དཀར་དཀར་གངས་ཀྱི་རི་བོའི་ལ་ཐོད་བཅིངས། །
མཛེས་མཛེས་ཆུ་སྐྱེས་དགའ་བའི་སོ་འཕྲེང་དགོད། །
ལྷུང་ལྷུང་དལ་འབབ་བཞི་ཡི་སྐ་རགས་ཅན། །
མཐོ་མཐོ་འཛིན་མའི་གཙུག་རྒྱན་ཕ་ཡུལ་དྲན། །
ལྗང་ལྗང་ནེའུ་གསིང་འཇམ་གཉེན་གཡོ་བའི་དབུས། །
ཁྲ་ཁྲ་ཚོན་གྱིས་བྱུགས་འདྲའི་འདབ་སྟོང་ལས། །
ཞིམ་ཞིམ་དྲི་ངད་ཕྱོགས་སུ་ལྡང་བ་ཡི། །
སྐྱིད་སྐྱིད་དཔྱིད་དཔལ་ངོམ་པའི་ཕ་ཡུལ་དྲན། །
ཆེ་ཆེ་བརླན་གཤེར་འཛོམས་པའི་ཞིང་ཐང་ནང་། །
སིམ་སིམ་སྦྲང་ཆར་བསིལ་མས་ལེགས་བསྐྱངས་པའི། །
ལེགས་ལེགས་གསེར་མདོག་སྙེ་མ་གཡོ་ལྡན་པའི། །
འཕེལ་འཕེལ་འབྲུ་རིགས་རྒྱས་པའི་ཕ་ཡུལ་དྲན། །
ཡངས་ཡངས་གཡུ་ཡི་སྤང་ཐང་ཡངས་པའི་ངོགས། །
མང་མང་རྟ་ལུག་འབྲི་གཡག་ཁྱུ་ཚོགས་ཀྱི། །
དཀར་དཀར་འོ་ཞོའི་བཟའ་བཏུང་ལེགས་བསྐྱིལ་བའི། །
གཙང་གཙང་ཟས་སྣ་འཛོམས་པའི་ཕ་ཡུལ་དྲན། །
རིང་རིང་དར་སྐུད་སྤེལ་འདྲའི་གཞུང་ལམ་འགྲམ། །
ཕྱོགས་ཕྱོགས་ལྕང་མ་ཚར་དུ་དངར་བ་ལས། །
བསིལ་བསིལ་འཇམ་པའི་གྲིབ་མ་ཀུན་ལྡན་པའི། །
མང་མང་ལྗོན་ཤིང་རྒྱས་པའི་ཕ་ཡུལ་དྲན། །
མཐོ་མཐོ་བརྗིད་ལྡན་མཛེས་པའི་ཁང་བཟང་རྣམས། །
འགྲིག་འགྲིག་གཅིག་ལས་གཅིག་ལྷག་འགྲན་བཞིན་དུ། །
འཚེར་འཚེར་སྐར་ཚོགས་ས་ལ་འཕོས་འདྲ་བའི། །
གསལ་གསལ་གློག་གི་གྲོང་ཁྱེར་ཕ་ཡུལ་དྲན། །
སྐྱིད་སྐྱིད་གླིང་ག་སྐྱེད་ཚལ་བྱེ་བའི་ཁྲོད། །
མཐུན་མཐུན་བརྩེ་བ་བསྐྱངས་པའི་ཕོ་མོ་རྣམས། །
སྙན་སྙན་ཚིག་འཇམ་དབྱངས་ལ་གྱེ་བཞིན་དུ། །
དུང་དུང་རྩེ་དགས་མྱོས་པའི་ཕ་ཡུལ་དྲན། །
དར་དར་ཚན་རིག་འཕྲུལ་གྱི་གར་རྩེ་ལས། །
རྒྱས་རྒྱས་དཔལ་འབྱོར་ཚོང་ཟོང་འབུམ་གཏམས་ཤིང་། །
རང་རང་ཡིད་ཀྱི་གཤིས་ལུགས་དང་མཐུན་པའི། །
གང་གང་འདོད་དགུ་མོད་པའི་ཕ་ཡུལ་དྲན། །