒྱན་ཅིང་།
པད་མའི་སྐྱེད་ཚལ་སྣ་བརྒྱ་མེ་ཏོག་གིས་མཛེས་ན།
ཁྱོད་དང་ང་ཡང་འཆམ་མཐུན་ཡིན་པ་བརྗེད་སོང་ངམ།
ཅིའི་ཕྱིར།ང་དགའ་དུས་དགོད་མི་རུང་ལ་སྐྱོ་དུས་ངུ་མི་ཆོག
ཅིའི་ཕྱིར།ངའི་ཆགས་སྡང་གི་ཚོར་ཤེས་དུར་འཇུག་བྱེད་དགོས།
ཅིའི་ཕྱིར།ངའི་ཕྱི་ནང་གི་ཉམས་འགྱུར་སྨག་ལ་སྟིམ་དགོས།
ཅིའི་ཕྱིར།ངའི་རང་དབང་གི་འཚོལ་ལམ་ཁ་བས་གནོན་དགོས།