བོད་ལྗོངས་ཀྱི་ཟིན་ཐོ།

གེ་སར།    སྦྲ་ཆར།    2012-10-10

               ལྷ་ས།
སེམས་ཀྱི་རྩིག་ལྡེབས་ངོས་སུ་འབྱར་བའི་ལྷ་ས།
ཆུང་དུས་ཨ་མས་བཤད་པའི་གནའ་གཏམ་གྱི་ཁྲོད་དུ་ཡོད།
མཚན་རེར་ཨ་ཕས་ཕྱེ་བའི་མར་མེའི་ཀློང་ན་ཡོད།
ལྷ་ཚོགས་དང་སྒྱུ་འཕྲུལ་གྱིས་ཕྱུག་པའི་རྡོ་ཡི་གྲོང་ཁྱེར་བསམས་ནས།།
སྨོན་འདུན་དང་རེ་སྒུག་གི་ཕ་མཐའ་ནས་ནར་སོན་དུས།
དད་འདུན་དང་ལྷག་བསམ་གྱིས་སྐྱོར་བའི་རྡོ་ཡི་གྲོང་ཁྱེར་བསམས་ནས།
དོགས་པ་དང་སོམ་ཉིའི་བར་སེང་ནས་ནར་སོན་དུས།
ལྷ་ས།  བྱ་རྒོད་ཀྱི་གཤོག་འོག་ན་འདར་གྱིན་འདུག
ལྷ་ས།  དྲན་སྣང་གི་ཕ་མཐའ་ན་འདར་གྱིན་འདུག

       བོད་ལྗོངས་ཀྱི་ཟིན་ཐོ།


     ཕ་བོང་ཁ།
རུས་སྦལ་གྱི་སྒལ་གཞུང་ལྟ་བུའི་ཕ་བོང་ཆེན་པོ།
དེའི་སྟེང་དུ་བཏབ་པའི་ཤེས་རིག་གི་གསེར་རྡོག་སུམ་ཅུ།
སྨག་གི་ཡོལ་རས་ཕྱེ་བ་ནས།  བདག་གི་ཐོན་མི།
བཙན་པོ་སྲོང་བཙན་གྱི་ཉི་མས་ཕྱོགས་བཞིའི་མུན་པ་སེལ་སོང་ཨང་།
སེམས་ཀྱི་རླབས་སྒྲ་མ་འཇགས་གོང་།
བློས་བསླང་གི་ཁྲོད་ནས་བཙན་བློན་གཉིས་ཀྱི་སྐུ་བརྙན་མཐོང་།
རེ་བའི་འཆར་སྣང་ཡལ་ཤུལ་དུ།
རྒས་འཁོགས་ཀྱི་དགེ་འདུན་ཞིག་ཕྱི་སྐོར་ལ་འགྲོ་བཞིན་པ་མཐོང་།
            ཡུམ་བུ་བརླ་མཁར།
ཡུམ་བུ་བརླ་མཁར།
ཡུ་མོའི་བརླ་ཤ་དང་མཚུངས་པའི་རི་སྒང་དུ་ཕབ་པ་ནས་བཟུང་།
ལོ་རྒྱུས་ཀྱི་ཁྲག་རྒྱུན་གསོན་པོ་ཞིག་ཏུ་རང་བཞིན་གྱིས་གྲུབ་སོང་ལ།
བཙན་པོ་དང་བཙུན་མོས་རྒྱང་གཟིགས་གནང་སའི་ལྡིང་ཁང་དུའང་གྲུབ་སོང་།
ཡུམ་བུ་བརླ་མཁར།
ཆར་ཞོད་ཐེངས་ཤིག་གིས་ང་ཚོའི་ངོ་གདོང་དང་ཡིད་སེམས་བརླན་དུས།
ཁྱོད་ནི་འཇའ་ཚོན་གྱི་ཀློང་ན་དབྱིངས་སུ་སྙེག་པའི་ཕོ་བྲང་ཁེར་རྐྱང་ཞིག་ཨང་།
  • ལེ་ཚན་སྔོན་མ།:མགོན་གཡག་ལ་བསྔགས་པ།
  • ལེ་ཚན་རྗེས་མ།:ཅིའི་ཕྱིར།