བཤེས་གཉེན་ལགས།
ཁྱེད་ནི་ཨ་སྔོན་གནམ་གྱི་དྲོད་འཇམ་ཉི་མ་ལགས།
ང་ནི་ཁྱོད་ལ་འཁོར་བའི་པད་མ་མེ་ཏོག་ཡིན།
བཤེས་གཉེན་ལགས།
ཁྱེད་ནི་ཚེས་ཆེན་བཅོ་ལྔའི་དཀར་གསལ་ཟླ་བ་ལགས།
ང་ནི་ཁྱེད་ལ་འཁོར་བའི་ཀུ་མུད་མེ་ཏོག་ཡིན།
བཤེས་གཉེན་ལགས།
ཁྱེད་ནི་དྭངས་ཤིང་བསིལ་བའི་བརྒྱད་ལྡན་ཆུ་བོ་ལགས།
ང་ནི་ཁྱེད་ལ་འཁོར་བའི་གསེར་མིག་ཉ་ཆུང་ཡིན།
བཤེས་གཉེན་ལགས།
ཁྱེད་ནི་མཚར་དུ་དངར་བའི་སྐལ་བཟང་མེ་ཏོག་ལགས།
ང་ནི་ཁྱེད་ལ་འཁོར་བའི་རྐང་དྲུག་བུང་བ་ཡིན།
བཤེས་གཉེན་ལགས།
ཁྱེད་ནི་ཨ་སྔོན་དགུང་ལ་སྙེགས་འདྲའི་གངས་རི་དཀར་པོ་ལགས།
ང་ནི་ཁྱེད་ལ་འཁོར་བའི་གངས་ལྷ་མེ་ཏོག་ཡིན།
བཤེས་གཉེན་ལགས།
ཁྱེད་ནི་གཏིང་མཐའ་དཔོག་དཀའི་མ་ཕམ་གཡུ་མཚོ་ལགས།
ང་ནི་ཁྱེད་ལ་འཁོར་བའི་ངང་པ་སེར་པོ་ཡིན།