མ་རིག་མུན་པ་སེལ་ལ་འཇིག་རྟེན་མིག །
མ་ནོར་ལམ་བཟང་སྟོན་ལ་མཁས་པའི་དབང་། །
གདུལ་བྱ་ཁྲི་སྟོང་སྐྱོང་ལ་མ་མ་བཞིན། །
དྲིན་ཅན་སློབ་དཔོན་དམ་པར་གུས་པས་འདུད། །
སྙན་པའི་རྒྱན་གྱུར་དྲི་མེད་ལེགས་བཤད་གསུང་། །
སེམས་ཅན་མ་ལུས་རིས་མེད་སྐྱོང་བའི་ཐུགས། །
གྲགས་པའི་དཔལ་གྱི་གཟི་འོད་འཚེར་བའི་སྐུ། །
གཞར་ཡང་ཁོ་བོའི་སྙིང་ཁའི་དབུས་སུ་བཞུགས། །
ཁོ་བོས་ཡུན་རིང་བསགས་པའི་ཉམས་མྱོང་དང་། །
བསླད་མེད་ལྷག་བསམ་དག་པའི་ཀུན་སློང་གིས། །
གསར་སྐྱེས་གཞོན་ནུའི་ཚོགས་ལ་སྙིང་གི་གཏམ། །
རིས་མེད་བརྗོད་པ་རེ་ཞིག་གསན་པར་འཚལ། །
ཤེས་རིག་ཡོན་ཏན་ཀུན་གྱི་ཕན་འབྲས་དག །
གང་ཟག་སུས་ཀྱང་ངག་ལས་བརྗོད་སླ་ཡང་། །
རང་རྒྱུད་ངོས་ལ་ཤེས་བྱའི་ཆུ་སྐྱེས་ཚོགས། །
ལྷུག་པར་བཞད་པའི་སྐྱེས་བུ་ཤིན་ཏུ་དཀོན། །
རིན་ཆེན་གསེར་དངུལ་རིན་ཐང་ཆེ་ན་ཡང་། །
ཀུན་དགའ་དོན་གྲུབ་ཡོད་ན་སུར་ཡང་ཐོབ། །
བཅུ་ཕྲག་རིག་གནས་མིག་གིས་མཐོང་སླ་ཡང་། །
འབྱོར་ལྡན་སུས་ཀྱང་ཉོ་ཐབས་ག་ལ་མཆིས། །
རང་གི་རྒྱུད་ལ་ཡོན་ཏན་མ་འབྱོར་པའི། །
སྐྱེ་བོའི་ཕྱི་ཚུལ་མཛེས་ཀྱང་ག་ལ་ཕན། །
དེ་བཞིན་གོམ་ལག་མེད་པའི་འདོ་བ་ཡི། །
སྒ་ཆ་མཛེས་ཀྱང་མགྱོ གས་དར་ཐོབ་མི་དཔེ། །
དེང་གི་འཁོར་སྐར་གནམ་ལ་གཏོང་བ་དང་། །
འཕྲུལ་ལྡན་སྒྱོགས་མདའ་གླིང་བཞིར་འཕེན་པ་སོགས། །
ཀུན་ཀྱང་ཤེས་རབ་རྩལ་ལས་ཐོན་པས་ན། །
རིག་པའི་ཡོན་ཏན་མ་སྦྱངས་ག་ལ་ཆོག །
རྣམ་དཔྱོད་བློ་གྲོས་ཡངས་པའི་མཁས་དབང་རྣམས། །
བགྲང་བྱ་སྟོང་ཕྲག་བཞུགས་པའི་དཔེ་མེད་ཀྱང་། །
ཁོང་ཚོས་གནང་བའི་བླ་མེད་མཛད་རྗེས་དག །
བསྐལ་བརྒྱར་ཁྱབ་པ་སུས་ཀྱང་བསྙོན་དུ་མེད། །
དེང་རབས་སྤྱི་ཚོགས་འཕེལ་རྒྱས་མྱུར་ན་ཡང་། །
དཔལ་འབྱོར་འཛིན་པའི་དཔོན་རིགས་རབ་ཏུ་མང་། །
རིག་གནས་སློབ་གསོ་སྐྱོང་བའི་རྣམ་དཔྱོད་ཅན། །
བརྒྱ་ཕྲག་ལས་ཀྱང་གཅིག་དང་གཉིས་ཙམ་མོ། །
དཔལ་འབྱོར་ཤེས་རིག་སྤེལ་བའི་དུས་རབས་འདིར། །
འཛམ་གླིང་ཀུན་གྱི་འགྲན་རྩོད་གཙོ་བོ་སྟེ། །
ཤེས་རིག་དང་ནི་ཤེས་ལྡན་མི་སྣ་ཡི། །
བཟང་ངན་མཇུག་མཐའི་རྒྱལ་ཕམ་ཚད་གཞི་ལགས། །
རྗེས་ལུས་རྣམ་པ་མྱུར་དུ་རབ་བསྒྱུར་ཅིང་། །
ཚན་རིག་ལག་རྩལ་ཡོངས་སུ་དར་འདོད་ན། །
འཕྲལ་དུ་རིག་པའི་གནས་ཀྱི་སྒོ་མོ་ལ། །
འཇུག་པར་གྱིས་ཤིག་བུ་ཆུང་རྒོད་པོ་ལགས། །
ཟླ་བྲལ་མཁས་པའི་གཏམ་གྱི་རལ་གྲི་ཡིས། །
སེམས་ཀྱི་སྡུག་བསྔལ་མདུད་བརྒྱ་བཀྲོལ་བར་ནུས། །
ཡོན་ཏན་མེད་པའི་སྐྱེ་བོའི་ཁུ་ཚུར་གྱིས། །
ཕྱི་ཤ་གནོད་པ་ལས་གཞན་ཐབས་མ་མཆིས། །
མི་ཡི་འཛད་མེད་ནུས་སྟོབས་འབྱུང་ཁུངས་ཏེ། །
ཤེས་རིག་ཡོན་ཏན་འབའ་ཞིག་ཡིན་པ་དང་། །
ཤེས་བྱ་ཕུན་ཚོགས་རྒྱུད་ལ་ཞུགས་པ་ན། །
མི་ཚེའི་ལས་དབང་ཡིན་ཀྱང་བསྒྱུར་པར་ནུས། །
ལས་རིགས་གང་དང་གང་ལ་འཇུག་པའི་ཚེ། །
རྟེན་གཞི་ཤེས་རིག་ཡོན་ཏན་ལས་གཞན་མེད། །
མཐའ་ན་ཞིང་ཕྱུགས་ལས་རིགས་ཡིན་ན་ཡང་། །
ཤེས་བྱ་ཡོན་ཏན་ལྡན་ན་འཕེལ་རྒྱས་མྱུར། །
ཤེས་བྱ་ཡོན་ཏན་སྣ་མང་གང་ཡིན་ཡང་། །
འབད་པ་ཡུན་རིང་བསགས་པའི་འབྲས་བུ་ལགས། །