ཉིན་མཚན་བར་མེད་འཆི་བདག་མདུན་དུ།།
གོམ་པ་རེ་རེས་ཉེ་བར་བཅར་དུས།།
འཁྲུལ་སྣང་བདུད་པོའི་ཞགས་ཐག་ཕྲ་མོ།།
འཇིག་རྟེན་འདོད་རྒུའི་ལྕགས་ཀྱུར་འཁོན་སོང་།།
 
ཁ་བ་རུ་བའི་སྤུན་ཟླའི་ཁྲོད་ནས།།
གངས་རིའི་ལ་རྒྱ་གླེང་བར་འདོད་ཀྱང་།།
ལས་དབང་ཞིག་གི་རྒྱབ་གཟུགས་ངོགས་ནས།།
སྙིང་གཏམ་དྲོན་མོ་འཁྱག་གིས་བསྡམས་སོང་།།
 
ཕོ་བྲང་དམར་པོའི་རྒྱ་ཕིབས་ངོས་ནས།།
མི་རིགས་ཤིག་གི་ལོ་རྒྱུས་བཙལ་ཡང་།།
མཁའ་དབུགས་རྫོབ་པོའི་གྲོང་ཁྱེར་དབུས་ནས།།
མེས་པོའི་བཞིན་རས་ཡལ་ལ་ཉེ་བ།། 
 
ཚོར་རྟོག་ཕྲ་མོའི་སྙན་ངག་རེ་ཙམ།།
སེམས་དང་སྨྱུག་རྩེས་ལན་མང་བྲིས་ཀྱང་།།
སྒྱུ་རྩལ་དབུལ་བའི་སློང་མོ་ང་རང་།།
རྩོམ་རིག་སྟེགས་བུའི་རྒྱལ་སར་མ་སོན།།
 
དྲན་པའི་ཀློང་གི་ཚོར་འདུ་དྲག་པོ།།
ཡ་ཆུང་སེམས་ཀྱི་ན་ཟུག་ཁོ་ན།།
ཉི་མ་གཞོན་ནུའི་འཆར་ནུབ་མཚམས་ན།།
མཚམས་སྤྲིན་དམར་པོ་ང་ཡི་སེམས་གསོ།།