བུད་མེད་ཚོ།ལྗང་བུ་ཆུང་ཆུང་གི་དུས་ནས།
སྐྱེས་པ་ཚོའི་ལག་སོར་གྱིས་འཐེན་ནས་ནར་སོན།
བུད་མེད་ཀྱི་མཚར་སྡུག་ཡོད་ཚད།
སྐྱེས་པ་ཚོའི་ཡལ་ག་ཁོ་ནར་བཞད།
 
བུད་མེད་ཀྱི་རི་ཀླུང་ཉུལ་བའི་དྲི་བསུང་དེ་ཚོ།
མཚན་དཀྱིལ་གྱི་ཙི་གུ་བཞིན།
བུ་ག་ཡོད་ཚད་ནས་འཛུལ་བཞིན་འོང་།
 
བུད་མེད་ནི་པི་ཝང་ཞིག་སྟེ།
པང་བར་འཕྲེད་ཀྱིས་བཟུང་བ་ཙམ་གྱིས།
རོལ་དབྱངས་སྣ་ཚོགས་ཅི་འདོད་དུ་དཀྲོལ་ཆོག
ཡང་ན་བུད་མེད་ནི་ལོ་ངོ་སྟོང་གི་བསྙལ་ཆང་ཕོར་བ་གང་སྟེ།
བཏུང་བ་ཙམ་གྱིས་གདོང་བ་ཚ་དབལ་དབལ་བྱེད་ཅིང་།
རྩ་ཁམས་སྦྲིད་ཆ་ལེར་འཇོག་སྟེ།
ཡོད་ཚད་ཁྱོད་ལ་ཁས་ལེན་དུ་འཇུག་མོད།
ཐ་མ་ཁས་བླངས་ཚང་མ་བུད་མེད་རང་གིས་སྲུང་བར་བྱེད།
རེས་འགའ་བུད་མེད་ནི་རྦ་རླབས་བཞིན་དུའང་འཁྲུགས་མོད།
རང་སར་བཞག་པ་ཁོ་ནས།
བྱུང་ཡང་རྒྱ་མཚོ་རང་ལས་བྱུང་།
ཐིམ་ཡང་རྒྱ་མཚོ་རང་ལ་ཐིམ་ཏེ་འགྲོ།
 
བུད་མེད་ཀྱིས་འདྲི་ཚིག་བརྒྱ་དྲིས་ཀྱང་།
ཚིག་ལན་གཅིག་གིས་ཚིམས་ཏེ་འགྲོ།
བུད་མེད་ཀྱི་ཕྲག་མགོ་ངུ་ཤུབ་ཁྲོད་འདར་གསིག་བྱེད་པ་ནི།
ལྟ་ཤེས་ན་མཛེས་སྡུག་ཅིག་ཡིན་ཏེ།
བུད་མེད་ཀྱི་གསང་བ་མང་པོ་ཞིག
མིག་ཆུའི་ཁྲོད་ན་འོད་དུ་འཚེར།
 
འོན་ཀྱང་བུད་མེད་ཚོའི་འཛུམ་དཀར་གྱི་ཁྱམས་ན།
འཇིག་རྟེན་ཧྲིལ་བོ་ཆགས་ཡོད།
ཁྱོད་རང་ཤོག་བྱ་བཞིན།
མཁའ་དབྱིངས་མཐོ་སར་ཇི་ལྟར་རང་དབང་དུ་འཕྱོ་ཡང་།
ཐག་སྣེ་དེ། བུད་མེད་ཅིག་གི་ལག་ཏུ་བཟུང་ཡོད།
གངས་དབང་གིས་པར་བླངས།