ཕ་ཡུལ་གྱི་གླུ་ནི།
རྒྱུན་ཕྲ་ཞིང་ཕྲ་བའི་གླིང་བུའི་དབྱངས་རྟ་ཞིག་སྟེ།
མཚན་མོའི་ཟླ་འོད་མག་མོག་གི་དཀྱིལ་འཁོར་ནས་ཀྱང་།
འཁྱག་བསིལ་བསིལ།  མིག་ཆུ་ལྷུང་བ་བཞིན་གྲགས་འོངས།
 
ཕ་ཡུལ་གྱི་བཞིན་རས་ནི།
ཕོངས་ཆེ་ཞིང་ཆེ་བའི་འཁྲེང་སེམས་རབ་རབ་གཅིག་སྟེ།
རྫ་སྒང་འདིའི་ན་བུན་སྲབ་མོའི་ཡོལ་ངོགས་ནས་ཀྱང་།
སྨྲེང་ཤུར་ཤུར།  ལག་པ་གཡུག་བཞིན་དུ་གྱེས་འགྲོ།
 
ཕ་ཡུལ་དང་བྲལ་རྗེས།
དྲན་གདུང་གི་ཟུག་རྔུ་ནི་ལོ་འཁོར་གྱི་གཉེར་རིས་མེད་པའི།
བྲག་སྟེང་གི་ཤུག་པ་ཁེར་སྐྱེས་ཤིག་སྟེ།
ལོ་དང་དུས་ཚོད་ཀྱི་བར་གསེང་རིང་མོ་ནས་ཀྱང་།
འདར་ཤིག་ཤིག   མིག་ཟུང་ཟིམ་མེད་དུ་འགྲེང་ཡོད།